Ծանրամարտի Հայաստանի հավաքականի անդամ Տիգրան Մարտիրոսյանը հայտնվել է դոպինգ սկանդալի կենտրոնում։ Համաշխարհային հակադոպինգային ծառայությունը (WADA) վերստուգել է Մարտիրոսյանի՝ Պեկինի 29-րդ ամառային Օլիմպիական խաղերի դոպինգ փորձանմուշը, որը տվել է դրական արդյունք։ Այս մասին հայտնում է Միջազգային օլիմպիական կոմիտեի պաշտոնական կայքը։
Մարտիրոսյանը «Պեկին-2008»-ին մասնակցել է 69 կգ քաշային կարգում՝ նվաճելով բրոնզե մեդալ։ Դոպինգ փորձանմուշի վերստուգման արդյունքում հայտնի է դարձել, որ նա օգտագործել է ստանոզոլոլ և դեհիդրոքլորմեթիլտեստոսերոն (տուրինաբոլ)։
ՄՕԿ-ի կարգապահական կոմիտեի ներկայացուցիչներ Դենիս Օսվալդը (գլխավոր մասնագետ), Գունիլա Լինդբերգը և Ուգուր Էրդեները հրապարակել են Տիգրան Մարտիրոսյանի գործի հետ կապված 7 էջից բաղկացած զեկույց, որտեղ մասնավորապես ասվում է․
«Պեկինի 29-րդ ամառային Օլիմպիակլան խաղերում 69 կգ քաշային կարգում հանդես եկած ծանրորդ Տիգրան Մարտիոսյանը խախտել է հակադոպինգային կանոնները։ Որոշում է կայացվել որակազրկման մասին։ Հայաստանի օլիմպիական կոմիտեն պետք է հնարավորինս շուտ վերադարձնի բրոնզե մեդալը։ Որակազրկման որոշումն ուժի մեջ է մտնում անմիջապես։ Որակազրկման ժամկետի մասին վերջնական որոշում կկայացնի Ծանրամարտի միջազգային ֆեդերացիան»։
