Արցախի դեմ Ադրբեջանի սանձազերծած ռազմական ագրեսիայի վերաբերյալ հայտարարությամբ են հանդես եկել գրեթե բոլոր հայտնի հայ մարզիկները։ Ադրբեջանի կողմից Արցախի վրա հարձակմանն անդրադարձել են նաև արտասահմանցի մարզիկները, մասնավորապես հայկական ակումբներում ելույթ ունեցող Սերբիան և Չեռնոգորիան ներկայացնող ֆուտբոլիստները։
Սոցցանցերի իրենց էջում Հայաստանին և Արցախին զորակցելու լուսանկարներով և հայտարարություններով հանդես են եկել «Արարատ-Արմենիայի» սերբ դարպասապահ Ստեֆան Չուպիչը, «Ալաշկերտի» և Չեռնոգորիայի ազգային հավաքականի դարպասապահ Անդրեա Դրագոևիչը և էլի մի քանի ֆուտբոլիստներ։ «Ալաշկերտի» սերբ հարձակվող Ալեքսանդր Գլիշիչն էլ լուսանկար հրապարակելով Հայաստանի և Արցախի դրոշների հետ՝ գրել է. «Սերբերը միշտ ձեր կողքին են, իմ Հայաստան»։
Հայտնի հայ մարզիկներից առավել լայն արձագանք է ստացել Հայաստանի ազգային հավաքականի ավագ Հենրիխ Մխիթարյանի հայտարարությունը։ «Այսօր առավոտյան տեղեկացա Լեռնային Ղարաբաղի ուղղությամբ Ադրբեջանի բանակի լայնածավալ հարձակման մասին, որի հետևանքով թիրախավորվել է խաղաղ բնակչությունը Ստեփանակերտում և այլ բնակավայրերում: Ես կոչ եմ անում միջազգային հանրությանը շտապ ոտքի կանգնել և օգնել դադարեցնել ռազմական գործողություններն ընդդեմ տարածաշրջանի խաղաղության ու անվտանգության: Մենք ունենք մեր Հայրենիքում ապրելու անքակտելի իրավունք: Մեր երեխաներն ունեն խաղաղ ապրելու իրավունք, քան թաքնվելու ապաստարաններում: Ես միշտ կանգնած եմ իմ ազգի կողքին»,- երեկ գրել էր Մխիթարյանը։ Մեր հավաքականի ավագի գրառումը տեղ է գտել իտալական, բրիտանական և միջազգային մի շարք լրատվամիջոցներում։
«Հայաստանի և Արցախի համար այս բախտորոշ պահին մեկ բան կասեմ՝ բոլորս մեկ ենք, բոլորս զինվոր ենք, ու հաղթանակն էլ մերն է լինելու»,- «Ֆեյսբուք»-ի իր էջում գրել էր Օլիմպիական խաղերի Աշխարհի և Եվրոպայի չեմպիոն Արթուր Ալեքսանյանը: Հայտարարությամբ է հանդես եկել աշխարհի մեկ այլ չեմպիոն՝ ծանրորդ Սիմոն Մարտիրոսյանը՝ մասնավորապես ասելով. «Անընդունելի է ադրբեջանցիների կողմից խաղաղ բնակչության հրետակոծումը: Առավել քան վստահ եմ՝ հայ զինվորը իր բազկի ուժը ցույց տվել է և տալու է: Մենք հոգով սահմանին ենք՝ մեր եղբայրների կողքին, մեր ոգին անպարտ է: Հաղթելու ենք»։
Հայկական շախմատի առաջատար Լևոն Արոնյանն իր հերթին Թվիթերի իր էջում գրել է. «Երբ ես փոքր երեխա էի, իմ պապն ասաց, որ մեր նախնիները Լեռնային Ղարաբաղից են։ Իմ առաջին լուրջ մրցույթը հաղթել եմ հրաշալի Ստեփանակերտ քաղաքում։ Մենք ժողովուրդ ենք, որ միշտ հպարտորեն պաշտպանել ենք ինքներս մեզ՝ անցնելով պատմության քառուղիներով։ Այս անգամ ևս հաջողելու ենք։ Վստահ եմ»,- գրել է Արոնյանը:
Արդեն այսօր Ադրբեջանի կողմից սանձազերծված պատերազմին է անդրադարձել ֆուտբոլի Հայաստանի ազգային հավաքականի և ռուսական «Տամբով» թիմի հարձակվող Ալեքսանդր Կարապետյանը: «Ադրբեջանը ռազմական ագրեսիվ օդային ու հրետանային անխնա գրոհներ է սկսել Լեռնային Ղարաբաղի հետ սահմանի ողջ երկայնքով: Հազարավոր քաղաքացիներ հայտնում են, որ գյուղերը, քաղաքներն ու մայրաքաղաք Ստեփանակերտը թիրախավորված են: Այս ծայրաստիճան անհանգստացնող լուրերը պաշտոնապես հայտարարել են նաև Արցախի մարդու իրավունքների պաշտպանն ու պաշտպանության նախարարությունը: Արդեն լայնածավալ բռնություն ու վնասներ են հասցվել քաղաքացիներին: Հայ երեխաների, կանանց ու Լեռնային Ղարաբաղի ողջ բնակչության կյանքն ու առողջությունն իրական սպառնալիքի տակ են: Ամբողջ աշխարհի միջազգային հանրությանն ու Մարդու իրավունքների միջազգային կազմակերպություններին կոչ ենք անում քայլեր ձեռնարկել ու իրենց ջանքերն ուղղել կանխելու Լեռնային Ղարաբաղի քաղաքացիական բնակչության խաղաղության ու անվտանգության դեմ այս ռազմական ագրեսիան ու բռնությունը»,- գրել է Կարապետյանը:
Հայաստանի ազգային հավաքականի և Սլովակիայի «Ժիլինայի» երիտասարդ հարձակվող Վահան Բիչախչյանը ևս հանդես է եկել գրառմամբ՝ ոգեկոչելով Հայաստանի և Արցախի ժողովրդին։ «Նրանք ասում են՝ մենք Ադրբեջանն ենք, մեզ հետ Թուրքիան է, իսկ մենք ասում ենք՝ Մենք Հայաստանն ենք, ու մեզ հետ Աստված է»,- գրել է Բիչախչյանը: