Հայաստանի ազգային հավաքականի նախկին դարպասապահ Ռոման Բերեզովսկին մեկնաբանել է այն շշուկները, թե իբր Ալբանիայի հավաքականը գումար է տրամադրել Հայաստանի հավաքականի 4 ֆուտբոլիստի, որպեսզի վերջիններս գիտակցորեն պարտության մատնեն սեփական ընտրանուն:
«Դինամո»-ի նախկին դարպասապահը չի հավատում շշուկներին և վստահ է, որ այդ խոսակցությունները սերբ լրագրողների շնորհիվ են տարածվել:
«Անկեղծ ասած, այդ ամենի մասին իմացել եմ հենց Ձեզնից (Ի նկատի ունի Sport-express-ի թղթակցին): Ամեն դեպքում, այդ ամենին շատ դժվար է հավատալ: Չեմ կարողանում պատկերացնել, որ դա կարող էր լինել իրականում: Հնարավոր է, որ դա սերբ լրագրողների մեքենայությունների հետևանքն է: Հնարավոր է, որ նրանց դուր չի եկել ալբանացիների հաջողությունը:
Իսպանիային վերջին խաղում նույնպես հաղթանակ պետք չէր, սակայն նրանք հաղթեցին Ուկրաինայի ընտրանուն: Ալբանիայի դեմ խաղում Հայաստանի հավաքականի մոտիվացիայի բացակայության մասին խոսք լինել չի կարող:
Պարզապես այդպես ստացվեց: 6-րդ րոպեին չկարողացան իրացնել գոլային պահը եւ գոլ բաց թողեցին: Այդպիսի շշուկները պետք է ապացուցվեն, հակառակ դեպքում պետք է ներողություն խնդրել»,- ասել է Բերեզովսկին: