Եվրո-2020-ում երեկ կայացան D խմբի վերջին տուրի հանդիպումները:Խորվաթիայի ընտրանին, որը դեռևս պահպանում էր հաջորդ փուլ դուրս գալու շանսերը, մրցեց Շոտլանդիայի հետ և առավելության հասավ 3:1 հաշվով: Լոնդոնում Անգլիայի ընտրանին ուժերը չափեց Չեխիայի հավաքականի հետ և առավելության հասավ նվազագույն հաշվով: 12-րդ րոպեին Ստերլինգի միակ գնդակը հաղթական էր անգլիացիների համար:D խմբից առաջին տեղով 1/8 եզրափակիչ դուրս եկավ Անգլիայի ընտրանին: Երկրորդ տեղը զբաղեցրեց Խորվաթիայի ընտրանին, նույնքան միավոր ունի նաև Չեխիան, սակայն խփած և բաց թողած գնդակների տարբերությամբ հաջորդ փուլի ուղեգիր նվաճեց Խորվաթիան: Շոտլանդիան 1 միավորով վերջինն է: Այո մրցաշարի ֆավորիտների շարքում դասվող Անգլիան հաղթող դարձավ ենթախմբում, բայց․․․։ Այս հավաքականը գրանցեց մի քանի ցուցանիշ, որոնք ինչ-որ տեղ նաև պարադոքսալ են։ Նախ Անգլիայի հավաքականը Եվրոպայի առաջնության պատմության ամենաանարդյունավետ թիմն է, որը խմբային փուլի արգելքը հաղթահարում է առաջին տեղով: Մասնավորապես Խմբային փուլի 3 տուրերում Գարեթ Սաութգեյթի գլխավորած թիմը խփել է ընդամենը 2 գոլ: Հիշեցնենք, որ առաջին տուրում այս հավաքականը 1։0 հաշվով հաղթել էր Խորվաթիային, այնուհետև ոչ-ոքի 0։0 խաղացել Շոտլանդիայի հետ։
Եվ մեկ ուշագրավ վիճակագրություն։ Երեկվա հանդիպումից առաջ Անգլիայի հավաքականի հարձակման առաջատար Հարի Քեյնը մասնակցել էր Խորվաթիայի և Շոտլանդիայի հետ հանդիսպումներին, սակայն լինելով կենտրոնական հարձակվող՝ ոչ մի հարված չէր կատարել մրցակցի դարպասին խաղադաշտում անցկացրած ընդհանուր 156 րոպեի ընթացքում: Առաջին տուրի շրջանակում Խորվաթիայի հավաքականի դեմ խաղին Քեյնը խաղադաշտում անցկացրել էր 82 րոպե:Այս երկու հանդիպումների ընթացքում Քեյնը մրցակցի դարպասի ուղղությամբ կատարել էր 3 հարված, որոնցից մեկը՝ խորվաթների, երկուսը՝ շոտլանդացիների դեմ խաղում: Վիճակագրությունն ինչ խոսք մտահոգիչ է։ Նշենք նաև, որ Անգլիան գրավիչ ֆուտբոլ չէր ցուցադրել նաև Խորվաթիայի և Շոտլանդիայի դեմ մրցավեճերում։ Զարմանալի է թերևս, որ բուքմեյքերներն այս հավաքականին դասում են մրցաշարի հաղթողի հիմնական հավակնորդների թվում։ Կարծում ենք ակնհայտ է, որ Անգլիայի հավաքականում կան խնդիրներ, որոնք հնարավոր չի լինի շտկել ընթացիկ մրցաշարի ընթացքում։ Վերլուծելով առաջատարների մինչ այս անցկացրած հանդիպումները կարող ենք ասել, որ կան երկու հավաքականներ որոնք 100 տոկոսանոց արդյունք գրանցելուց զատ աչքի ընկան նաև որակյալ խաղով։ Խոսքը վերաբերվում է Իտալիային և Բելգիային։ Ի տարբերություն բելգիացիների, իտալացիներն այս առաջնությունում ընդհանրապես գնդակ չեն ընդունել։ Բելգիան բաց է թողել մեկ գնդակ երկրորդ տուրի Դանիայի հետ մրցավեճում։
Ինչ-խոսք Բելգիան ունի նաև ավելի ուժեղ կազմ, բայց իտալացիները ապավինելով թիմային խաղին, կարծում ենք տակտիկական առումով առավելություն ունեն։ Բելիգիայում որոշակի խնդիրներ նկատվում են գրոհների զարգացման ժամանակ։ Ավելի ստույգ խաղը կառուցվում է մասնավորապես կենտրոնական հարձակվող Ռոմելու Լուկակուի միջոցով։ Այո, Լուկակուն այս առաջնության լավագույն հարձակվողներից է և հասցրել է արդեն խփել երեք գնդակ։ Մրցակցի պաշտպանների կողմից նրանց չեզոքացնելու պարագայում սակայն կարծում ենք Բելգիան խնդիրներ կունենա։ Որոշակի վերապահումով կարող ենք ասել, որ այս առաջնությունում անթերի ֆուտբոլ է ցուցադրում միայն Իտալիան։ Անդրադառնանք նաև, բուքմեյքերների կողմից գլխավոր ֆավորիտ համարվող Ֆրանսիային։ Այս հավաքականն առաջին տուրում 1։0 հաշվով հաղթեց Գերմանիային։ Հաղթեց ինքնագոլի արդյունքում։ Երկրորդ տուրում ֆրանսիացիները 1։1 խաղացին խմբի ետնապահ Հունգարիայի հետ։ Ստացվում է երկու հանդիպումներում աշխարհի գործող չեմպիոնը դե ֆակտո խփել է ընդամենը մեկ գնդակ։ Հաշվի առնելով, որ այս հավաքականում են խաղում Կիլիան Մբապեի կամ Քարիմ Բենզեմայի պես հարձակվողներ, գրանցված արդյունքն ուղղակի խայտառակ է։ Եվ ընդհանրապես Ֆրանսիան այս առաջնությունում ամենաուժեղ կազմն ունի։ Այսօր ժամը 23-ին Ֆրանսիայի հավաքականը խմբային փուլի վերջին հանդիպումը կանցկացնի մրցելով Եվրոպայի գործող չեմպիոն Պորտուգալիայի հետ։ Վերջինս պարտության դեպքում հնարավոր է դուրս մնա հետագա պայքարից։
Այս խմբում ընդգրկված Գերմանիայի հավաքականն էլ այսօր կմրցի Հունգարիայի հետ։ Երկրորդ տուրում գերմանացիները 4։2 հաշվով առավելության էին հասել պորտուգալացիների նկատմամբ։ Չնայած առաջին տուրում կրած պարտության՝ Գերմանիան մեծ հաշվով ցուցադրում է դինամիկ ֆուտբոլ։ Այո, որոշակի խնդիրներ կան պաշտպանությունում, բայց ընդհանուր առմամբ այս հավաքականին կարելի է դասել հաղթողի կոչման իրական հավակնորդների շարքում։
