2018 թվականը հայկական ֆուտբոլի համար սկսվեց սկանդալով: Հայաստանի ֆուտբոլի ֆեդերացիայի նախագահ Ռուբեն Հայրապետյանը դիմել է իրավապահ մարմիններին՝ կասկածներ ունենալով, որ 2017 թվականի նոյեմբերի 20-ին կայացած Հայաստանի առաջին խմբի 2017/18 մրցաշրջանի «Լոռի»-«Էրեբունի» հանդիպումը, որն ավարտվել է 5։0 հաշվով, պայմանավորված է եղել։ Ավելի ստույգ՝ ՀՖՖ նախագահը հայտնել է, որ հանդիպման՝ պայմանավորված լինելու վերաբերյալ զեկույց է կազմվել ՈՒԵՖԱ-ի կողմից, որում մասնագետները վերլուծության են ենթարկել ամբողջ խաղի ընթացքն ու դրա վրա կատարված խաղադրույքները։ Կան կասկածներ, որ հանդիպման արդյունքի վրա ազդելու նպատակով խաղի կազմակերպիչներին և մասնակիցներին տրվել, իսկ վերջիններիս կողմից ստացվել կամ ընդունվել են կաշառք ստանալու առաջարկներ։ Թե «Լոռի» և թե «Էրեբունի» ակումբները հերքեցին խաղը ծախելու վերաբերյալ մեղադրանքները: Բոլորի համար է պարզ, որ ակումբների ներկայացուցիչները չէին հայտարարելու, որ ծախել են խաղը, ինչը քրեորեն պատժելի արարք է:
Ավելի ուշ հայտարարությամբ հանդես եկավ Հայաստանի ֆուտբոլի ֆեդերացիան: «Ֆուտբոլային հանդիպումների մրցակցային և արդար խաղի սկզբունքի ապահովումն ինչպես միջազգային ֆուտբոլային կառույցների՝ ՈւԵՖԱ-ի, ՖԻՖԱ-ի, այնպես էլ ՀՖՖ-ի որդեգրած քաղաքականության կարևորագույն հենասյուներից մեկն է: Նշված խնդրի դեմ պայքարը շատ կարևոր է ինչպես ֆուտբոլային կառույցների, այնպես էլ ողջ հասարակության համար: Այդ համատեքստում, ինչպես նաև միջազգային կոնվենցիաների և համաձայնագրերի շրջանակներում Հայաստանի ֆուտբոլի ֆեդերացիայի գործառույթներից է նաև ֆուտբոլային հանդիպումների այդ տեսանկյունից վերլուծությունների կատարումը և/կամ միջազգային կառույցների կողմից կատարված վերլուծությունները ՀՀ իրավապահ մարմիններին տրամադրելը»,- մասնավորապես ասված էր հայտարարության մեջ:
Ի՞նչ է իրականում տեղի ունենում Հայաստանի առաջին խմբի առաջնությունում և ընդհանրապես հայկական ֆուտբոլում: Այն մասին, որ Հայաստանի առաջին խմբի առաջնությունում պայմանավորված հանդիպումներ լինում են, խոսվում է վաղուց: Խոսում են հիմնականում խաղադրույք կատարող կամ բուքմեյքերական ընկերությունների հետ կապ ունեցող անձինք: Շատ բուքմեյքերական ընկերություններ պարզապես խաղադրույքներ չեն ընդունում Հայաստանի առաջին խմբի առաջնության հանդիպումների վրա՝ լուրջ կասկածներ ունենալով, որ դրանք «ծախված են»:
Երկրպագուների շարքերում շրջանառվող խոսակցությունների համաձայն՝ Հայաստանի առաջին խմբի առաջնությունում գործում է, այսպես կոչված, «ղումարի» մի համակարգ, որի հիմնադիրը «Արցախ» ակումբի սեփականատեր՝ Չեխիայում բնակվող հայ գործարար Սևան Ասլանյանն է: Խոսվում է, որ ոչ ֆորմալ առումով Ասլանյանին է պատկանում նաև «Էրեբունի» ակումբը:
«Առաջին լրատվական»-ի տեղեկություններով՝ հանդիպման պայմանավորված լինելու վերաբերյալ ՈՒԵՖԱ-ի կողմից զեկույց է կազմվել նաև «Արցախ» ակումբի դեմ: Հաշվի առնելով այս ակումբի անվանումը՝ փորձ է կատարվում այս տեղեկությունը գաղտնի պահել: Իրավիճակն այն աստիճան է ահագնացել, որ ՀՖՖ նախագահը ուղղակի ստիպված է եղել դիմել կտրուկ քայլի՝ իրավիճակը շտկելու համար:
Այս օրերին, երբ հայկական ֆուտբոլը ծանր օրեր է ապրում, ծախված հանդիպումների մասին աղմուկը կարող է ուղղակի կործանարար ազդեցություն ունենալ: Այսօր կան մարդիկ, որոնք ցանկանում են ներդրումներ անել, ակումբներ հիմնել Հայաստանում: Ու հույսի այս ֆոնին՝ խայտառակ մի պատկեր:
Պայմանավորված հանդիպումները կամա թե ակամա ստվեր են գցում նաև այն թիմերի վրա, որոնք կապ չունեն «մախինացիաների» հետ: Նշենք, որ ՈՒԵՖԱ-ի հովանու ներքո գործում են բավական լուրջ կենտրոններ, որոնք հետազոտությունների միջոցով ջրի երես են բերում պայմանավորված խաղերը: Բնական է, որ «Լոռի»-«Էրեբունի» հանդիպման ժամանակ բուքմեյքերական ընկերություններում եղել է խաղադրույքների մեծ և ակնհայտ հոսք: Ու չնայած նրան, որ նշված ակումբները պնդում են, որ խաղացել են արդար, կարծում ենք՝ շատ շուտով ի հայտ կգան և կհրապարակվեն «մախինացիայի» մասնակիցների անունները:
Հայաստանի առաջին խմբի առաջնությունում խաղում են պատանի և երիտասարդ ֆուտբոլիստներ: Ոմանց կեղտոտ խաղերը բնականաբար ազդում են թե՛ նրանց հոգեբանության և թե՛ կարիերայի վրա: Իրավիճակը կարելի է փրկել միայն պայմանավորված խաղերի հեղինակներին, մասնակիցներին խստորեն պատժելով: Իսկ թե իրականում ովքեր են կանգնած արատավոր այս երևույթի հետևում, հուսանք, կպարզեն իրավապահները:
