Հայաստանի ազգային հավաքականի երկրպագուների ֆան շարժումը՝ Առաջին հայկական ճակատը կամ ուղակի ՖԱՖ-ը 10 տարեկան է: 10 տարի է անցել այն օրվանից, երբ առաջին անգամ հայ երկրպագուները միասին քիչ թե շատ կազմակերպված այցելեցին մարզադաշտ և աջակցեցին մեր հավաքականին:
10 տարիների ընթացքում եղան թվով անհամեմատ ավելի շատ տխրության և հիասթափության օրեր ու իրադարձություններ, քան հակառակը, այդ ամենը մեզ ավելի ու ավելի ամուր և կուռ սարքեց, իսկ հաղթանակները և հավաքականի հաջող ելույթները միասնություն մտցրեցին երիտասարդների, տարբեր բնագավառի և քաղաքական հայացքների մարդկանց մեջ:
10 տարիների ընթացքում ինչպես ազգային հավաքականում, այնպես էլ ՖԱՖ-ում եղավ մի քանի սերնդափոխություն, եղան սխալներ և թերություններ, եղան բախումներ, վնասվածքներ, անդառնալի կորուստ, տասնյակ հզորագույն աջակցության ակցիաներ և երթեր, ֆանատական յուրովի մշակույթի ձևավորում՝ մասնիկ առ մասնիկ, բայց մեր գլխավոր ձեռքբերումը՝ 10 տարի անց էլ մենք մնացինք պարզ ճակատով և գլուխներս բարձր, շարժվում ենք մեր 10-ամյա երազանքների հետևից, նոր երազանքներ ստեղծելու հետևից:
Շնորհավորում ենք բոլոր ՖԱՖ-ականներին, ՖԱՖ-ի համակիրներին և բոլոր երկրպագուներին, ովքեր 10 տարիների ընթացքում ինչ որ ձևով մասնակցեցին շարժման կայացմանը: 10-ամյակը նշելու հնարավորություն այժմ չունենք. մի քանի օրից հնարավոր է հավաքականի պատմության ամենապատասխանատու խաղերից մեկը տեղի ունենա, մեծ թափով ընթանում են խաղի նախապատրաստական ակցիաները: Արդեն վաղը ՖԱՖ-ականների խումբը կմեկնի Մոնտենեգրո:
«Առաջին հայկական ճակատ»