«Չիկագո Ֆայր»-ի գլխավոր մարզիչ Վելկո Պաունովիչը հույս է հայտնել, որ Հայաստանի ազգային հավաքականի հարձակվող Դավիթ Արշակյանի փաստաթղթային խնդիրները շուտով կլուծվեն և հարձակվողը կկարողանա միանալ իր նոր թիմին:
«Խաղից հետո հաղորդագրություն ստացա Դավիթից: Նա շատ ոգևորված էր մեր հաղթանակից ու թիմի ցուցադրած լավ խաղից: Նա անհամբեր սպասում է, թե երբ է միանալու թիմին, ցավոք, պետք է մի փոքր սպասենք, քանի որ նրա աշխատանքային վիզա ստանալու հարցը ընթացքի մեջ է: Մենք դեռ նորություն չունենք կապված դրա հետ: Դա մեր հսկողության տակ չէ, ու ոչինչ չենք կարող անել, բացի անհրաժեշտ աջակցություն ցուցաբերելուց և գործընթացն արագացնելու համար անհրաժեշտ փաստաթղթերը տրամադրելուց»,- ասել է Պաունովիչը:
Նա հույս է հայտնել, որ այս շաբաթ ամեն ինչ լուծված կլինի: «Այն, որ մեր թիմի ֆուտբոլիստները ազգային հավաքականներ են հրավիրվում, նշանակում է, նրանք իրենց լավ են դրսևորում: Դա նշանակում է, որ նրանք բարձրակարգ ֆուտբոլիստներ են, որովհետև գիտենք, թե որքան կարևոր է խաղալ ազգային հավաքականում»,- ասել է Պաունովիչը:
Արշակյանն ընթացիկ ամառային տրանսֆերային պատուհանի ժամանակ MLS-ում հանդես եկող «Չիկագո Ֆայր» է տեղափոխվել լիտվական «Տրակայ»-ից: Երիտասարդ հարձակվողը հրավիրվել է Հայաստանի ազգային հավաքական` մասնակցելու առաջիկայում կայանալիք Չեխիայի հետ ընկերական խաղին և Աշխարհի առաջնության ընտրական փուլի Դանիայի հետ մրցավեճին: