Հոկտեմբերի 21-ին ՈւԵՖԱ-ի Եվրոպայի լիգայի մրցաշարում կայացան երրորդ փուլի հանդիպումները:
A խմբում ավստրիական «Զալցբուրգը» Ռեդբուլ մարզադաշտում ընդունեց հանրահայտ «Յուվենթուսին»: Հիշեցնենք, որ «Զալցբուրգում» է հանդես գալիս ուրուգվայահայ հարձակվող Խոակին Պողոսյանը: Բայց այս խաղում Պողոսյանը բացակայում էր: Մինչ այս հանդիպումը «Զալցբուրգը» կրել է երկու անընդմեջ պարտություն եւ եզրափակում է խմբի մրցաշարային աղյուսակը: Հասկանալով հանդիպման կարեւորությունը` «Զալցբուրգի» ֆուտբոլիստները հենց խաղասկզբից առաջ նետվեցին, սակայն նրանց հաջողվեց միայն խաղակեսի վերջում հաջողության հասնել եւ ծանր կացության մեջ դնել «Յուվենթուսի» ֆուտբոլիստներին: Բանն այն է, որ «Յուվենթուսը» նախորդ երկու հանդիպումներում չէր հաղթել եւ պարտվելու դեպքում կարող էր կորցնել 1/16-րդ եզրափակիչ դուրս գալու բոլոր հույսերը: Երկրորդ խաղակեսի հենց սկզբին «Յուվենթուսի» նորեկ, սերբ կիսապաշտպան Միլոշ Կրասիչին հաջողվեց հավասարեցնել խաղի հաշիվը, եւ հանդիպումն ավարտվեց 1: 1 հաշվով: Խմբի մյուս խաղում «Մանչեսթեր սիթին» Էմանուել Ադեբայորի հեթ-տրիկի շնորհիվ կարողացավ 3: 1 հաշվով հաջողության հասնել Պոզնանի «Լեխի» նկատմամբ:
Մոսկվայի ԲԿՄԱ-ն, երկու հաղթանակներից հետո, Պալերմոյում հանդիպեց տեղի ակումբի հետ: ԲԿՄԱ-ն հաղթանակի դեպքում կարող էր վաղաժամ 1/16-րդ եզրափակիչի ուղեգիր ձեռք բերել, սակայն խաղասկզբին «Պալերմոյի» ֆուտբոլիստները ավելի ակտիվ էին, հատկապես աչքի էր ընկնում արգենտինացի հրաշամանուկ Գաբրիել Պաստորեն: ԲԿՄԱ-ին, այնուամենայնիվ, հաջողվեց կասեցնել «Պալերմոյի» սուր հարձակումները, ինչից հետո «Պալերմոյի» դարպասապահը տուգանային հրապարակում կոպիտ խախտում կատարեց, որի համար նշանակվեց 11-մետրանոց: Ի դեպ, խաղի գլխավոր մրցավարն ասես «խղճաց» «Պալերմոյի» դարպասապահին ու կարմիր քարտի փոխարեն, ցույց տվեց դեղին քարտ: 11-մետրանոցն իրացնելու համար գնդակին մոտեցավ ԲԿՄԱ-ի բրազիլացի հարձակվող Վագներ Լավը, սակայն «Պալերմոյի» դարպասապահն իրեն գերազանց դրսեւորեց եւ կասեցրեց հարվածը: Այդուհանդերձ, լեգեոներների շնորհիվ ԲԿՄԱ-ն կարողացավ 3: 0 հաշվով հաղթանակ տոնել: Այս խաղում եւս աչքի ընկավ կոտդըիվուարցի հարձակվող Սեյդու Դումբիան:
Խմբի մյուս հանդիպման ժամանակ Չեխիայի չեմպիոն «Սպարտան» 3: 0 հաշվով հաղթում էր Շվեյցարիայի երկրորդ դիվիզիոնը ներկայացնող «Լոզանին», սակայն շվեյցարացիները կարողացան հրաշքով փրկել խաղը, եւ գրանցվեց 3: 3 անսպասելի արդյունք: Մյուս հանդիպումներից աչքի ընկավ «Մետալիստ»-«Սամպդորիա» հանդիպումը: Թիմերը նախկինում հանդիպել են ՈւԵՖԱ-ի գավաթի 1/16-րդ եզրափակիչում, սակայն այդ ժամանակ «Մետալիստը» երկու հանդիպումներում սենսացիոն հաղթանակ տարավ: Ավանդույթի համաձայն` «Մետալիստը» այս հանդիպման ժամանակ էլ «Սամպդորիային» պարտության մատնեց 2: 1 հաշվով: Իսկ Ռուսաստանի պրեմիեր լիգայի մյուս ներկայացուցիչ «Զենիթը» Սանկտ Պետերբուրգում հյուրընկալեց Խորվաթիայի Սպլին քաղաքի «Հայդուկին»: Բուխարովի եւ Դանիի խփած գնդակների շնորհիվ «Զենիթին» հաջողվեց խմբային փուլում տանել երրորդ անընդմեջ հաղթանակը:
Նախկին ԽՍՀՄ ներկայացուցիչներից աչքի ընկավ Կիեւի «Դինամոն», որը մինչ այս հանդիպումը նվաճել էր ընդամենը մեկ միավոր: Նշենք, որ Դինամոյի գլխավոր մարզիչ Վալերի Գազաեւի հրաժարականից հետո այս խաղում նրա տեղը զբաղեցրեց Օլեգ Լուժնին` որպես ժամանակավոր պաշտոնակատար: Անհաջողություններից հետո դինամոյականներին վերջապես հաջողվեց ՈւԵՖԱ-ի Եվրոպայի լիգայի խմբային մրցափուլում տանել առաջին հաղթանակը:
