Ֆուտբոլի Հայաստանի հավաքականի և «Կրասնոդարի» կիսապաշտպան Էդուարդ Սպերցյանը ճանաչվել է Ռուսաստանի Ազգային լիգայի 2020/21 մրցաշրջանի լավագույն երիտասարդ ֆուտբոլիստ։ Քվեարկությանը մասնակցել են առաջնության բոլոր թիմերի գլխավոր մարզիչներն ու ավագները։ 2020/21 մրցաշրջանում Հայաստանի ազգային հավաքականի կիսապաշտպանը խփել էր 16 գոլ և դարձել 4 գոլային փոխանցման հեղինակ։ Ընթացիկ մրցաշրջանում Սպերցյանը տպավորիչ ելույթով աչքի է ընկնում Ռուսաստանի Պրեմիեր լիգայում։ Անցկացնելով 14 հադիպում հայ կիսապաշտպանը դարձել է 3 գոլի և նույնքան գոլային փոխանցման հեղինակ։ «Էդիկն այն բացառիկ տղաներից է, որը համբերատար սպասեց իր հնարավորությանը և օգտագործեց այն։ Այսօր նա կարող է 4-5 ամուր պաշտպանների միջով քամու պես անցնել։ Նա իրական պրոֆեսիոնալ է և արժանիորեն իր տեղն է վաստակել «Կրասնոդարի» հիմնական թիմում»,- «Քոմմենթ շոու» յութբյան ալիքին տված հարցազրույցում ասել էր հայկական «Կրասնոդարի» սեփականատեր Սերգեյ Գալիցկին։ Վերջին ամիսներին ռուսական մամուլում քննադատության էր ենթարկվել Ռուսաստանի ազգային հավաքականի մարզչական շտամբ ինչպես նաև ՌԴ ֆուտբոլի միության ղեկավար կազմը Սպերցյանին այսպես ասած աչքաթող անելու համար։
Մասնավորապես, փայլուն ելույթներից հետո ռուսներն ափսոսում են, որ Սպերցյանը Ռուսաստանի հավաքականի փոխարեն խաղում է Հայաստանի ազգային թիմում։ Պրեմիեր լիգայի 8-րդ տուրի «Ախմատի» հետ հանդիպումից հետո, Սպերցյանի ելույթին անդրադարձել էր Sportbox պարբերականը մասնավորապես գրելով․ «Գրոզնիում տեղի ունեցած խաղում գլխավոր դերակատարը հայ կիսապաշտպանն էր։ 21-ամյա Սպերցյանը հյուրերի երկու գոլային գրոհների ամենակարևոր մասնակիցն էր։ Առաջին դրվագում նա այնպիսի հնարք կատարեց, որ անգամ ամենահամարձակները կդժվարանան դա անել։ Այնուհետև երկրորդ գոլի ժամանակ ձախ եզրում հրաշալի ճեղքում իրականացրեց։ Մեզ մնում է միայն ափսոսալ, որ նա այլևս չի կարողանա խաղալ Ռուսաստանի հավաքականում»։ Սեպտեմբերի 18-ին տեղի ունեցած Ռուսաստանի Պրեմիեր լիգայի 8-րդ տուրում Սպերցյանը Գրազնիում գրավել էր «Ախմատի» դարպասը, իր առաջին գոլը խփելով Ռուսաստանի Պրեմիեր լիգայում։ Հայ ֆուտբոլիստը գերազանց խաղեր էր ցուցադրել նաև 9-րդ տուրում «Սոչիի» դեմ մրցավեճում, որն ավարտվել էր 3։0 հաշվով հօգուտ «Կրասնոդարի»։ Արդեն 3-րդ րոպեին Սպերցյանը տպավորիչ անցումով ճեղքելով պաշտպանությունը` բացել էր հանդիպման հաշիվը։ 63-րդ րոպեին էլ Սպերցյանի ճեղքումը «Սոչիի» պաշտպանները կասեցրին 11 մետրանոց հարվածի գնով։ «Ուղղակի ապշել կարելի է, ինչպես է 21-ամյա Սպերցյանը ծանր իրավիճակում իր վրա վերցնում խաղն ու նման անցումներ կատարում։ Դա կարող էր անել փորձառու թիմի ավագ, բայց հայ երիտասարդը ցուցաբերելով մարզական «պնդերեսություն» ուղղակի ֆանտաստիկ ֆուտբոլ է ցուցադրում»,- խոսելով Սպերցյանի խաղի մասին ասել էր հանդիպմանը մեկնաբանը։
Չենք ցանկանում ժամանակից առաջ ընկնել, բայց այս ոգով շարունակելու դեպքում Սպերցյանը կարող է իր խոսքն ասել եվրոպական ֆուտբոլի անհամեմատ ավելի բարձր հարթակներում։ Օրեր առաջ ռուսական մամուլում տեղեկություն տարածվեց, որ Էդուարդ Սպերցյանը հնարավոր է կարիերան շարունակի Սանկտ Պետերբուրգի «Զենիթում»։ Նշվում է, որ «Զենիթի» գլխավոր մարզիչ Սերգեյ Սեմակը մեծ ցանկություն ունի հայ ֆուտբոլիստի հետ աշխատելու։ Նշվում է նաև, որ «Զենիթը» պաշտոնակապես հարցում է ուղարկել «Կրասնոդարին» բանակցություններ սկսելու նպատակով։ Այս պահին դժվար է ասել, թե ինչ որոշում կկայացնի հայ կիսապաշտպանը։ Սպերցյանը դարձել է «Կրասնոդարի» առանցքային խաղացողներից մեկը և ունի բոլոր հնարավորությունները մոտ ապագայում ավելի բարձրակարգ առաջնությունում հանդես գալու։ Սպերցյանը ռուսական ֆուտբոլում հայտնի դարձավ այս տարվա սկզբին և որոշում կայացրեց խաղալու Հայաստանի ազգային հավաքականում։
Մարտին կայացած իր նորամուտի խաղում փոխարինման դուրս գալով Սպերցյանը գրավել էր Ռումինիայի հավաքականի դարպասը և վաստակել 11 մետրանոց հարված։
