Կատարում ընթացող աշխարհի առաջնությունում առաջին սենսացիան մատուցեց C խմբում Սաուդյան Արաբիայի հավաքականը 2։1 հաշվով առավելության հասնելով մրցաշարի գլխավոր ֆավորիտներից Արգենտինայի նկատմամբ։ «Երևի թե սա ինձ համար վերջին աշխարհի առաջնությունը կլինի: Լավ եմ զգում, այստեղ ժամանել եմ հիանալի ֆիզիկական մարզավիճակով: Հոգացել եմ իմ մասին ողջ կարիերայիս ընթացքում, և իմ վերջին աշխարհի առաջնությունում ես վերջին հնարավորություն ունեմ իրականացնելու մեծ երազանքս։ Հավաքականը պատրաստ է, միշտ էլ յուրահատուկ է հանդես գալ Աշխարհի առաջնությունում: Մթնոլորտն ու նոր սկիզբը սպասվող խաղից առաջ յուրահատուկ են:Մեր այս թիմն ինձ հիշեցնում է 2014 թվականի ԱԱ-ում ունեցածը, շատ միասնական էինք ու հստակ գիտեիքն, թե ինչ պետք է անել խաղադաշտում: Այդ ամենը մեզ վստահություն է տալիս»,- Սաուդյան Արաբիայի դեմ հանդիպումից առաջ ասել էր Արգենտինայի հավաքականի առաջատար, համաշխարհային ֆուտբոլի կենդանի լեգենդ Լիոնել Մեսին։
Այն ինչ տեղի ունեցավ արգենտինացիների հետ մեկնարկային խաղում կարելի է նկարագրել թերևս մեկ բառով՝ տապալում։ Կատարվածն ավելի պատկերավոր ներկայացնելու համար նշենք, որ Կատար մեկնած Արգենտինայի հավաքականի ֆուտբոլիստների տրանսֆերային ընհանուր արժեքը 645 միլիոն եվրո է։ Մինչդեռ Սաուդյան Արաբիայի հավաքականի ֆուտբոլիստների տրանսֆերային հանրագումարը կազմում է ընդամենը 25 միլիոն եվրո։ Նշենք նաև ֆուտբոլիստների տրանսֆերային հանգրագումարով Հայաստանի ազգային թիմը զգալիորեն գերազանցում է Սաուդյան Արաբիային։ Միայն Հայաստանի հավաքականի առաջատարներ Էդուարդ Սպերցյանի, Լուկաս Սելարայանի, Սարգիս Ադամյանի և Տիգրան Բարսեղյանի տրանսֆերային արժեքը մոտ 25 միլիոն եվրո է։ Միայն Արգենտինայի հավաքականի պաշտպան Լիսանդրո Մարտինեսի տրանսֆերային արժեը երկու անգամ գերազանցում է Սուդյան Արաբիայի հավաքականի բոլոր խաղացողների տրանսֆերային արժեքին։ Կարծում ենք մեկնաբանություններն ավելորդ են։ «Ծանր հարված է, չէինք սպասում այսպիսի մեկնարկ։ Խաղացողները սպանված են։ Վստահ էինք, որ կհաղթենք եւ կվաստակենք 3 միավոր, որը հանգստություն է տալիս։ Հիասթափված ենք արդյունքից։Ոչ մի արդարացում չկա մեր պարտությանը, պետք է միավորված, միահամուռ պատրաստվենք հաջորդ երկու խաղերին։ Երկար ժամանակ չէինք բախվել այսպիսի իրավիճակի։ Հիմա պետք է ցույց տանք, որ իսկական թիմ ենք։ Պետք է շտկենք մեր սխալները եւ հասնենք նպատակին»,- այս հայտարարությունը Մեսին արել է խայտառակ պարտությունից հետո։ Եթե համեմատենք Մեսիի նախախաղային և հետխաղային շեշտադրումները կհամոզվենք, որ Արգենտինայի հավաքականում տիրող վիճակը մեղմ ասած իդեալական չէ։
Նշելով, որ խաղացողները սպանված են Մեսին անուղղակի կերպով խոստովանել է, որ իր երազանքը դժվար թե իրականություն դառնա։ Իրականում ինչպես կարելի էր պարտվել տրանսֆերային հանրագումարի առումով Հայաստանից ավելի ցածր մրցակցին և որեն է ձախողման հիմնական պատճառը։ Արգենտինայի հավաքականի գլխավոր մարզիչ Լիոնել Սկալոնին փորձել էր խաղը կառուցել էր 34-ամյա Դի Մարիայի և 35-ամյա Մեսիի միջոցով։ Երեկվա խաղը ցույց տվեց սակայն Մեսին ու Դի Մարիան այլևս չունեն թիմն իրենց հետևից տանելու հատկանիշներ։
Նրանք ակնհայտորեն արգելակում էին գերհզոր կազմ ունեցող հավաքականի խաղը։ Եթե Սկալոնին չդրսևորի համարձակություն և չդիմի տակտիկական կտրուկ փոփոխությունների, ապա այս Մունդիալում կունկնդրենք ժամանակին հավաքականի հիմնական կազմ որոշող Մեսիի կարապի երգը։ Հաջորդ հանդիպումը Արգենտինան անց է կացնելու նոյեմբերի 26-ին մրցելով Մեքսիկայի հետ։ Պարտվելու դեպքում Մեսին և խաղընկերները ժամանակից շուտ կզրկվեն 1/8-րդ եզրափակչի համար պայքարելու հնարավորությունից։ Մեկնարկային խաղում երեկ Մեքսիկան ոչ-ոքի 0։0 է խաղացել Լեհաստանի հետ։
