Մարսելի «Վելոդրոմ» մարզադաշտում ավարտվեց ֆուտբոլի Եվրոպայի 2016 թվականի առաջնության կիսաեզրափակիչ երկրորդ դիմակայությունը: Ուժերը չափեցին Ֆրանսիայի և Գերմանիայի հավաքականները:
Նիկոլա Ռիցոլիի՝ խաղասկիզբն ազդարարող սուլիչից անմիջապես հետո Ֆրանսիայի հավաքականը նետվեց առաջ: Դաշտի տերերը տիրում են նախաձեռնությանը, խելահեղ տեմպ էին հաղորդել հանդիպմանը: Դիդյե Դեշամի սաները լուրջ պրեսինգի էին դիմում մրցակցի կիսադաշտում: Գերմանիայի հավաքականը խնդիրներ ուներ պաշտպանությունից: 5-րդ րոպեին Անտուան Գրիզմանը, ստանալով գնդակը, հարվածեց դարպասին: Մանուել Նոյերը կատարեց առաջին սեյվն այդ խաղում:
12-րդ րոպեին Գերմանիայի հավաքականը ստեղծեց առաջին վտանգավոր պահը: Էմրե Ջանի եզրային անցումից ու փոխանցումից հետո Տոմաս Մյուլլերը հայտնվեց հարվածային վտանգավոր դիրքում: Հարվածը շեղ էր: 3 րոպե անց Ջանը դիպուկ հարվածեց: Ուգո Լյորիսը հետ մղեց գնդակը: Գերմանացիներն արագորեն վերականգնեցին հավասարությունը: Թիմերը փոխանակվում էին վտանգավոր գրոհներով:
Մրցավարի՝ առաջին խաղակեսին ավելացված 1-ին րոպեին անկյունայինի իրացումից հետո Բաստիան Շվայնշտայգերը սեփական տուգանային հրապարակում ձեռքով խաղաց: Անտուան Գրիզմանը չվրիպեց 11 մետրանոց հարվածի նշակետից: Թիմերն ընդմիջման գնացին Ֆրանսիայի հավաքականի առավելության պայմաններում:
Հանդիպման 73-րդ րոպեին Պոլ Պոգբայի եզրային փոխանցումից հետո Մանուել Նոյերը դարպասից դուրս եկավ ու վրիպեց: Անտուան Գրիզմանն անմիջապես օգտվեց Գերմանիայի հավաքականի դարպասապահի սխալից ու կրկինապատկեց հաշվի տարբերությունը՝ ձևակերպելով դուբլ: 2:0 հաշիվը պահպանվեց մինչև հանդիպման ավարտը:
Ֆրանսիա – Գերմանիա՝ 2:0
1:0, 2:0 Անտուան Գրիզման (46+1′, 73′)
