ՀՀ կրթության, գիտության, մշակույթի և սպորտի նախարարությունը երեկ ամփոփեց 2021 թվականի «Տարվա 10 լավագույն մարզիկներ» մրցույթի արդյունքները: Լավագույնների ընտրությունը կայացել էր ԿԳՄՍ նախարարությունում հավատարմագրված մարզական լրագրողների և ՀՀ հավաքական թիմերի գլխավոր մարզիչների քվեարկության համադրությամբ: Լավագույն տասնյակում տեղ են գտել ըմբիշներ, Արթուր Ալեքսանյանը, Մալխաս Ամոյանը, Արսեն Հարությունյանը, ծանրորդներ Սիմոն Մարտիրոսյանը, Գոռ Մինասյանը, Վարազդատ Լալայանը, բռնցքամարտիկներ Դավիթ Չալոյանը, Հովհաննես Բաչկովը, շախմատիստ Էլինա Դանիելյանն ու մարմնամարզիկ Արթուր Դավթյանը։ Հիշեցնենք, որ վերջին տարիներին մեր երկրում այլևս չկա տարվա լավագույն մարզիկ անվանակարգը։ Մասնավորապես, լավագույնն են համարվում այն բոլոր մարզիկները, որոնք տեղ են գտել լավագույն տասնյակում։ Երեկ տեղի ունեցած քվեարկության արդյունքները կարելի է համարել օբյեկտիվ։ Այնուամենայնիվ, ամփոփելով անցնող տարին փորձենք հասկանալ թե ով է 2021 թվականի Հայաստանի լավագույն մարզիկը։
Վերլուծելով մերոնց մրցելույթները «Առաջին լրատվական»-ը ներկայացնում է իր վարկածով այս տարվա լավագույն մարզիկների հնգյակը։ 2021 թվականին Հայաստանն ունեցավ մեկ աշխարհի չեմպիոն ի դեմս Մալխաս Ամոյանի։ Տոկիոյի Օլիմպիական խաղերում Արթուր Ալեքսանայնն ու Սիմոն Մարտիրոսյանը արծաթ մեդալակիր դարձան, իսկ Հովհաննես Բաչկովը և Արթուր Դավթյանը նվաճեցին բրոնզ մեդալ։ Առանձնացնենք նաև երիտասարդ բռնցքամարտիկ Դավիթ Չալոյանին, որը աշխարհի առաջնությունում դարձավ արծաթ մեդալակիր։ Անկախ Հայաստանի պատմության ընթացքում նշանակալի մրցաշարերում՝ աշխարհի առաջնություններում և օլիմպիական խաղերում մենք նշանակալի հաջողություններ գրանցել ենք բացառապես ըմբշամարտում, ծանրամարտում և բռնցքամարտում։ Չնայած, որ այս մարզաձևերը աշխարհում մասսայականություն լայն չեն վայելում այնուամենայնիվ դրանք հենակետային են մեզ համար։ Այս տարվա օլիմպիական խաղերը կարելի է աննախադեպ համարել Հայաստանի համար։ Խոսքը մարմնամարզիկ Արթուր Դավթյանի փայլուն ելույթն էր հենացատկում։ Դավթյանը մեր երկրի համար նվաճեց առաջին օլիմպիական մեդալը մարմնամարզությունում։ Մարզաձև, որը առանցքային դիրք ունի թե օլիմպիական խաղերում և թե մարզաշխարհում։ Սուղ պայմաններում Արթուր Դավթյանն ըստ էության արեց անհնարինը։ Մեր մարմնամարզիկը շատ մոտ էր օլիմպիական ոսկուն և արժանի էր օլիմպիական ոսկուն, բայց․․․։ Նրա նվաճած մեդալն իսկապես ոսկու արժեք ունի թե հայկական սպորտի և թե մեր երկրի համար։ Ուստի առանց երկմտելու «Առաջին լրատվական»-ը տարվա լավագույն մարզիկ համարում է Արթուր Դավթյանին։ Երկրորդ հորիզոնականում տեսնում ենք Մալխաս Ամոյանին։ Այս մարզիկը վերջին տարիներին էական առաջընթաց է գրանցել։ Նրան համարում ենք գալիք օլիմպիական խաղերի ոսկե մեդալի իրական հավակնորդ։ Մեր լեգենդար մարզիկ Արթուր Ալեքսանյանը եզրափակում է լավագույն եռյակը։ Ալեքսանյանը մոտ էր Տոկիոյում պատմական արդյունք գրանցելուն և հռչեկվելու Օլմպիական խաղերի կրկնակի չեմպիոն։
Ցավոք հայ մարզիկը մրցավարական կողմնակալության զոհ դարձավ։ Այնուամենայնիվ մեր օլիմպիական չեմպիոնն դեռևս ունի հնարավորություն 2024 թվականին վերականգնելու արդարությունը և դառնալու անկախ Հայաստանի առաջին օլիմպիական կրկինակի չեմպիոնը։ Չորրորդ տեղում տեսնում ենք Հովհաննես Բաչկովին։ Վերջինս իր կայուն ելույթներով տեղ է գտել աշխարհի ուժեղագույն բռնցքամարտիկների շարքում։ Օլիմպիական բրոնզից զատ Բաչկովը երրորդ տեղ զբաղեցրեց նաև աշխարհի առաջնությունում։ Լավագույն հնգյակում տեսնում ենք նաև Դավիթ Չալոյանին, որը այս տարվա գլխավոր հայտնությունն էր: Ինչպես Արթուր Դավթյանը Չալոյանը գլխից վեր ցատկելով արենց ըստ էության անհնարինը և արժանի է լինել լավագույն 5 մարզիկների շարքում։ Հնարավոր է շատերը չմահաձայվեն այն բանի հետ, որ Սիմոն Մարտիրոսյանին չենք ընդգրկել լավագույն հնգյակում։ Հայաստանի բոլոր ժամանակների լավագույն ծանրորդից այս տարի սպասելիքներն ավելի քան մեծ էին։ Նրան կես քայլ էր բաժանում դեպի օլիմպիական ոսկին, բայց․․․։ Ինչ խոսք ոսկին չնվաճելու մեջ կան նաև օբյեկտիվ և սուբյեկտիվ գործոններ, բայց ընդուենք, որ Սիմոն Մարտիրոսյանը այս տարի իր հնարավորություններից ցածր ելույթ ունեցավ։
Մեր ծանրորդը սպասելիքները չարդարացրեց նաև վերջերս Տաշքենդում տեղի ունեցած աշխարհի առաջնությունում բավարարվելով բրոնզե մեդալով։ 2021 թվականին մեր մարզիկների գրանցած հաջողություններից առանձնակի ուշադրության է արժանի Էլինա Դանիելյանի փայլուն ելույթը Եվրոպայի առաջնությունում։ Մեր ուժեղագույն շախմատիստուհին Հայաստանին պարգևեց առաջին ոսկե մեդալը կանանց շախմատի անհատական մեծ մրցաշարերում։
