Մոսկվայում տեղի ունեցած ազգային օլիմպիական կոմիտեների համաժողովում Տոկիոյի և Մադրիդի ներկայացուցիչները ներկայացրել են 2020 թվականի Օլիմպիական խաղերի մայրաքաղաքի համար ընդունվող հայտերը:
Մասնագետների կարծիքով` հենց այս երկու քաղաքները կլինեն 2020 թվականի Օլիմպիական խաղերի մայրաքաղաքի գլխավոր հավակնորդները:
Տոկիոյի յուրահատկությունն այն է, որ Ճապոնիան ունի հզոր տնտեսություն, իսկ քաղաքում զարգացած են բոլոր համակարգերը: Քաղաքի ներկայացուցիչները ցանկանում են Օլիմպիական խաղերն անցկացնել այնպիսի մակարդակով, որ հիշվեն տասնյակ տարիներով:
Մադրիդը հայտ էր ներկայացրել նաև 2012 և 2016 թվականներին անցկացվելիք Օլիմպիական խաղերի մայրաքաղաք դառնալու համար, սակայն երկու դեպքում էլ հաջողության չհասավ: 2012 թվականի հայտում զիջեց Լոնդոնին, իսկ 2016 թվականին` Ռիո դե Ժանեյրոյին:
Տարբեր տարիների Մադրիդում անցկացվել է աշխարհի 77 և Եվրոպայի 85 առաջնություններ բազմապիսի սպորտաձևերից:
2020 թվականի Օլիմպիական խաղերի մայրաքաղաքի հայտ են ներկայացրել նաև Ստամբուլը, Դոհան և Բաքուն:
Հիշեցնենք, որ հայտերի ընդունումից հետո ՄՕԿ-ը կքննարկի դրանք, ներկայացուցիչները կմեկնեն այդ քաղաքներ, իսկ 2013 թվականին Բուենոս Այրեսում կայանալիք ՄՕԿ-ի 125-րդ համագումարին կընտրվի 2020 թվականի Օլիմպիական խաղերի մայրաքաղաքը:
