«Բլիկ» պարբերականի փոխանցմամբ` բռնցքամարտի աշխարհի չեմպիոն, ծանրքաշային Վլադիմիր Կլիչկոյի հետ մենամարտի համար Թոնի Թոմփսոնի հոնորարը կկազմի 800 հազար ԱՄՆ դոլար: Մինչդեռ Կլիչկոն գրեթե 2 անգամ ավելի կվաստակի:
IBF կանոններով սահմանված է, որ պարտադիր մենամարտերում բռնցքամարտիկների հոնորարները բաշխվում են 75 %-ը` չեմպիոնին և 25%-ը` հավակնորդին հարաբերակցությամբ: Սակայն այս անգամ IBF-ը և Թոնի Թոմփսոնի թիմը համաձայնության են հասել Կլիչկո եղբայրների ներկայացուցիչների հետ և բռնցքամարտիկների հոնորարները բաշխել են 85-ը (Կլիչկո) 25-ի(Թոմփսոն) հարաբերակցությամբ:
«Թոնիին չի հետաքրքրում հոնորարը: Նա կենտրոնացրել է իր ուշադրությունը միայն մենամարտի ուղղությամբ: Մարդիկ մինչ այժմ նրան թերագնահատում են: Իսկ ես վստահ եմ, որ Թոնին աշխարհի չեմպիոն կդառնա»,- հայտարարել է Թոմփսոնի պրոմոութերը:
Նշենք, որ բռնցքամարտում հոնորարները ոչ մի կապ չունեն մենամարտի արդյունքների հետ: Պայմանագիրը ստորագրվում է նախապես, և բռնցքամարտիկը ստանում է ի սկզբանե պայմանավորված գումարը:
Ավելի վաղ Թոմփսոնը հայտնել է, որ Կլիչկո եղբայրներն իրեն ֆինանսական դիսկրիմինացիայի են ենթարկել, սակայն նաև նշել է, որ նրանց նման իրավունք է վերապահվում աշխարհի չեմպիոնի կարգավիճակ ունենալու պատճառով:
Կլիչկո-Թոմփսոն մենամարտը կայանալու է վաղը` հուլիսի 7-ին, Շվեյցարիայում: Թոմփսոնը ստացել է միայն IBF գոտու վիճարկման իրավունք, սակայն խաղարկվելու են ուկրաինացի չեմպիոնին պատկանող բոլոր գոտիները:
