Երկաթախաղի Ռուսաստանի ուժեղագույն վարպետների նախաօլիմպիական մրցաշրջանի անդրանիկ մեկնարկը՝ կանանց և տղամարդկանց ծանրամարտի Ռուսաստանի գավաթի խաղարկությունը ընթանում է Բելգորոդի մարզի Ստարի Օսկոլ քաղաքի «Արկադա» մարզապալատում: Այն մեր ուշադրության կենտրոնում է հայտնվել ոչ միայն այն պատճառով, որ Ռուսաստանի դյուցազունները միջազգային ասպարեզում մշտապես եղանակ ստեղծողներից են, այլ նաև այն պատճառով, որ նման ստուգատեսերը մշտապես առանձնանում են հայազգի ծանրորդների հաջողված ելույթներով:
Գավաթային մրցմանը մասնակցում է 130 մարզիկ (87 ծանրորդ, 43 ծանրորդուհի), որից 6-ը հայազգի ծանրորդներ են: Նշենք, որ այս ստուգատեսի արդյունքներով կազմավորվելու են կանանց և տղամարդկանց Ռուսաստանի ընտրանիներն, որոնք կսկսեն պատրաստվել ապրիլի 10-18-ը Թբիլիսիում ընթանալիք մեծահասակների Եվրոպայի առաջնությունը:
Հավաքականում տեղ են գտնելու հիմնականում այս մրցաշարի մրցանակակիրները: Մրցումների երկրորդ օրը ևս հայ ծանրորդները ուրախացրին իրենց երկրպագուներին նվաճած պարգևներով: 25-ամյա կրասնոդարցի, միջազգային կարգի սպորտի վարպետ Արմեն Ալեքյանը 69 կգ քաշային կարգի ծանրորդների մրցապայքարում երկամարտի 288 կգ (130 +158) արդյունքով դարձավ բրոնզե մեդալակիր:
Ռուսաստանի գավաթակրի կոչումը նվաճեց 313 կգ (143+ 170) ցուցանիշ արձանագրած նովոկուզնեցկցի Սերգեյ Պետրովը: Բավական հետաքիրքիր, գրավիչ ու լարված պայքար ծավալվեց 77 կգ քաշային կարգի ծանրորդների մրցավեճում: Պոկում վարժության փոքր ոսկե մեդալին 159 կգ արդյունքով արժանացավ 2013 թ երիտասարդների աշխարհի ու Եվրոպայի չեմպիոն, արմավիրցի 20-ամյա միջազգային կարգի սպորտի վարպետ Ռազմիկ Հունանյանը:
Սակայն հրում վարժությունում նրան գերազանցեց հասակակից՝ 20-ամյա Վիկտոր Գետցն, ով երկամարտի 355 կգ (158+ 197) ցուցանիշով ի վերջո դարձավ Ռուսաստանի գավաթակիր: Վիկտորը 2011 թ պատանիների աշխարհի չեմպիոնն է, իսկ անցյալ տարի էլ 77 կգ քաշային կարգում նույն 355 (160+195) արդյունքով դարձել էր նաև մինչ 20 տարեկանների Եվրոպայի չեմպիոն՝ առաջ անցնելով արծաթե և բրոնզե մեդալների արժանացած մեր հանրապետության պատվիրակներ՝ 18-ամյա Նորայր Ավետիսյանից ու 17-ամյա Հակոբ Մկրտչյանից, որոնք գրանցել էին համապատասխանաբար 318 կգ (138 +180) և 313 կգ (137+ 176) արդյունքներ:
Ռազմիկ Հունանյանն այս անգամ երկամարտի 351 կգ (159+192) բավարարվեց արծաթե մեդալով: Նշենք, որ նա երկամարտում 20 կգ-ով գերազանցեց բրոնզե մեդալակիր դարձած տղամարդկանց 2013 թ Եվրոպայի չեմպիոն, 22-ամյա Դմիտրի Խամյակովին՝ 331 կգ (150+ 181): Այնպես որ մրցաշարի առաջին երկու օրերին մրցահարթակ ելած հաայզգի 4 ծանորորդները նվաճել են 2-ական արծաթե և բրոնզե պարգևներ:
Հիշեցնենք, որ նախօրեին 62 կգ քաշային կարգում արծաթե մեդալ էր նվաճել նաև Ռազմիկի կրտսեր եղբայրը՝ 19-ամյա Գոռ Հունանյանը, իսկ 56 կգ քաշային կարգում էլ բրոնզե մեդալի էր արժանացել փորձառու ծանրորդ , 31-ամյա նովոսիբիրսկցի Արսեն Թամրազյանը:
