ԱՄՆ-ի Հյուսթոն քաղաքում ավարտին է մոտենում ծանրամարտի աշխարհի 2015թ. առաջնությունը:
Տղամարդկանց գերծանր քաշայինների պայքարում Հայաստանը 2 ներկայացուցիչ ուներ: 21-ամյա Գոռ Մինասյանը պոկում վարժության փոքր բրոնզե մեդալ նվաճեց՝ բարձրացնելով 203 կգ: Մինչ այդ նա գլխավերևում էր պահել 195 և 201 կգ ծանրաձողերը: Ռուբեն Ալեքսանյանը, ով այդքան էլ վստահ չի զգում այս վարժությունում, 9-րդն էր 192 կգ արդյունքով: Ալեքսանյանն առաջին մոտեցմամբ հաղթահարել էր 185 կգ-ն, իսկ երրորդ մոտեցումը՝ 196 կգ-ն, ձախողել:
Հրում վարժությունում Գոռ Մինասյանը գրանցեց 234 կգ: Ալեքսանյանն առաջին մոտեցմամբ բարձրացրեց 242 կգ-ն, սակայն երկրորդ մոտեցման ժամանակ (246կգ) վնասեց աջ ազդրի հետին մկաններն ու դուրս մնաց հետագա պայքարից: Այսպիսով՝ Գոռ Մինասյանը նվաճեց փոքր բրոնզե մեդալ, իսկ երկամարտում գրավեց 4-րդ տեղը: Ռուբեն Ալեքսանյանը երկամարտում 8-րդն էր:
Նշենք, որ ռուս ծանրորդ Ալեքսանդր Լովչևն ուղղակի ֆանտաստիկ ելույթ ունեցավ: Նա նվաճեց երկու վարժությունների փոքր ոսկե մեդալները, ընդ որում՝ հրում վարժությունում գերազանցեց իրանցի լեգենդար ծանրորդ Հոսեին Ռեզազադեի 15 տարվա վաղեմության աշխարհի ռեկորդը: Նա բարձրացրեց 264 կգ՝ նաև գերազանցելով Ռեզազադեի երկամարտի ռեկորդը: Լովչևը գրանցեց 475 կգ երկամարտի արդյունք: