Հայկական ֆուտբոլում տեղի ունեցող վերջին զարգացումները կրկին անգամ խոսում են այն մասին, որ նպատակաուղղված քայլեր են ձեռնարկվում այս մարզաձևը վերջնականապես հողին հավասարեցնելու համար: Հայաստանի ֆուտբոլի ֆեդերացիան կրկին անգամ որակազրկեց Երևանի «Արարատի» մարզիչ Արկադի Անդրեասյանին՝ այս անգամ երկու տարի ժամկետով:
Հեռավոր 2002 թվականին մրցավար Կարեն Նալբանդյանի հետ վեճի բռնվելու համար Անդրեասյանը ֆուտբոլում ոչ ցանկալի անձ էր ճանաչվել և ցմահ որակազրկվել: Դրանից հետո ՀՖՖ-ն չեղյալ էր համարել որոշումը: Հայաստանի բարձրագույն խմբի առաջնության 6-րդ տուրի «Արարատ»-«Գանձասար-Կապան» խաղի ժամանակ Անդրեասյանի նյարդերը կրկին տեղի տվեցին: Նա վստահ էր, որ հանդիպման գլխավոր մրցավար Արտակ Սիմոնյանը անտեղի դեղին քարտ է ցույց տվել իր ֆուտբոլիստներից Արգիշտի Պետրոսյանին:
Կատարվածի մասին ավելի պատկերավոր կարծիք կազմելու համար դիտեցինք «Արարատ»-«Գանձասար-Կապան» հանդիպման տեսագրությունը: Դեղին քարտ ստանալուց առաջ մրցակցի ֆուտբոլիստը բավական կոպիտ էր վարվել Պետրոսյանի հետ, սակայն հանդիպման գլխավոր մրցավար Արտակ Սիմոնյանը կանոնների խախտում չէր արձանագրել: Կարծում ենք՝ ակնհայտ է, որ այս դրվագում «Գանձասար-Կապանի» ֆուտբոլիստը խախտում է կանոնները: Մրցավարից պարզաբանում ստանալու փոխարեն Պետրոսյանը ստացավ դեղին քարտ, ինչը բորբոքեց կրքերը: Հանդիպման ընթացքում Սիմոնյանը 2-3 անտեղի դեղին քարտ էր ցույց տվել «Արարատի» ֆուտբոլիստներին: Ըստ էության խաղավարտին համբերության բաժակը լցվեց: Կողմնակալ մրցավարությունը հանգեցրեց հայկական ֆուտբոլի վրա ստվեր գցող հերթական մի երևույթի:
ՀՖՖ-ն, բնականաբար, քավության նոխազ դարձրեց Անդրեասյանին: Չկարողանալով կազմակերպել նորմալ ֆուտբոլային առաջնությունը՝ բռնատիրական այս կառույցը ուղղակիորեն ոչնչացնում է եղած ֆուտբոլային մարմինները: Գրեթե բոլոր հանդիպումներում մրցավարներն, այսպես ասած, խաղի «հերն անիծում են»: Որպես կանոն, անարդարության դեմ բողոքում են 3 թիմեր՝ «Ալաշկերտը», «Շիրակն» ու «Արարատը», քանզի մյուս երեք թիմերը, այսպես ասած, «սվոյ» են:
Առաջնության ընթացքից դժգոհ երեք թիմերը ՀՖՖ-ի կողմից շարունակ լուրջ պատիժների են ենթարկվում: Օրինակ՝ Բարձրագույն խմբի առաջնության 6-րդ տուրում «Ալաշկերտը» նվազագույն հաշվով հաղթել էր Գյումրիի «Շիրակին»: Հանդիպման ընթացքում դաշտից հեռացվել էր Հայաստանի չեմպիոնի գլխավոր մարզիչ Աբրահամ Խաշմանյանը: Սեպտեմբերի 20-ին տեղի է ունեցել ՀՖՖ-ի կարգապահական նիստը, որի ընթացքում որոշում է կայացվել ոչ մարզական պահվածքի համար Խաշմանյանին որակազրկել երեք խաղով, իսկ «Ալաշկերտին» տուգանել 100 հազար դրամով:
Անդրեասյանին 2 տարով որակազրկելուց հետո խոսակցություններ են շրջանառվում «Արարատը» Հայաստանի բարձրագույն խմբի առաջնությունից հանելու մասին: Մասնավորապես, շատերն այն կարծիքին են, որ թասիբ ունեցող թիմը ուղղակի չի մասնակցի ՀՖՖ-ի հովանու ներքո անցկացվող խայտառակ մրցմանը: Հնարավոր է՝ այս կարծիքը չափից ավելի է կոշտ և արմատական, բայց առկա վիճակում ֆուտբոլային դեմարշը դիտվում է որպես փրկության ուղի: Այս կերպ երկար շարունակվել չի կարող: Ֆուտբոլին մոտ կանգնած շատ մարդիկ հրաժարվում են առնչություն ունենալ հայկական ֆուտբոլի հետ մեկ անձի պատճառով: Մնացել է 6 թիմ, որոնցից մի քանիսի՝ Հայաստանի առաջնությանը մասնակցելու փաստը պետք է հերոսություն համարել:
Ժամանակն է ստեղծել ՀՖՖ-ից անջատ այլընտրանքային առաջնություն: Միևնույն է՝ եվրագավաթների խաղարկություններում շանս չունենք, առաջին իսկ փուլից անհաջողության ենք մատնվում: Առողջ մթնոլորտում առողջ առաջնություն ունենալը բնականաբար դրական ազդեցություն կունենա հայկական ֆուտբոլի վրա: ՀՖՖ-ի նախագահը իր պաշտոնից երբեք չի հեռանա: Տարիների կորուստը կարող է անդառնալի հետևանքներ ունել:
Ֆուտբոլասերների համար նման առաջնություն ունենալը ամոթ է: Ամոթի զգացում պետք է դրսևորեն նաև թիմերը՝ հանուն հայկական ֆուտբոլի, որը վերջին 15 տարիներին հիմնավորապես ավերվել է և փրկության կարիք ունի: