Հայաստանի ազգային հավաքականի հարձակվող Յուրա Մովսիսյանը Чемпионата-ի հետ զրույցում նշել է, որ նախորդ մրցաշրջանն ամենադժվարն է եղել իր մարզական կարիերայում: 2014թ. հուլիսին Մովսիսյանը ենթածնկային հոդի վնասվածք էր ստացել ու շարք վերադարձել միայն տարեվերջին:
«Նախորդ մրցաշրջանն ամենադժվարն էր իմ մարզական կարիերայում: Մրցաշրջանի մեկնարկում վնասվածքը, թիմի արդյունքը… այդ ամենը հաղթահարելն ավելի դժվար դարձավ, երբ մրցաշրջանի վերջնամասում նորից լիովին պատրաստ չէի: Խաղում էի հնարավորություններիս 50 տոկոսով: Այդ ամենն ինձ շատ էր տխրեցնում:
Վերականգնման գործընթացն ու մարզավիճակի ձեռքբերումը նույնպես ճնշում էին հոգեբանորեն: Ես այն ֆուտբոլիստներից չեմ, ով կարող է հանգիստ նստել պահեստայինների նստարանին կամ խաղին հետևել տրիբունայից: Ցանկանում եմ միշտ պայքարի թոհուբոհում լինել, ներդնել ողջ ուժերս:
Այդ ամենն արդեն անցյալում է: Հիմա շատ լավ եմ զգում ինձ, ծունկս չի անհանգստացնում: Պետք է բարելավել ֆիզիկական վիճակը, ձեռք բերել լավ մարզավիճակ: Վստահ եմ՝ շուտով լիովին պատրաստ կլինեմ»,- հայտարարել է Մովսիսյանը: