Հայաստանի արտգործնախարարը հանգստյան օրերին աշխատանքային այց է իրականացրել Կատարի պետություն, որտեղ հանդիպել է իր գործընկերոջը, ով նաեւ Կատարի վարչապպետն է: Արտգործնախարար Միրզոյանի այցն ուշագրավ է մի իրադարձության ֆոնին, որին անդրադարձա նախորդ շաբաթավերջին: Խոսքը Կատարի, ԱՄԷ, Թուրքիայի ու Իրաքի միջեւ քառակողմ համաձայնագրի մասին է, որն ըստ էության Արեւելք-Արեւմուտք լոգիստիկ մեծ ծրագրի մասին է:
Դրա համար կողմերը Իրաքում կներդնեն միլիարդավոր դոլարներ: Հայաստանի արտգործնախարարը Կատարի արտգործնախարարի հետ խոսել է Խաղաղության խաչմերուկի մասին: Սա իհարկե հայկական դիվանագիտության այսպես ասած նոր ստանդարտ է, սրա մասին խոսվում է ամենուր, սակայն պետք է հասկանալ, թե որտեղ ինչ առարկայություն է շոշափվում: Սակայն, մեծ հավանականությամբ հենց այս հարցն է եղել կատարյա այցի օրակարգային առանցքում, հաշվի առնելով Իրաքի հարցում քառակողմ համաձայնությունը:
Վերստին ուշադրոության արժանացնեմ հանգամանքը, որ փետրվարին Մյունխենի անվտանգության համաժողովում տեղի ունեցավ Հայաստանի եւ Իրաքի վարչապետների հանդիպում, իսկ մարտին էլ Իրաք պաշտոնական այց կատարեց Հայաստանի նախագահը: Արդյո՞ք այդ շփումների ընթացքում Երեւանն իրազեկվել է առկա տրամադրությունների առնչությամբ, թե՞ դրանք ավելի առարկայական դարձան օրեր առաջ Թուրքիայի նախագահի Իրաք կատարած այցից հետո, բարդ է ասել, բայց կարծես թե նկատելի է, որ Երեւանը փորձում է ինչ որ կերպ հաղորդակից լինել «իրաքյան խաչմերուկին»՝ քառակողմ համաձայնությանը:
Թերեւս պետք չէ բացառել նաեւ հանգամանքը, որ Երեւանն այդ կերպ փորձում է ձեւավորել Թուրքիայի հետ հարաբերության ուղղությամբ աշխատանքային նոր «գիծ», որը թույլ կտա հնարավորինս բազմազանեցնելով այդ միջավայրն ու «խողովակները», ստանալ ավելի մեծ շարժունակություն ու ճկունություն:
