Ֆուտբոլի Անգլիայի հավաքականը Խորվաթիայի ընտրանու հետ աշխարհի առաջնության կիսաեզրափակիչ խաղից առաջ բավական յուրօրինակ մարզում է անցկացրել:
Պարապմունքի սկզբում անգլիացի ֆուտբոլիստները բռնոցի-փոխանցոցի են խաղացել՝ իրար վրա նետելով ռեզինե աքլորներ: Շատ լրատվամիջոցներ կարծում են, որ Անգլիայի հավաքականն այդ եղանակով ցանկացել է ծաղրել Ֆրանսիայի ազգային թիմին, որի թալիսմանը հենց աքլորն է համարվում:
Անգլիայի հավաքականում փաստորեն վստահ են եղել, որ կիսաեզրափակիչում հաղթելու են խորվաթներին և ժամանակից շուտ որոշել են ծաղրել իրենց պոտենցիալ մրցակիցներին` ֆրանսիացիներին:
Անգլիա-Խորվաթիա հանդիպման սկիզբը և ընդհանրապես` առաջին խաղակեսը տպավորիչ էր անգլիացիների համար: Արդեն 5-րդ րոպեին տուգանային հարվածից գեղեցիկ գոլի հեղինակ դարձավ անգլիացիների պաշտպան Կիրան Տրիպյերը:
Երկրորդ խաղակեսում նախաձեռնությանն աստիճանաբար տիրեցին Խորվաթիայի հավաքականի ֆուտբոլիստները. 69-րդ րոպեին կիսապաշտպան Իվան Պերիշիչը հավասարեցրեց խաղի հաշիվը:
90 րոպեները չորոշեցին խաղի հաղթողին և Խորվաթիայի հավաքականը դարձավ յուրօրինակ ռեկորդի հեղինակ` փլեյ-օֆֆի բոլոր խաղերը տեղափոխելով լրացուցիչ ժամանակ: Սակայն Խորվաթիայի հավաքականն այսօր դարձավ ավելի մեծ նվաճման հեղինակ. 109-րդ րոպեին խորվաթների հարձակվող Մարիո Մանջուկիչը դարձավ, այսպես կոչված, ոսկե գնդակի հեղինակ` իր հավաքականին առաջին անգամ դուրս բերելով ֆուտբոլի աշխարհի առաջնությունների եզրափակիչ:
Հուլիսի 15-ին տեղի կունենա Ֆրանսիա – Խորվաթիա եզրափակիչը:
Սակայն ընթացիկ առաջնությունում Խորվաթիայի հավաքականը ոչ միայն հաղթում է, այլ նաև հայտնվում է քաղաքական սկանդալների կիզակետում:
Ուկրաինայի ֆուտբոլի ֆեդերացիան պատրաստ է աշխատանքի հրավիրել Խորվաթիայի հավաքականի արդեն նախկին մարզիչ Օգնեն Վուկոևիչին, ինչպես նաև նրա փոխարեն վճարել ՖԻՖԱ-ի կողմից սահմանված 15 հազար շվեյցարական ֆրանկ կազմող տուգանքը:
Վուկոևիչի դեմ կարգապահական տույժը կիրառվեց այն բանից հետո, երբ նա և Խորվաթիայի հավաքականի պաշտպան Դոմագոյ Վիդան Ռուսաստանի հետ հանդիպումից հետո Instagram-ում կարճ տեսահոլովակ տեղադրեցին, որում դժվարությամբ ձեռք բերված այդ հաղթանակը նվիրում էին ուկրաինացի երկրպագուներին և Կիևի «Դինամո»-ին․ նախկինում թե՛ Վուկոևիչը և թե՛ Վիդան հանդես էին եկել կիևյան ակումբի կազմում: «Փա՛ռք Ուկրաինային», – գոռում էր Վիդան, իսկ Վուկոևիչը նշում էր, թե այս հաղթանակը ձեռք բերվել հանուն Ուկրաինայի և Կիևի «Դինամո»-ի:
ՖԻՖԱ-ի կարգապահական կոմիտեն բավական արագորեն արձագանքեց այս տեսագրությանը` Վուկոևիչին զրկելով աշխարհի առաջնության հանդիպումներին ներկա գտնվելու հնարավորությունից, Վիդային էլ խիստ նկատողություն հայտարարելով:
Բայց այս ամենն արագ կմոռացվի, եթե Խորվաթիայի հավաքականին հաջողվի առաջին անգամ նվաճել աշխարհի չեմպիոնի կոչումը:
