Ադրբեջանի նախագահի հրամանագրով աշխատակազմի ռազմական հարցերի բաժնի նոր վարիչ է նշանակվել: Նա միաժամանակ հանդիսանում է նախագահի օգնական: Այդ պաշտոնը մինչեւ անցած տարեվերջ զբաղեցնում էր գեներալ-գնդապետ Մահեռամ Ալիեւը: 2023թ. դեկտեմբերի 9-ին նա նշանակվել է Բելառուսում Ադրբեջանի դեսպան եւ զինվորական ծառայությունից ազատ արձակվել:
Նրան փոխարինել է Ֆարիդ Սեիդովը: Վերջինս նախագահի աշխատակազմ է տեղափոխվել զինվորական դատախազությունից: Նա, ինչպես եւ նախորդը, ծագումով Նախիջեւանից է, որոշ ժամանակ ծառայել է Գյանջայում, ինչպես նաեւ՝ զինվորական դատախազության հատուկ կարեւոր գործերով վարչությունում: Քառասունչորսօրյա պատերազմից հետո նշանակվել է «Ղարաբաղյան շրջանի զինվորական դատախազ»:
Բաքվի ռազմական դատարանը քննում է պաշտպանության նախարարությունում 140 միլիոն մանաթի յուրացման քրեական գործը, կալանավորված են մի քանի զորամասերի, այդ թվում եւ Բարձրագույն ռազմական ուսումնարանի ֆինանսական բաժնի պետեր: Այդուհանդերձ, դատելով իշխանամերձ լրատվամիջոցների տեղեկատվական ուղղորդվածությունից՝ բոլոր մեղադրյալները սլաքներն ուղղում են պաշտպանության նախարարի նախկին առաջին տեղեկալ, ԳՇ նախկին պետ Նաջմեդին Սադիկովի դեմ:
Սադիկովն այդ պաշտոնը զբաղեցրել է 1993-2020 թվականներին: Պաշտոնապես նա ազատվել է քառասունչորսօրյա պատերազմից հետո: Բայց բազմաթիվ աղբյուրներ վկայում են, որ նա ԳՇ-ից հեռացվել է տավուշյան մարտերից հետո: Նրան կասկածում են «դավաճանության մեջ»: Տավուշյան մարտերում ոչնչացված գեներալ Հաշիմովի մայրը Սադիկովին ուղղակի մեղադրել է որդու «սպանությունը կազմակերպելու» մեջ: Զինվորական դատախազությունում ծառայության զգալի փորձ ունեցող, ծագումով Նախիջեւանից Սեիդովի նշանակումը, կարծես, վկայում է, որ Իլհամ Ալիեւը պաշտպանության նախարարությունում խնդիրներ ունի եւ ձգտում է ոչ միայն խոշոր չափերով յուրացման գործի քննությունը, այլեւ ներհամակարգային ինտրիգները կառավարել վստահելի անձի միջոցով:
Բաքվի Վերաքննիչ դատարանը վերջերս մեղմացրել է «Բեյլագանի գործով» դատապարտված՝ ՊՆ անձնակազմի հետ աշխատանքների գլխավոր վարչության գաղափարախոսական եւ քարոզչության բաժնի պետ նախկին գեներալ-մայոր Օրուջեւի պատիժը: Նրանից հանվել է լեյտենանտ Ալիլիի սպանության մեղադրանքը: Աղբյուրների վարկածով՝ դա նշանակում է, որ «մեղադրանք կարող է առաջադրվել կորպուսի հրամանատար Բարխուդարովին»: Նա քառասունչորսօրյա պատերազմի «հերոսի» համարում ուներ, բայց Իլհամ Ալիեւը ցամաքային զորքերի հրամանատար-պաշտպանության փոխնախարար նշանակեց գեներալ Միրզոեւին՝ պաշտոնապես ֆորմալացնելով Շուշիի «ազատարարի» նրա կարգավիճակը:
Ռազմական գերատեսչությունում կադրային ի՞նչ փոփոխություններ է նախապատրաստում Ալիեւը: Մայիսի 18-ին նա շատ անսպասելի ռազմաօդային եւ ՀՕՊ զորքերի հրամանատար է նշանակել Նամիկ Իսլամզադեին՝ զինվորական ծառայությունից հեռացնելով 58-ամյա գեներալ-լեյտենանտ Ռամիզ Թահիրովին: Ադրբեջանի բանակում եւ պաշտպանության նախարարությունում «հաղթանակի դափնիների» ձգտող գեներալներ կա՞ն: Առջեւում խորհրդարանի արտահերթ ընտրություններն են: Զինվորականությունը բարձրագույն իշխանությունից իր «արդար բաժի՞նն է ուզում»:
Ըստ երեւույթին, Ալիեւը սկզբունքորեն նոր թիմ եւ վերնախավ ձեւավորելու խնդիր ունի: Բելառուսի նախագահը «պատմության հրամայականով» նրան կարգել է «Կովկասի առաջնորդ»: Մյուս կողմից Թուրքիան է «սեղմում»: Իրանի նախագահի մահով Բաքու-Թեհրան հարաբերություններն, ամենայն հավանականությամբ, մի տեւական ժամանակահատված մնալու են դիվանագիտական «բարձր լարման» ռեժիմում: Գործող էլիտան, ըստ տեղեկությունների, կազմված է Ալիեւին եւ առաջին տիկին ու փոխնախագահ Մեհրիբան Ալիեւային հավատարիմ անձանցից, եւ նրանց միջեւ մրցակցությունը ցանկացած պահի կարող է բացահայտվել:
