Երեկ ուշ երեկոյան ՈՒԵՖԱ-ն, այնուամենայնիվ, որոշում կայացրեց Եվրոպա լիգայի փլեյ-օֆ փուլի «Արարատ-Արմենիա»-«Ցրվենա Զվեզդա» հանդիպումը Երևանում չանցկացնելու մասին։ Եվրոպական ֆուտբոլային կառույցը մասնավորապես հաշվի է առել երեկ առավոտյան Ադրբեջանի զինված ուժերի կողմից ՀՀ տարածքում գտնվող Վարդենիսի շրջանի գյուղերի հրետակոծման փաստը: Ըստ ՈՒԵՖԱ-ի՝ այս պահին մեր երկրում միջազգային ֆուտբոլային հանդիպում անցկացնելն անվտանգության առումով նպատակահարմար չէ։ ՈՒԵՖԱ-ի որոշմամբ՝ «Արարատ-Արմենիա»-«Ցրվենա Զվեզդա» հանդիպումը տեղի կունենա վաղը՝ Կիպրոսի մայրաքաղաք Նիկոսիայի GSP մարզադաշտում։
Հիշեցնենք, որ երեկ կեսօրին հանդիպման վայրի փոփոխության վերաբերյալ պաշտոնական որոշում չկար, և թվում էր, թե հանդիպումը այնուամենայնիվ կկայանա Երևանում։ Ավելին, «Ցրվենա Զվեզդայի» գլխավոր տնօրեն Զվեզդան Տերզիչը հայտարարել էր, որ իրենք պատրաստ են ժամանել Հայաստան։ «Հավատում եմ, որ ՈՒԵՖԱ-ն կուսումնասիրի մրցող թիմերի անվտանգության հետ կապված խնդիրները և համապատասխան որոշում կկայացնի: Ես կարծում եմ, որ այս դիմակայությունը պետք է Հայաստանում տեղի ունենա: Մենք չենք ցանկանում օգտվել հայ ժողովրդի համար այս բարդ իրավիճակից և փոխել խաղի անցկացման վայրը: Վիճակահանության արդյունքում պետք է խաղանք դրսում. ուրեմն կգնանք և այնտեղ էլ կխաղանք»,- Dnevnik պարբերականի թղթակցին հայտնել էր Տերզիչը։
ՈՒԵՖԱ-ի որոշումից հետո հայտարարությամբ հանդես եկավ նաև Հայաստանի ֆուտբոլի ֆեդերացիան, որում մասնավորապես ասված է. «Հաշվի առնելով մի շարք հանգամանքներ, մասնավորապես, այսօր առավոտյան Ադրբեջանի կողմից Հայաստանի Հանրապետության՝ միջազգայնորեն ճանաչված տարածքների ռմբակոծումը, Հայաստանի չեմպիոն «Արարատ-Արմենիայի»՝ ՈՒԵՖԱ Եվրոպա լիգայի որակավորման փլեյ-օֆ փուլում սերբական «Ցրվենա Զվեզդայի» հետ հանդիպման վայրի տեղափոխությունը Կիպրոս, այսօրվանից սկսած՝ ՀՖՖ հովանու ներքո անցկացվող բոլոր մրցաշարերը դադարեցվում են անորոշ ժամկետով: Ըստ այդմ՝ հետաձգվում են նաև VBET Հայաստանի Պրեմիեր լիգայի՝ սեպտեմբերի 30-ին նախատեսված բոլոր հանդիպումները: Լրացուցիչ տեղեկատվություն կհաղորդենք հաջորդիվ»։
Հիշեցնենք, որ ՀՖՖ-ն իր հովանու ներքո անցկացվող մրցաշարերի դադարեցման մասին հայտարարություն տարածել էր դեռևս սեպտեմբերի 27-ին։ Մեկ օր անց, սակայն, ՀՖՖ-ն փոխել էր որոշումը՝ նշելով, որ չնայած Ադրբեջանի կողմից Արցախի նկատմամբ իրականացվող պատերազմական լայնածավալ գործողություններին՝ մրցավեճերն այնուամենայնիվ կկայանան։ Ավելին, հանդիպումներից առաջ պետք է իրականացվեր #ArtsakhStrong արշավը: Հանդիպումները պետք է սկսվեին լռության րոպեով, իսկ մասնակից թիմերի ֆուտբոլիստները կկրեին սև ժապավեններ:
Կարծում ենք՝ պարզ է, որ ՀՖՖ-ն իր հովանու ներքո հանդիպումների վերսկսման վերաբերյալ որոշում էր կայացրել ՈւԵՖԱ-ին ցույց տալու համար, որ մեր երկրում ամեն ինչ նորմալ է, և կարելի է անցկացնել պաշտոնական հանդիպում։ ՀՖՖ-ի որոշման հիմքում «Արարատ-Արմենիա»-«Ցրվենա Զվեզդա» հանդիպման Երևանում անցկացնելն էր։ Ցավոք, մեր ֆուտբոլային գերատեսչության քայլը չստիպեց ՈՒԵՖԱ-ին թույլ տալ մեր երկրում անցկացնել կարևոր միջազգային հանդիպում։ Ինչևէ, մերոնք կխաղան Կիպրոսում։ Խաղալու ենք չեզոք դաշտում։
Այո, մեր երկրի համար բախտորոշ՝ պատերազմական իրավիճակում ֆուտբոլը կարծես մղվել է երկրորդ պլան։ Այնուամենայնիվ, ներկայիս ծանր իրավիճակում հարկ ենք համարում կատարել հետևյալ դիտարկումը։ «Արարատ-Արմենիան» վաղը ներկայացնելու է Հայաստանը, որը կենաց-մահու պայքար է մղում ընդդեմ Թուրքիայի և Ադրբեջանի ագրեսիայի։ Ներկայում մեր երկրին, թեկուզ փոքրիկ, հաղթանակներ անհրաժեշտ են բոլոր հարթություններում։ Վաղը «Արարատ-Արմենիան» լինելու է ֆուտբոլային հանրության ուշադրության կենտրոնում, քանզի փորձելու է բարձր պահել հերոսաբար պայքարող պետության և ժողովրդի պատիվը։ «Արարատ-Արմենիան» պարտավոր է հաղթել՝ ապացուցելու համար, որ մեր երկիրը պատրաստ է և կարող է հաղթել բոլոր ոլորտներում։ Այո, որակավորման փուլում «Արարատ-Արմենիան» ծանր հանդիպումներ է անցկացրել, բայց հիմա ժամանակը չէ տրտնջալու։
Կարևոր ևս մեկ հանգամանք։ Այո, «Արարատ-Արմենիայի» լեգեոներներից շատերը վաղը մեծ նվիրվածությամբ կպայքարեն Հայաստանի պատվի համար, բայց… Կարծում ենք, սակայն, որ շատ ավելի ճիշտ կլինի վաղվա խաղում մեկնարկային կազմում հնարավորինս շատ հայ ֆուտբոլիստների ներկայությունը։ Մենք բազմիցս ենք հաղթել մեր միասնականության և համարձակության շնորհիվ։ Վստահ ենք, որ կարող ենք հաղթել նաև վաղը։
«Արարատ-Արմենիա»-«Ցրվենա Զվեզդա» հանդիպումը կսկսվի Երևանի ժամանակով 21։00-ին։ Հաղթանակ բոլորիս։