Իրանական ԻՌՆԱ գործակալությունը հայտնում է, որ Թեհրանում ընդունելով Հայաստանի վարչապետ Նիկոլ Փաշինյանին, Իրանի գերագույն հոգեւոր առաջնորդ Ալի Խամենեին ասել է. «Մեր հանգուցյալ նախագահը շատ զգայուն էր Հայաստանի հետ կապված սահմանային խնդիրների և դրա շուրջ տեղի ունեցող իրադարձությունների նկատմամբ, և և այդ զգայունությունն ու հոգատարությունը դեռ պետք է հաշվի առնել, և մենք պետք է կարողանանք ապահովել մեր սեփական շահերը»։
Նիկոլ Փաշինյանն ինչպես հայտնի է Իրան է մեկնել հանգուցյալ նախագահ Ռեյիսիի եւ արտգործնախարար Աբդոլահիանի թաղման արարողությանը մասնակցելու համար, որոնք մայիսի 19-ին դարձան ուղղաթիռի աղետի զոհ: Իրանի Գերագույն հոգեւոր առաջնորդի հայտարարությունը շատ կարեւոր է, նկատի ունենալով այն հանգամանքը, որ Հայաստանում շատ հարցադրումներ էին հնչում, թե նախագահ կորցրած եւ բավականին մարտահրավեր ստացած Իրանն արդյո՞ք աչալրջորեն կհետեւի այն «կարմիր գծերին», որոնց մասին բարձրաձայնում էր Հայաստանի սահմանների, մասնավորապես հայ-իրանական սահմանի առնչությամբ, ինչը շատ կարեւոր է Հայաստանի համար:
Փաստացի, Իրանի Գերագույն հոգեւոր առաջնորդի հայտարարությունը հավաստիացում է, որ Թեհրանը չնայած նախագահական ուղղաթիռի ողբերգության, նախագահի եւ արտգործնախարարի կորստին եւ դրանից բխող որոշակի մարտահրավերներին եւ ներքաղաքական պայքարի սրմանը, չի թուլացնի ուշադրությունը այն խնդիրների հանդեպ, որոնք զգայուն լինելով Իրանի համար, կարեւոր են նաեւ Հայաստանի համար: Սա անշուշտ Հայաստանի համար չպետք է բերի այսպես ասած «արխայինության»:
Պարզապես, հոգեւոր առաջնորդի արձանագրումը հուշում է, որ Իրանը պատրաստ է այդ հարցերի առնչությամբ Հայաստանի հետ հաղորդակցությունն ու աշխատանքը շարունակելուն: Ըստ այդմ, Երեւանը պետք է շարունակի Թեհրանի հետ այդ ուղղությամբ աշխատանքը՝ հայ-իրանական հարաբերության շուրջ աշխատանքի շարունակության եւ խորացման լայն խնդրի շրջանակում, միաժամանակ իհարկե որեւէ կերպ չթուլացնելով Հայաստանի տարածքային ամբողջության եւ սահմանների անձեռնմխելիության ուղղությամբ աշխատանքը այլ կարեւոր ուղղություններով: