![](https://www.1in.am/assets/uploads/2024/05/Untitled-1-583.jpg)
Թուրքիայի նախկին վարչապետ, Էրդողանի նախկին կուսակից, իսկ վերջին տարիներին Ապագա կուսակցությունը հիմնած Ահմեդ Դավութողլուն հայտարարել է, որ ղարաբաղյան հակամարտությունը լուծված է եւ Թուրքիան պետք է դիվանագիտական հարաբերություն հաստատի Հայաստանի հետ, բացի սահմանները: Դավութողլուն Թուրքիայի վարչապետ, նաեւ արտգործնախարար եղած տարիներին «զրո խնդիր հարեւանների հետ» կոնցեպցիայի հեղինակն էր: Սակայն, այդ կոնցեպցիայի փոխարեն, Թուրքիան գնաց գրեթե բոլոր հարեւանների հետ խնդիրների ճանապարհով: Իհարկե դա հետեւանք էր Էրդողանի հավակնոտ, ընդհուպ մարտաշունչ կոնցեպցիայի:
Համենայն դեպս առերեւույթ դրա վրա էր հիմնված նաեւ Դավութողլուի եւ նրա համակիր այլ կուսակցականների կոնֆլիկտը Էրդողանի հետ եւ բաժանումը՝ նոր կուսակցության հիմնումով: Պետք չէ բացառել, որ դա պետք էր նաեւ Էրդողանին, այսպես ասած «յուրային» ընդդիմություն ձեւավորելու համար: Եթե անգամ կար այդպիսի հաշվարկ, ապա նա առնվազն առայժմ չի արդարացել: Արդյո՞ք Էրդողանին պետք է, որ Դավութողլուն այսօր խոսի Հայաստանի հետ հարաբերությունը կարգավորելու մասին, ըստ էության այն թափանցիկ տողատակով, որ Թուրքիան այդ հարցում այլեւս «պարտք չունի» Ադրբեջանին եւ պետք է ինքնուրույն որոշի Հայաստանի հետ հարաբերությունը, այն այլեւս չկապելով Ադրբեջանի հետ Հայաստանի այսպես ասած խաղաղության պայմանագրի գործընթացին:
Անկարան այդ հարցում շեշտադրումներ ու ակնարկներ ուղիղ անել չի կարող, բայց կարող է թեման շրջանառել այլ ուժերի, մասնավորապես նախկին վարչապետ Դավութողլուի միջոցով: Ըդն որում, սա կարող է տրամաբանություն ունենալ այն համատեքստում, որ Ադրբեջանը չնայած նրան, որ շարունակում է Թուրքիային հրապարակավ ճանաչել «ավագ եղբայյր», այդուհանդերձ ակնհայտորեն ձեռնմուխ է եղել ռեգիոնալ այսպես ասած ինքնուրույն ու անկախ դերակատար լինելու քաղաքականության, ինչը անկասկած այդքան էլ Անկարայի «սրտով» չէ:
Ամբողջ հարցն այն է, թե արդյո՞ք Անկարան դրանով փորձում է ստեղծել հայ-թուրքական հարցում Բաքվից «անկախ» քաղաքականություն վարելու հիմքեր, թե՞ այդ կերպ պարզապես փորձում է Բաքվին ակնարկել, որ, եթե Ադրբեջանը ձգտի «անկախ» լինել Թուրքիայի քաղաքականությունից,, ապա Անկարան էլ իրեն թույլ կտա հայ-թուրքական հարցում «անկախ լինել» Ադրբեջանից, ինչն իհարկե Բաքվի համար կարող է լինել լուրջ հարված: Փոխարենը, դա Անկարային կարող է բավականին մեծ կշիռ հաղորդել թե Արեւմուտքի, թե Ռուսաստանի, թե նաեւ այսպես ասած «գլոբալ հարավի» խաղացողների համար, նաեւ Չինաստանի առնչությամբ առանձին հաշվարկով:
Ի դեպ, Դավութողլուի հայտարարության ֆոնին, մայիսի 23-ին Հայաստանում Եվրամիության դեսպան Մարագոսը այցելել է հայ-թուրքական սահմանի Մարգարայի անցակետ եւ այնտեղ հանդիպել Հայաստանի ՊԵԿ նախագահին, որը ԵՄ դեսպանին է ներկայացրել նորոգված անցակետի հնարավորություններն ու պայմանները: