Ֆուտբոլի Չեմպիոնների լիգայի խաղարկության որակավորման առաջին փուլի առաջին խաղում վաղը Վազգեն Սարգսյանի անվան «Հանրապետական» մարզադաշտում Հայաստանի չեմպիոն «Ալաշկերտը» կրկին կմրցի Անդորրայի չեմպիոն «Սանտա Կոլոմայի» հետ: Նախորդ տարի նույն մրցաշարի առաջին որակավորման փուլում «Ալաշկերտը» ևս մրցել էր անդորրական թիմի հետ: Մրցակցի հարկի տակ ոչ-ոքի 0:0 խաղալուց հետո մեր թիմը «Հանրապետական» մարզադաշտում առավելության էր հասել 3:0 հաշվով:
Միջազգային բուքմեյքերական ընկերությունները վաղը կայանալիք խաղում, կարելի է ասել, վստահ են, որ հայկական թիմը կհաղթի: «Ալաշկերտի» հաղթանակի համար սահմանված է ընդամենը 1.15 գործակից, իսկ ոչ-ոքին գնահատված է 6 գործակցով: «Սանտա Կոլոմայի» հաղթանակի համար էլ բուքմեյքերները սահմանել են 15 գործակից:
Նշենք, որ «Սանտա Կոլոման» Անդորրայի ամենահայտնի ու ամենատիտղոսակիր ակումբն է, որը հիմնադրվել է 1986 թվականին: Պատմության ընթացքում 10 անգամ դարձել է երկրի չեմպիոն, 8 անգամ նվաճել է երկրի գավաթը: «Սանտա Կոլոման» առաջին անդորրական թիմն է, որին հաջողվել է հաղթանակ տանել եվրագավաթներում: Դա տեղի է ունեցել 2007/2008թթ. մրցաշրջանում: ՈՒԵՖԱ-ի գավաթի խաղարկության որակավորման առաջին փուլի տնային խաղում «Սանտա Կոլոման» 1:0 հաշվով հաղթել է Թել-Ավիվի «Մաքաբիին»:
Ի դեպ, «Սանտա Կոլոման» առաջին և միակ անդորրական թիմն է, որին հաջողվել է հաղթահարել Չեմպիոնների լիգայի որակավորման առաջին փուլի արգելքը և պայքարից դուրս թողնել մրցակցին: Դա տեղի է ունեցել 2014/2015թթ. մրցաշրջանում: Չեմպիոնների լիգայի խաղարկության որակավորման առաջին փուլում թիմը հաղթահարել է Հայաստանի չեմպիոն Երևանի «Բանանցի» արգելքը: Սեփական հարկի տակ անդորրացիները հաղթել են 1:0 հաշվով, իսկ Երևանում պարտվել են 3:2 հաշվով: Շնորհիվ մրցակցի դաշտում խփած գոլերի «Սանտա Կոլոման» անցել է հաջորդ փուլ:
Ընդհանուր հաշվով «Սանտա Կոլոման» եվրագավաթներում տարել է երկու հաղթանակ և երեք հանդիպում ավարտել է ոչ-ոքի, մնացած բոլոր խաղերում պարտվել է:
«Ալաշկերտի» հետ հանդիպումից առաջ «Սանտա Կոլոման» ուժեղացրել է կազմը՝ հուս ունենալով կրկնել պատմական հաջողությունն ու պայքարից դուրս թողել հայկական թիմին: Մասնավորապես, անդորրական թիմը համալրել են Կիկե Կուբասը, Խոսե Պեդրոսան և Ժերեմի Լեմպերեն: Մեր նորեկներն ու Անդորրայի չեմպիոնը ավելի քան պատրաստ են Չեմպիոնների լիգայի խաղարկությանը»,- հայտնում է թիմի պաշտոնական կայքը:
Կիկե Կուբասը 28 տարեկան և խաղում է հարձակման կենտրոնում: Նա հիմնականում հանդես է եկել Իսպանիայում: Կուբասը որոշ ժամանակ խաղացել է հայտնի «Սելթայի» երկրորդ թիմում: Կիսապաշտպան Խոսե Պեդրոսան, ով 31 տարեկան է, խաղացել է իսպանական թիմերում: Մասնավորապես, նա ելույթ է ունեցել Մադրիդի «Ատլետիկոյի» երկրորդ թիմում, ինչպես նաև «Ալմեյրայի» Բ թիմում: Կրկին կիսապաշտպանությունում խաղացող Ժերեմի Լեմպերենն էլ ժամանակին խաղացել է իսպանական մեկ այլ թիմում՝ «Տեներիֆեում»:
Երեկ «Ալաշկերտը» ներկայացրել է հայտացուցակը Չեմպիոնների լիգայի խաղարկությանը: Մեր թիմում այս պահին հայտավորված են 6 լեգեոներներ: Նախապատրատվելով Չեմպիոնների լիգայի խաղարկությանը՝ «Ալաշկերտը» ուսումնամարզական հավաք է անցկացրել Մինսկում: Հայաստանի չեմպիոնը, անցկացնելով նաև երկու ընկերական հանդիպում, 2:0 հաշվով հաղթել է Յարոսլավլի «Շիննիկին» և 2:1 հաշով Վլադիվոստոկի «Լուչ-Էներգիային»:
«Ալաշկերտ»-«Սանտա Կոլոմա» հանդիպումը կսկսվի ժամը 20-ին: Ստորև ներկայացնում ենք «Ալաշկերտի» հայտացուցակը առաջիկա խաղին:
Դարպասապահներ. Արսեն Բեգլարյան, Գևորգ Կասպարով:
Պաշտպաններ. Գագիկ Դաղբաշյան, Արարատ Առաքելյան, Վահագն Մինասյան, Դանիել Ստոյկովիչ, Դմիտրի Խովբոշա, Անդրանիկ Ոսկանյան, Մլադեն Զելկովիչ, Միլիան Յաբլան:
Կիսապաշտպաններ. Խորեն Վերանյան, Արտակ Գրիգորյան, Արտակ Եդիգարյան, Արթուր Եդիգարյան, Արտակ Դաշյան, Զավեն Բադոյան:
Հարձակվողներ. Ուրոշ Նենադովիչ, Միհրան Մանասյան, Լեստեր Պելտիեր, Գևորգ Նռանյան: