Առաջիկա օրերին հայկական ֆուտբոլում տեղի կունենա ևս մեկ նշանակալի իրադարձություն։ Մեր հավաքականի և ղազախական «Աստանայի» պաշտպան Վարազդատ Հարոյանը պայմանագիր կկնքի Իսպանիայի Լա լիգան ներկայացնող «Կադիսի» հետ։ Իսպանական մամուլում տարածված տեղեկության համաձայն, կողմերն արդեն իսկ համաձայնության են եկել և գործարքը արդեն իսկ կարելի է կայացած համարել։ Իսպանիայի առաջնության ավարտին մնացել է երկու տուր, որից հետո «Կադիսը» պաշտոնապես կհայտարարի Հարոյանի տրանսֆերի մասին։ «Ունենք նոր ֆուտբոլիստ, որի հետ պայմանագիր ենք կնքել հաջորդ մրցաշրջանի համար: Վստահ եմ, որ նա կուժեղացնի մեր թիմը։ Այս պահին սակայն դեռ չեմ կարող նշել նրա անունը: Կասեմ միայն, որ նա պաշտպան է»,- Marca-ի թղթակցի հետ զրույցում ասել է «Կադիսի» նախագահ Մանուել Վիսկանոն։ Վերջինս նշել է նաև, որ նոր ֆուտբոլիստը ելույթ չի ունեցել իսպանական Լա լիգայում։ Վարազդատ Հարոյանը «Աստանա» էր տեղափոխվել այս տարվա փետրվարին:
Պայմանագիրը ղազախական ակումբի հետ նախատեսված է մինչև 2021 թվականի ավարտը: 28-ամյա Հարոյանը «Աստանայի» կազմում անց է կացրել 10 հանդիպում դառնալով մեկ գոլային փոխանցման հեղինակ։ Հարոյանի «Կադիս» տեղափոխվելու դեպքում Հայաստանի ազգային հավաքականը Եվրոպական թոփ 5 առաջնություններից արդեն 3-ում կունենա ներկայացուցիչ։ Ի դեմս Հենրիխ Մխիթարյանի մենք ֆոււտբոլիստ ունենք Իտալիայի Ա սերիայում, իսկ մեր հավաքականի հարձակվող Սարգիս Ադամյանը ելույթ է ունենում գերմանական Բունդեսլիգայում։ Իսկ ո՞վ է կանգնած Հարոյանի Իսպանիայի տեղափոխվելու հետևում։ ««Կադիս»-ի նախագահը հաստատեց, որ ակումբը համալրվելու է պաշտպանով, որը հանդես չի եկել Իսպանիայում: Խոսվում էր մի քանի ֆուտբոլիստների մասին, բայց երեկ նրա անունը հայտնի դարձավ։ Նա Վարազդատ Հարոյանն է Հայաստանից։ Ի դեպ, Հայաստանի ազգային հավաքականը մարզում է Խոակին Կապառոսը, ով Մանուել Վիսկանոյի մտերիմ ընկերն է։ Դժվար չէ ենթադրել, որ այս հանգամանքը կարող էր նպաստել Հարոյանի վերաբերյալ հարցումներ և տեղեկություններ տեղադրելու հարցում»- գրում է իսպանական Portal Cadista պարբերականը։ Վերջին զարգացումներից պարզ է դառնում, որ Հայաստանի ազգային հավաքականի գլխավոր մարզիչը օգտագործելով իր կապերը ջանքեր է գործադրում հայ ֆուտբոլիստներին բարձրակարգ ակումբներ տեղափոխելու համար։ Ավելի վաղ տեղեկություն էր տարածվել, որ Հայաստանի հավաքականի նորեկ, Երևանի ԲԿՄԱ-ի կիսապաշտպան Ժիրայր Շաղոյանը հայտնվել է իսպանական «Սևիլիայի» դիտակետում։ Ինչևէ, փորձենք հասկանալ ինչ է իրենից ներկայացնում «Կադիսը» և ինչ պոտենցիալ ունի այս ակումբը։
Իսպանիայի ավարտվող առաջնությունում «Կադիսը» 43 միավորով 12-րդ հորիզոնականում է և գալիք մրցաշրջանում ապահովագրել է մասնակցությունը Իսպանիայի բարձրագույն լիգայում։ Նշենք, որ «Կադիսը» Լա լիգայի 20 ակումբներից ամենահամեստ ֆինանսական ռեսուրսն ունի։ Մասնավորապես, այս թիմի ֆուտբոլիստների տրանսֆերային ընդհանուր արժեքը կազմում է ընդամենը 38․7 միլիոն եվրո։ Համեմատության կարգով նշենք, որ Իսպանիայի ամենաթանկ ակումբի՝ «Բարսելոնայի» տրանսֆերային ընդհանուր արժեքը կազմում է 823 միլիոն եվրո։ «Կադիսի» ամենաթանակ ֆուտբոլիստը 28-ամյա կիսապաշտպան Ալեքս Ֆերնանդեսն է, որի տրանֆսերը գնահատված է 7 միլիոն եվրոյով։ Ամենացածր տրանսֆերային արժեքն ունի դարպասապահ Դավիդ Գիլը՝ 400 հազար եվրո։ Այս պահին թիմում ընդգրկված են 10 լեգեոներներ, որոնցից 3-ը ելույթ են ունենում իրենց երկրների ազգային հավաքականերում։ 1977-1993 թվականները «Կադիսը» ելութ է ունեցել «Լա լիգայում», այնուհետև տևական ժամաակ կորցրել տեղի Իսպանիայի բարձրագույն դիվիզիոնում։ 2005/2006 թթ մրցաշրջանում «Կադիսը» վերադարձել է Լա լիգա, սակայն անհաջողության մատնվել։
Նախորդ մրցաշրջանում նվաճելով Լա լիգայի ուղեգիր, «Կադիսը» հաջող ելութ ունեցավ՝ պահպանելով իր դիրքը։ Ինչևէ, Հարոյանի ներկայիս ակումբը՝ «Աստանայի» տրանսֆերային ընդհանուր արժեքտ կազմում է 16․4 միլիոն եվրո։ Հարոյանի տրանսֆերային արժեքն էլ գնահատված է 800 հազար եվրոյով։ Հայաստանի ազգային հավաքականի կազմում Հարոյանն անց է կացրել 58 հանդիպում և դարձել 3 գոլի հեղինակ։ Վերջին հաղթական հանդիպումներում Հարոյանը կրել է մեր ազգային թիմի թևկապը։
