Ֆուտբոլի Հայաստանի ազգային հավաքականը երկրորդ անընդմեջ հաղթանակը տարավ 2024 թվականի Եվրոպայի առաջնության ընտրական փուլում, «Հանրապետական» մարզադաշտում 2։1 հաշվով առավելության հասնելով Լատվիայի նկատմամբ։ Հունիսի 16-ին Քարդիֆում Ուելսին հաղթելուց հետո թվում էր թե մեր ֆուտբոլիստները Երևանում առանց դժավորությունների կհաղթեն նաև ենթախմբի ետնապահ լատվիացիներին, բայց․․․։ Հանդիպումը բավական դժվար ընթացք ունեցավ, թեև Հայաստանի հավաքականը ցուցադրեց լավ ֆուտբոլ՝ ունենալով տոտալ առավելություն։ Մրցակիցը խաղալով երկշերտ պաշտպանությամբ փորձում էր հաջողության հասնել հակագրոհների միջոցով։ Լատիացի կենտրոնականները շրջափակման մեջ էին առել մեր հարձակման առաջատար Հրանտ-Լեոն Ռանոսին, որը տարածություն չէր ստանում առաջխաղացման համար։ Լատվիացիների մարտավարությունը սակայն «կարդացել» էր մեր հավաքականի գլխավոր մարզիչ Ալքսանդր Պետրակովը, որի տակտիկական լուծումները դարձան հաղթանակի գլխավոր գրավականը։ Պետրակովը առաջին հերթին լուծել էր առաջին համարով խաղալու խնդիրը։ Վերջին տարիներին Հայաստանի ազգային թիմը լուրջ դժվարությունների առաջ էր կանգնում խաղալով սեփական հարկի տակ կարգով ավելի թույլ մրցակիցների դեմ։
Չմոռանանք նախորդ ընտրական շրջափուլի Երևանում տեղի ունեցած Լիխտենշտեյնի դեմ մրցավեճը։ Ունենալով մեծ առավելություն Հայաստանի հավաքականը ոչ-ոքի 1։1 խաղաց կորցնելով կարևոր երկու միավոր։ Երեկվա խաղում մերոնք ունեին մրցակցի դարպասին հասնելու մի քանի մշակված տարբերակներ։ Վերահսկելով գնդակը, արագ խաղարկումների միջոցով մեր ֆուտբոլիստները խառնաշփոթ էին առաջացնում մրցակցի պաշտպանությունում։ Բավական սուր էին նաև Արտակ Դաշյանի և Նաիր Տիկնիզյանի ճեղքումները եզրերից։ Այո երկրորդ կեսում ունեցանք խնդիրներ և թվում էր թե Հայաստանի հավաքականի խաղային սխեման փլուզվում է։ Շատերը կհամաձայնվեն, որ մեկ գոլ կարող է խփել ցանկացած թիմ, ցանկացած մրցավեճում։ Լատվիայի խփած գնդակը պատահականության արդյունքում չէր։ Բավական բարդ իրավիճակում Պետրակովը թիրախային հարված հասցրեց Լատվիայի հավաքականի թերևս ամենաթույլ օղակին։ Խաղադաշտ դուրս բերելով արագաշարժ Տիգրան Բարսեղյանին և Արթուր Սերոբյանին ուկրաինացի մասնագետը կազմաքանդեց մրցակցի պաշտպանության աջ եզրը Այս եզրով մեկը մյուսին հաջորդած սուր գրոհները հանգեցրին 11 մետրանոցի։ Չմոռանանք, որ առաջին գոլը Տիկնիզյանը խփել էր Դաշյանի աջ եզրից կատարած փոխանցումից։ Այո Հայաստանի հավաքականում նկատվեց հոգնածություն։ Ուելսի դեմ ֆանտաստիկ խաղից հետո որոշ ֆուտբոլիստներ ֆունկցիոնալ առումով խնդիրներ ունեցան։ Ցավոք մեր հավաքականի պատեստայինների նստարանը կարճ է և մի շարք դիրքերում Պետրակովը համարժեք փոփոխությունների հնարավորություն չունի։
Հանդիպման վերջին րոպեներին հոգնածություն էր նկատվում նույն Նաիր Տիկինզյանի մոտ, որը երեկ լավագույնն էր խաղադաշտում։ Վերջին երկու հանդիպումներում այս ֆուտբոլիստն ուղղակի տիտանական աշխատանք կատարեց։ «Շատ բարդ խաղ էր տղաների համար: Ռոտացիայի մեծ հնարավորություն չունեինք, մրցակիցը՝ նույնպես: Մեկնակային կազմում երկու փոփոխություն էինք արել: Փառք ու պատիվ ֆուտբոլիստներին, որ կարողացան կամային հատկանիշների հաշվին հաղթանակ տանել։ Գոհ եմ փոխարինման մտած ֆուտբոլիստներից, նրանք թարմություն մտցրին: Բոլոր խաղացողները մեծ նվիրվածություն ցուցաբերեցին, նրանցից շատերն այնքան հոգնած են, որ նույնիսկ չեն կարողանում քայլել: Չեմ ցանկանում խոսել խմբից դուրս գալու մասին: Ամբողջ ուժերը կներդնենք այդ նպատակին հասնելու համար, սակայն նախապես խոսել պետք չէ: Յուրաքանչյուր խաղում կխաղանք մեծ նվիրումով։ Շատ ենք ցանկանում հայտնվել Եվրո-2024-ի եզրափակիչ փուլում և ուղևորվել Գերմանիա:
Լուկաս Սելարայանը խաղում է ՄԼՍ-ում, որտեղ այդքան էլ ինտենսիվ ֆուտբոլ չէ, սակայն նա մեծ ծավալի աշխատանք կատարեց՝ ցուցադրելով հիանալի խաղ: Ռանոսն այնքան տպավորիչ չէր, որքան Ուելսի հետ հանդիպմանը, բայց նա երիտասարդ հարձակվող է, իսկ երիտասարդներին բնորոշ է անկայուն խաղը: Բացի այդ էլ Լատվիան պաշտպանվում էր մեծ ուժերով ու ազատ տարածություններ չէր տալիս: Օգնեն Չանչարևիչը մեղք չուներ բաց թողած գոլի դրվագում, քանի որ անդրադարձ կար Ստյոպա Մկրտչյանից: Մեր դարպասապահը բավական լավ խաղ ցուցադրեց Ուելսի և Լատվիայի դեմ խաղերում: Մեծ շնորհակալություն եմ ուզում հայտնել երկրպագուներին, որոնք առաջ էին մղում թիմին. այս հաղթանակը նաև նրանց շնորհիվ է»,- խաղից հետո ասաց Պետրակովը։
Ինչևէ, այս հաղթանակի շնորհիվ Հայաստանի հավաքականը 6 միավորով ենթախմբում բարձրացավ երկրորդ հորիզոնական։ Առաջին տեղում Թուրքիան է 9 միավորով։ Թուրքերը երեկ սեփական հարկի տակ 2։0 հաշվով հաղթեցին Ուելսին։ Խորվաթիան և Ուելսն ունեն 4-ական միավոր, իսկ Լատվիային դեռևս չի հաջողվել միավոր վաստակել։