Մայիսի 20-ին Թուրքիայի եւ Ադրբեջանի հեռախոսազրույցի մասին տեղեկատվությանը զուգահեռ թուրքական լրատվամիջոցները տարածել են ԱԹՍ-երի արտադրության «Բայրաքթար» ընկերության գործադիր տնօրեն Սելջուկ Բայրաքթարի կարճ հարցազրույցը, որ նա տվել է հեռուստաընկերություններից մեկին: Նա ասել է, որ նախագահ Ռեիսիի ուղղաթիռի աղետից կարճ ժամանակ անց Իրանի իշխանություններն օգնության խնդրանքով դիմել են Թուրքիային:
Թուրքիան աղետի վայր է ուղարկել «Բայրաքթար-Աքինչի» ԱԹՍ եւ գիշերային տեսանլիության սարքերով ուղղաթիռ, որոնողական աշխատանքները տեւել են յոթ ժամ: Բայրաքթարի խոսքի առանցքային շեշտադրումն այն է, որ թուրքական ԱԹՍ-ի «օպերատորը գտնվել է Ադրբեջանի տարածքում»: Թուրքական «Բայրաքթար-Աքինչի» նոր ԱԹՍ-ի «արտասահմանյան առաջին գնորդն» Ադրբեջանն է:
Եւ եթե Իրանի նախագահի կործանված ուղղաթիռի որոնումներն իրականացվել է Ադրբեջանի տարածքում գտնվող օպերատորի կոորդինացիայով, ապա ինչու՞ չենթադրել, որ «Բայրաքթար-Աքինչի» ԱԹՍ-ն օդ է բարձրացել Ադրբեջանից: Օդային աղետի մասին ադրբեջանական մամուլի առաջին տեղեկատվությունն ասում էր, որ Իրանի նախագահի ուղղաթիռը «կոշտ վայրէջք է կատարել Ադրբեջանին սահմանակից Ջուլֆա քաղաքի շրջանում»:
Թուրքիայից օդ բարձրացած ԱԹՍ-ն աղետի վայր կարող էր հասնել ժամերի, իսկ Ադրբեջանից՝ անհամեմատ ավելի կարճ ժամանակի ընթացքում: Բացառված է, որ Ադրբեջանի ՀՕՊ ծառայությունը չի հետեւել Իրանի նախագահի ուղղաթիռի ընթացքին. Կառավարական «բորտ թիվ մեկն» օդ է բարձրացել Ադրբեջանի տարածքից: Փաստացի Սելջուկ Բայրաքթարը բացահայտել է, որ Իրանի նախագահի ուղղաթիռի խորտակման մասին առաջին տեղեկություններն ստացվել են Ադրբեջանից, իսկ ԱԹՍ-ն ապահովել է, որպեսզի Իրանի ղեկավարությունն «իրական ժամանակային ռեժիմում հետեւեն որոնողական աշխատանքներին»:
Իրանի նախագահի այցից մեկ օր առաջ Իլհամ Ալիեւը ռազմաօդային եւ ՀՕՊ ուժերի նոր հրամանատար է նշանակել՝ այդ պաշտոնը վստահելով Թուրքիայում մասնագիտական կրթություն ստացած գեներալ-մայոր Նամիկ Իսլամզադեին: Իրանի նախագահի ուղղաթիռի կործանման եւ որոնողական աշխատանքների մասին Բաքվի մամուլի բոլոր հրապարակումներում այն նարատիվն է իշխում, որ իրանական ԱԹՍ-երը «միանգամյա օտգաործման են» եւ տեխնոլոգիական բոլոր պարամետրերիով թուրքականին զիջում են:
Չափազանցություն կլիներ ասել, թե Իրանի նախագահի ուղղաթիռի կործանումը «կազմակերպված» է, բայց որ աղետն առիթ է դարձել, որպեսզի ադրբեջանական կողմը ցուցադրի, որ Իրանը տարածաշրջանային հեգեմոն պետություն չէ գոնե ԱԹՍ-երի մրցակցությամբ, ակնհայտ է: Սելջուկ Բայրաքթարը փաստացի բացահայտել է, որ Ադրբեջանի օդային տարածքը թուրքական պատասխանատվության գոտի է: Մայիսի 19-ին Իրանի նախագահը փորձել է Իլհամ Ալիեւին այլ բան համոզե՞լ: Ակնհայտորեն ծաղրելով Իրանի տեխնոլոգիական ,,հետամնացությունը,,՝ Բաքվի իշխանական կայքը գրել է. «Եւ այդ երկիրն է ձգտում հարեւաններին անվտանգության հարցերում ընտրություն պարտադրել»: