Տոկիոյում շարունակվող 32-րդ ամառային Օլիմպիական խաղերում այսօր տպավորիչ ելույթով աչքի ընկավ մեր բռնցքմարտիկներից 75-քաշային Արման Դարչինյանը։ 1/8 եզրափակիչում նա առավելության հասավ սլովակ Անդրեյ Շեմեզի նկատմամբ։ Լարված մենամարտի առաջին ռաունդը հայ բռնցքամարտիկի համար հաջող չդասավորվեց։ Թեև մեր մարզիկը ճնշում էր մրցակցին, բայց Շեմեզը ավելի շատ հարվածներ հասցրեց ու հաղթեց 4;1 հաշվով։ Երկրորդ ռաունդում Դարչինյանը փոխեց մարտավարությունն ու առաջ նետվելով լուրջ առավելություն ստացավ։ Մի շարք հուժկու հարվածներ և սլովակ մարզիկը ստիպված կամ բռնում էր մրցակցին, կամ պարզապես փախչում էր ռինգում։ Երրորդ ռաունդում Դարչինյանը էլ ավելի մեծացրեց ճնշումը ինչի արդյունքում մրցակիցը սկսեց ավելի շատ բռնվել մեր մարզիկից, որի համար նույնիսկ նկատողություն ստացավ։ Մրցավարների որոշմամբ հայ բռնցքամարտիկը առավելության հասավ 5։0 հաշվով։ Հաղթանակից հետո Դարչինյանը նշել է, որ մենամարտել է հատուկ մշակված մարտավարությամբ։
Արման Դարչինյանի հաջորդ մրցելույթը օգոստոսի մեկին է։ Մրցակիցը ֆիլպինցի Էմիռ Մարսիալն է։ Վերջինս 2019 թվականի աշխարհի փոխչեմպիոնն է։ Հաղթելու դեպքում Դարչինյանը կապահովի առնվազն բրոնզե մեդալ։ Այսպիսով, օլիմպիական խաղերում Հայաստանը ներկայացնող 3 բռնցքամարտիկներից երկուսը, պայքարը սկսեցին հաղթանակով։ Հիշեցնենք, որ բռնցքամարտի Հայաստանի հավաքականի առաջատար Հովհաննես Բաչկովը մեկնարկային մենամարտում 5։0 հաշվով հաղթել էր Անտիգուան ներկայացնող Ռայան Ալստոնին։ Հուլիսի 31-ին 1/8 եզրափակիչում Բաչկովը կմրցի ադրբեջանցի Ջավիդ Չալաբիևի հետ։ Արման Դարչինյանին ընդամենը մեկ քայլ է բաժանում կիսաեզրափակչից։ Հավանական է, որ օգոստոսի օգոստոսի 31-ին Հայաստանն ունենա առաջին մեդալը։ Մեր բռնցքամարտիկներից միակ պարտությունը կրել էր 52 կգ քաշային Կորյուն Սողոմոնյանը մեկնարկային մենամարտում զիջելով Մեծ Բրիտանիան ներկայացնող Ջալալ Յաֆային։ Ինչևէ, ամփոփելով մինչ օրս Հայաստանի հավաքականի ելույթը փորձենք գնահատել մեդալներ նվաճելու հնարավորությունները։ 17 օլիմպիականներից պայքարից դուրս են մնացել Կորյուն Սողոմոնյանը, ձյուդոյին՝ Ֆերդինանդ Կարապետյանը, ծանրորդ Իզաբելլա Յայլյանը և լողորդ Վարսենիկ Մանուչարյանը։ Այս պահին պայքարը շարունակում են հայաստանցի 13 օլիմպիականներ։
Նրանցից լողորդ Արթուր Բարսեղյանը վաղը ուժերը կփորձի 50 մ ազատ ոճում։ Նշենք սակայն, որ Բարսեղյանից սպասելիքները մեծ չեն և նա չի համարվում մեդալի հավակնորդ։ Մրցանակային տեղերի համար ըստ էության պայքարելու են 12 հայաստանցի մարզիկներ։ Նրանցից մարմնամարզիկ Արթուր Դավթյանը օգոստոսի 2-ին ելույթ կունենա հենացատկի եզրափակչում։ Դավթյանից, ինչպես նաև մեր երկու բռնցքամարտիկներից սպասելիքները մեծ են։ Օգոստոսի 1-ին պայքարը կսկսի հունա-հռոմեական ըմբիշ Արմեն Մելիքյանը։ Օգոստոսի 2-ին բացի Արթուր Դավթյանից՝ ելույթ կունենա նաև հունա-հռոմեական ըմբիշներ Կարապետ Չալյանը և Օլիմպիական չեմպիոն Արթուր Ալեքսանյանը։ Նրանք պայքարը սկսելու են 1/8-րդ եզրափակչից և երկուական հաղթանակ տանելու դեպքում կապահովեն առնվազն բրոնզե մեդալներ։ Օգոստոսի 3-ին ծանրամարտի 109 քաշային կարգում ելույթ կունենա աշխարհի չեմպիոն Սիմոն Մարտիրոսյանը։ Նույնը օրը ասպարեզ դուրս կգան նաև եռացատկորդ Լևոն Աղասյանը և ըմբիշ Կարեն Ասլանյանը: Այսինքն օգոստոսի 2-3-ը մեր օլիմպիական հավաքականի համար լինելու են հույժ կարևոր օրեր։ Իրադարձությունների միանգամայն հաջող դասավորվելու պարագայում՝ օգոստոսի 3-ին Հայաստանը կարող է ունենալ 4-5 մեդալ։ Ազատ ոճային ըմբշամարտի մրցումները կսկսվեն օգոստոսին 4-ին։ Այս մարզաձևում մենք չեմպիոնական ակնկալիքներ ունենք Արսեն Հարությունյանից և Վազգեն Թևանյանից։ Հարությունյանը պայքարը կսկսի օգոստոսի 4-ին, իսկ Թևանյանը օգոստոսի 6-ին։
Թևանյանը կլինի մեր օլիմպիական հավաքականի վերջին մասնակիցը։ Ընդհանուր առմամբ մինչ օրս մեր հավաքականի ելույթը Օլիմպիադայում կարելի է համարել բավարար։ Փոքր-ինչ հիասթափեցրին Ֆերդինանդ Կարապետյանն ու Կորյուն Սողոմոնյանը։ Փոխարենը փայլուն ելույթներով աչքի ընկան Արթուր Դավթյանը, Հովհաննես Բաչկովը և Արման Դարչինյանը։
