Կապանի «Գանձասարը» կշարունակի մասնակցել ֆուտբոլի Հայաստանի բարձրագույն խմբի առաջնությանը. ՀՖՖ նախագահ Ռուբեն Հայրապետյանը որոշեց պայմանական պատիժ սահմանել Կապանի ակումբի համար:
Հիշեցնենք, որ ՀՖՖ կարգապահական կոմիտեն «Փյունիկ»-ի հետ խաղից հետո որոշել էր, որ «Գանձասար»-ը 5 հանդիպում պետք է անցկացներ առանց հանդիսականների։ Որին հետևել էր «Գանձասար» Ֆ/Ա-ի նախագահ, ԶՊՄԿ-ի գլխավոր տնօրեն Մաքսիմ Հակոբյանի հայտարարությունը, թե թիմը դուրս է կգա առաջնությունից, եթե ՀՖՖ-ն չվերանայի որոշումը։ Նշենք, որ խաղադաշտ էր նետվել մի պոլիէթիլենային շիշ ու երկրպագուները դժգոհ լինելով մրցավարների գործողություններից` հայհոյել էին վերջիններին։
Ռուբեն Հայրապետյանի խոսքով` չի կարելի հայհոյել խաղադաշտում. հետո տեսագրությունները նայում են։ «Ես ուզում եմ բոլոր խաղերը եթեր տալ։ Բա որ Կապանում լինի, ո՞նց ենք անելու: Մրցավար եմ նշանակում, Կապան չեն գալիս»,- ասաց ՀՖՖ նախագահը։ «Սխալ դատող մրցավարները պատժվում են, դրա համար կարգ կա։ Ես թույլ չեմ տա որևէ մեկին «սամասուդ» անել»,- ասաց նա՝ հավելելով, որ ինքը «շանտաժներից» չի վախենում։ Կապանցի երկրպագուները առաջարկեցին կին մրցավարներ ուղարկել Կապան, իսկ քաղաքապետ Արթուր Աթայանը ՀՖՖ-ի այդ քայլը «դաժան որոշում» համարեց։ Երկրպագուներից մեկն էլ առաջարկեց մարզադաշտ գնալ կանանց հետ, որպեսզի նման բան չկրկնվի։
Վատ սցենարով հեռուստասերիալի վերջին սերիա հիշեցնող այս հանդիպումն ավարտվեց Ռուբեն Հայրապետյանի հուզիչ խոսքով.
«Ճիշտն ասած, ճանապարհին գալիս մտածում էի ու արդեն վճռել էի, որ մեկ խաղից զրկեմ հանդիսականներին, սակայն հիմա հայտարարում եմ՝ փոխում եմ նախկին որոշումս և «Գանձասար»-ին պայմանական պատիժ եմ տալիս: Այսինքն անկարգությունը կրկնվելու դեպքում 5 խաղ թիմը կանցկացնի առանց երկրպագուների»:
Բնականաբար, ՀՖՖ նախագահի խոսքին հաջորդեց երկրպագուների բուռն օվացիան:
