Անկախ Հայաստանի պատմության ընթացքում առաջին անգամ Հայաստանը կընդունի ծանրամարտի Եվրոպայի մեծահասակների առաջնությունը: Մարզաձևի եվրոպական ֆեդերացիան Հայաստանի ծանրամարտի ֆեդերացիային ուղարկած պաշտոնական գրությամբ հաստատել է՝ 2023 թվականի առաջնությունը կանցկացվի Երևանում:Ժամկետները դեռևս հստակեցման փուլում են, բայց առաջնությունը կանցկացվի ապրիլի 1-ից 30-ն ընկած ժամանակահատվածում: ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանն ԿՄԳՍ-ի պաշտոնական կայքի թղթակցի հետ զրույցում նշել է, որ ամեն ինչ պետք է արվի Եվրոպայի առաջնությունն ամենաբարձր մակարդակով անցկացնելու համար. «Սա իսկապես շատ լավ հնարավորություն է մեր ամենաուժեղ մարզաձևերից մեկը կրկին ցուցադրելու, Եվրոպային ասելու, որ մենք լավ ծանրամարտ ունենք: Դա էլ, ընդհանուր առմամբ, կօգնի մասսայականության աճին: Պետք է ամեն ինչ անենք, որ Եվրոպայի առաջնությունն անցկացնենք շատ բարձր մակարդակով»:
Հայաստանում կայանալիք առաջնությունը վարկանիշային է լինելու Փարիզի 2024 թվականի ամառային օլիմպիական խաղերի համար:Հիշեցնենք՝ մարտի վերջին ԿԳՄՍ նախարար Վահրամ Դումանյանն ընդունել էր Եվրոպայի ծանրամարտի ֆեդերացիայի (EWF) նախագահ Անտոնիո Կոնֆլիտիին և գլխավոր քարտուղար Միլան Միխայլովիչին:EWF ներկայացուցիչներն այցելել էին Կ. Դեմիրճյանի անվան մարզահամերգային համալիր, որտեղ էլ հաջորդ տարվա գարնանը կանցկացվի Եվրոպայի առաջնությունը: Անտոնիո Կոնֆլիտին և Միլան Միխայլովիչը նախարարի տեղակալ Կարեն Գիլոյանի և hամալիրի տնօրեն Կարեն Ղազարյանի ուղեկցությամբ ծանոթացել էին մարզահամերգային համալիրի ենթակառուցվածքներին ու պայմաններին, քննարկել առաջնության կազմակերպչական աշխատանքներին վերաբերող հարցեր: Ծանրամարտի Եվրոպայի առաջնությունը կլինի երկու տարվա ընթացքում մարզական երկրորդ խոշոր մրցաշարը Երևանում։ Արդեն այս տարվա մայիսի 21-ին մայրաքաղաքում կմեկնարկի բռնցքամարտի մեծահասակների Եվրոպայի առաջնությունը։ Այն ևս կանցկացվի Կարեն Դեմիրճյանի անվան մարզահամերգային համալիրում։ «Ակնկալվում է, որ Եվրոպայի բռնցքամարտի առաջնությանը կմասնակցեն ընդհանուր առմամբ շուրջ 400 միջազգային պատվիրակներ` 280 մարզիկներ և ուղեկցող անձնակազմեր: Առաջնության անցկացումն իր կարևոր տեղն ունի մարզաձևի զարգացման և մասսայականացման գործում, ինչի արդյունքում Հայաստանի Հանրապետությունն էլ ավելի ճանաչելի կդառնա միջազգային մարզական հարթակներում՝ որպես առաջատար երկիր: 2022 թվականի մայիսի 21-ից 31-ը Երևանում կայանալիք Եվրոպայի բռնցքամարտի առաջնությունն իր ծավալով և նշանակությամբ աննախադեպ է Հայաստանում երբևէ կազմակերպված սպորտային միջոցառումների շարքում։
Նույնիսկ խորհրդային տարիներին մեր երկրում նման մակարդակի սպորտային միջոցառում չի կազմակերպվել»,- ՀՀ կառավարության նիստի ժամանակ ասել էր Վահրամ Դումանյանը:Եվրոպայի բռնցքամարտի առաջնությունը պատշաճ մակադրակով անցկացնելու նպատակով ՀՀ կառավարության ապրիլի 15-ի որոշմամբ պահուստային ֆոնդից 750 մլն 192 հազար դրամ գումար է հատկացվել: Երկու տարվա ընթացքում երկու խոշոր մրցաշարերի անցկացումը իսկապես աննախադեպ իրադարձություն է մեր մեզ համար։
Նման մակարդակի սպորտային միջոցառումների անկացումը ոչ միայն մեծացնում է մեր երկրի ճանաչելիության աստիաճնն այլև խթանում սպորտի զարգացմանն ու մասսայականացմանը։
