Ճապոնացի թեթևատլետուհի Մայա Նականիսին, որը երիտասարդ տարիքում զրկվել է աջ ոտքից, երազում է դարձյալ հայտնվել Պարալիմպիական խաղերում: 2008 թ. նա իր երկիրը ներկայացրել է Պեկինի խաղերում 200 մետր վազք և ցատկ մարզաձևերում: Ճապոնուհին երազում է նաև մասնակցել Լոնդոնի Օլիմպիական խաղերին, սակայն դրա համար նա միջոցներ չունի:
Գումար հավաքելու համար Մայան օրացույց է թողարկել, որի համար ինքն է մերկ լուսանկարվել: Ճապոնական մամուլը նրա որոշումը խիզախ քայլ է համարել, չնայած ոմանց համար դա կարող է դիտվել որպես հուսահատ քայլ:
Ինքը՝ Նականիսին, նորմալ է համարում, որ միջոցներ հավաքելու համար ստիպված է եղել մերկանալ: «Ես ուրախ եմ, որ կարող եմ ինձ ցույց տալ այնպես, ինչպես որ կամ»,- ասել է նա իր հարցազրույցներից մեկում:
Մայան ոտքից զրկվել է 21 տարեկանում ստացած վնասվածքի պատճառով, երբ նրա վրա մետաղական հեծան է ընկել: Նրա ոտքը ծնկից ներքև հեռացվել է, այժմ նա թանկարժեք պրոթեզ է օգտագործում՝ մրցույթին մասնակցելու համար:
Լոնդոնի Օլիմպիական խաղերին մասնակցելու համար մարզուհուն անհրաժեշտ է ոչ միայն այնտեղ մեկնելու գումար, այլև նոր պրոթեզ:
