Չորս քաշային կարգերում աշխարհի նախկին չեմպիոն Ռոյ Ջոնսը (55-8-0) հայտարարել է, որ պատրաստ է մենամարտել առաջին ծանր քաշային կարգում հանդես եկող կանադացի բռնցքամարտիկ Բոբբի Գաննի (21-4-1) հետ, եթե հնարավոր չլինի մենամարտեր կազմակերպել գերծանր քաշային կարգում WBA վարկածով աշխարհի նախկին չեմպիոն Դեյվիդ Հեյի (25-2-0) կամ առաջին ծանր քաշային կարգում WBC վարկածով աշխարհի չեմպիոն Քշիշտոֆ Վլոդարչիկի (46-2-1) հետ:
«Առաջին հերթին ցանկանում եմ շնորհակալություն հայտնել Գաննին` իմ ծննդյան օրը շնորհավորելու համար: Եթե ես չկարողանամ կազմակերպել ինձ համար ցանկալի հանդիպումները, ապա կընդունեմ Բոբբիի մարտահրավերը և կմենամարտեմ իր հետ: Լսել եմ, որ Հեյը ցանկանում է ռինգ վերադառնալ, այդ պատճառով ինձ համար առաջնայինը նրա հետ հանդիպումն է կամ չեմպիոնի կոչման համար մենամարտը` Քշիշտոֆ Վլոդարչիկի հետ: Բայց եթե այս հակամարտություններն ինձ համար անհնարին լինեն, ես պատրաստ եմ մենամարտել Գաննի հետ»,- Ջոնսին մեջբերում է Boxingnews-ը: