Անգլիայի Պրեմիեր լիգայի 9-րդ տուրում «Մանչեսթեր Յունայթեդի» պարտությունը «Հադերսֆիլդից» կոշտ արձագանք է ստացել երկրպագուների և փորձագետների շարքերում: Հիշեցնենք, որ Ժոզե Մոուրինյոյի թիմը, ցուցադրելով ցածր որակի խաղ, հյուրընկալվելիս զիջել էր 2:1 հաշվով:
«Այն, ինչ տեղի ունեցավ, օրինաչափ էր: Մինչ այս «Յունայթեդը» դժգույն խաղ էր ցուցադրել «Լիվերպուլի» և «Բենֆիկայի» հետ մրցավեճերում: Մեր թիմը խաղից խաղ անկում է ապրում, և եթե լուրջ քայլեր չձեռնարկվեն, հնարավոր է՝ դուրս մնանք լավագույն հնգյակից: Ամեն դեպքում «Հադերսֆիլդն» արժանի էր հաղթանակի»,- ասել է «Մանչեսթեր Յունայթեդի» նախկին պաշտպան Ֆիլ Նևիլը:
Պարտությունից հետո «Մանչեսթեր Յունայթեդի» կիսապաշտպան Անդեր Էրերան հայտարարել էր, որ իրենք պարտվել են այն պատճառով, որ որոշ ֆուտբոլիստներ «Հադերսֆիլդի» դեմ հանդիպմանը «նայել են մատների արանքով»: «Բնականաբար, տեղյակ էր Էրերայի հարցազրույցի մասին: Նա նշել էր, որ մեր ֆուտբոլիստները վատ վերաբերմունք և ոչ բավարար ցանկություն են դրսևորել: Երբ ֆուտբոլիստը նման բան է ասում, ուրեմն անձամբ պետք է ներկայանա մամուլի ասուլիսին և բացատրի, թե ինչ է տեղի ունեցել, քանի որ ես ոչ մի բացատրություն չունեմ: Այո, պարտությունը տեղի ունեցավ մեր վերաբերմունքի պատճառով: Թիմը, որն ավելի շատ էր ձգտում հաղթանակի, հասավ հաջողության: Երբ հաղթում է լավագույն թիմը, ասելու բան քիչ կա: Մեր խաղը զարմացրեց ինձ, չէի սպասում այսպիսի բան: Կվերլուծեմ խաղը և անհրաժեշտության դեպքում կքննադատեմ խաղացողներին: Լրագրողների մոտ դա չեմ անի: Ագրեսիայով, ինտենսիվությամբ, հույզերով խաղը սկսած թիմը հաղթեց: Նրանց համար կյանքի խաղ էր: Հնարավոր է՝ երկրորդ խաղակեսում ունեինք ոչ-ոքի կորզելու հնարավորություն, բայց անկեղծ ասած՝ արժանի էինք պատժի»,- ասել է Մոուրինյոն:
Վերջինիս և Էրերայի հայտարարությունները վկայում են այն մասին, որ «Յունայթեդում» ճգնաժամ է սկսվել: Ի դեպ, Մոուրինյոն պարզաբանել է նաև, թե ինչու մեկնարկային կազմում չի ընդգրկել Հայաստանի ազգային հավաքականի ավագ Հենրիխ Մխիթարյանին, որը մասնակցեց միայն երկրորդ կեսին: «Ցանկանում էի ինչ-որ բան փոխել թիմի խաղում, քանզի վերջին երկու խաղերում լճացման պրոցես էր սկսվել: Նշեմ նաև, որ Մխիթարյանի ու Ռեշֆորդի մոտ նկատվում էր հոգնածություն: Ընդհանուր առմամբ չորս փոփոխություններ էի կատարել կազմում՝ թիմին թարմություն և ինստենսիվություն հաղորդելու համար»,- նշել է Մոուրինյոն:
Եթե «Բենֆիկայի» նկատմամբ տարած հաղթանակից հետո բրիտանական մամուլը խիստ քննադատության էր ենթարկել Մխիթարյանին, ապա վերջին ձախողումից հետո հայ ֆուտբոլիստի մասին նույնիսկ դրական մեկնաբանություններ կարելի է լսել: BBC հեռուստաընկերության փորձագետ Ջերմեյն Ջենասը նշել է, որ երկրորդ կեսում դուրս գալով խաղադաշտ՝ Մխիթարյանը զգալիորեն ակտիվացրեց խաղը կիսապաշտպանությունում: «Մխիթարյանը զգալիորեն փոխեց խաղը միջին օղակում, սակայն երբ թիմը պարալիզված է, մեկ-երկու ֆուտբոլիստները չեն կարող եղանակ ստեղծել»,- նշել էր Ջենասը:
Ամեն դեպքում «Հադերսֆիլդի» հետ հանդիպումը ցույց տվեց, որ «Յունայթեդի» անկման մեղավորն ամենևին Հենրիխ Մխիթարյանը չէ, և որ խնդիրը շատ ավելի խորքային է: Անդրադառնալով Մխիթարյանին հիմնական կազմից դուրս թողնելուն, իսկ երկրորդ կեսի մեկնարկում խաղադաշտ դուրս բերելով՝ Մոուրինյոն փաստացի ընդունել է, որ սխալվել է մեր ֆուտբոլիստի հարցում: Պորտուգալացի մասնագետը հազվադեպ է ընդմիջմանը փոփոխություն կատարում: Հայտնվելով կրիտիկական վիճակում՝ Մոուրինյոն ապավինեց հուսալի տարբերակին, սակայն, ինչպես ասում են, «գնացքն արդեն գնացել» էր:
Արդեն վաղը Անգլիայի լիգայի գավաթի խաղարկության շրջանակներում «Յունայթեդը» մրցելու է «Սուոնսիի» հետ, իսկ հոկտեմբերի 28-ին Անգլիայի Պրեմիեր լիգայի 10-րդ տուրում կհյուրընկալի սկզբունքային մրցակից «Տոտենհեմին»: Վերջինս երեկ սեփական հարկի տակ խոշոր՝ 4:1 հաշվով առավելության է հասել «Լիվերպուլի» նկատմամբ և միավորների քանակով հավասարվել «Յունայթեդին»:
Այս պահին առաջատարը «Մանչեսթեր Սիթին» է՝ 25 միավորով: Երկրորդ և երրորդ հորիզոնականներում գտնվող «Յունայթեդն» ու «Տոտենհեմն» ունեն 20-ական միավոր:
