Այսօր «Փաստարկ» ակումբում է հյուրընկալվել «Միկա» շախմատային կանանց թիմը՝ Էլինա Դանիելյան, Լիլիթ Մկրտչյան եւ Լիլիթ Գալոյան կազմով, ինչպես նաեւ՝ թիմի ղեկավար Աշոտ Վարդապետյանը։ Հիշեցնենք, որ վերջերս կանայք Եվրոպայի ակումբային առաջնությունում արժանացել էին բրոնզե մեդալի՝ գրավելով երրորդ տեղը, իսկ Լիլիթ Գալոյանն իր խաղատախտակի վրա արժանացել էր ոսկե, Լիլիթ Մկրտչյանը՝ արծաթե մեդալների։ Աշոտ Վարդապետյանը շեշտեց, որ եթե նախկինում «Միկա» թիմի կազմում հանդես էին գալիս հրավիրված այլազգի շախմատիստներ, ապա հիմա «Միկա»-ի տղամարդկանց թիմում միայն հայեր են, իսկ կանանց թիմում չորս շախմատիստուհիներից երեքն են հայ։ Վարդապետյանը նշեց, որ կանանց թիմը նախկինում էլ է տեղեր գրավել ակումբային առաջնություններում՝ մեկ անգամ դարձել է չեմպիոն, իսկ երկու անգամ գրավել երրորդ տեղը։
Լիլիթ Մկրտչյանը, խոսելով ակումբային մրցաշարում լարվածության մասին, նշեց, որ այս անգամ հավաքվել էին ուժեղ ակումբներ, եւ ընդհանրապես, թիմային առաջնությունները բավական լարված են անցնում։ Էլինա Դանիելյանի համար եւս նման մրցաշարերն անցնում են լարված, քանի որ ակումբների կազմում բավական ուժեղ շախմատիստներ են հանդես գալիս։ Լիլիթ Գալոյանը հայտարարեց, թե իրենց թիմը բավական ուժեղ է եւ արժանի էր նաեւ օլիմպիական չեմպիոն դառնալու, արժանի էր առաջին տեղը գրավելու։ Եվ իրենք առաջիկայում անելու են ամեն ինչ, որպեսզի առաջ ընթանան։ Լիլիթ Գալոյանը, սակայն, նշեց, որ երբեմն կանանց թիմին անտեսում են. լրատվամիջոցները գալիս են մրցաշարերի, նկարահանում միայն տղաների պարտիաները, ցույց տալիս միայն տղաներին, գրում նրանց ելույթների մասին, բայց կանանց հավաքականին, կանանց թիմին չեն անդրադառնում։ Նա սա համարեց վիրավորական, մանավանդ որ կանանց թիմն էլ բավական ուժեղ է խաղում եւ արժանի է, որ ուշադրություն դարձվի։