Էնսթոունում գտնվող շտաբ-բնակարանում «Լոտուս»-ը ներկայացրեց 2013թ. մրցաշրջանի համար նախատեսված նոր բոլիդը: Բոլիդն արտաքնապես զգալի փոփոխություններ է կրել՝ համեմատած 2012թ. մրցաշրջանի համար նախատեսված մեքենայի:
Գրակշռում է սև գույնը՝ դեղինի և կարմիրի տեղ-տեղ համադրումով: Մեքենան կոչվում է E21: Այն ներկայացնելիս «Լոտուս»-ի նախագահ Էրիկ Բուլյեն հանդես եկավ հայտարարությամբ.
«Մեր գլխավոր նպատակը Նախագծողների գավաթի խաղարկությունում առնվազն երրորդ տեղը զբաղեցնելն է: Դրան հասնելու համար մենք պայքարելու ենք մինչև վերջ: E21-ի օգնությամբ մեր ավտոարշավորդները կարող են լուրջ նվաճումներ ունենալ:
Մենք անընդհատ առաջադիմում ենք: Եթե դրան գումարենք նաև մեր պիլոտների ներուժը, ապա կարող ենք ասել, որ «Լոտուս»-ը կարող է դառնալ «Ֆորմուլա-1»-ի լավագույն թիմերից մեկը»: