Ֆուտբոլասեր հասարակության շրջանում շարունակվում է լայնորեն քննարկվել այս օրերին Հայաստանի չեմպիոն «Ալաշկերտի» Թուրքիայում ուսումնամարզական հավաք անցկացնելու փաստը։ Երևանյան ակումբի ֆեյսբուքյան պաշտոնական էջը չի թարմացվել փետրվարի 5-ից, մինչդեռ թիմը ակտիվ նախապատրաստությունից զատ նաև անց է կացնում ընկերական հանդիպումներ։ «Ալաշկերտի» Թուրքիայում գտնվելու մասին տեղեկություն տարածվել էր Vkontakte սոցիալական ցանցի «Armenian Football Group» խմբում։ Հոդվածագիրը նշել էր, որ վերջերս վերաբացված Երևան-Ստամբուլ չվերթի առաջին ուղևորների թվում են եղել «Ալաշկերտի» ֆուտբոլիստները։ «Առաջին լրատվական»-ի հետաքննության արդյունքում պարզ էր դարձել, որ իսկապես Թուրիքայում գտնվող «Ալաշկերտը» փետրվարի 14-ին Բելեկ քաղաքում ստուգողական հանդիպում է անցկացնելու Խարկովի «Մետալիստի» հետ։ Հանդիպման կայանալու վերաբերյալ տեղեկությունը զետեղել էր նաև ուկրաինական ակումբի պաշտոնական կայքում։ Մասնավորապես, կայքում նշված է, որ Թուրքիայում ընթացող ուսումնամարզական հավաքի շրջանակներում «Մետալիստը» փետրվարի 14-ին ժամը 16-ին մրցելու է «Ալաշկերտի», իսկ փետրվարի 18-ին ուկրաինական մեկ այլ ակումբի՝ «Ռուխի» հետ։ Մինչև «Մետալիստի» հետ մրցավեճը սակայն «Ալաշկերտը» Թուրքիայում հասցրել է անցկացնել երկու ստուգողական հանդիպում։
Եվ այսպես առաջին խաղում մեր թիմը ոչ-ոքի 1։1 է խաղացել ուզբեկական «Բունյոդկորի»։ «Ալաշկերտի» կազմում 11 մետրանոց հարվածով գոլի հեղինակ է դարձել Արտակ Եդիգարյանը։ Երկրորդ խաղում Հայաստանի չեմպիոնը մրցել է ղազախական «Տարազի» հետ և առավելության հասել 1։0 հաշվով։ «Ալաշկերտի» կազմում հաղթական գոլի հեղինակ է դարձել թիմի նորեկ Դմիտրի Գուզը։ Նույնիսկ հաղթանակի վերաբերյալ ոգեշնչող տեղեկությունը չի ստիպել «Ալաշկերտ» ակումբին դրա մասին տեղեկացնել իր հասարակությանը։ Երկրպագուները հայկական թիմի ելույթների մասին ստիպված են տեղեկանալ այլ աղբյուրներից։
Ինչո՞ւ է լռում Հայաստանի չեմպիոնը և որն է դրա նպատակը։ Այն տրամաբանելն իսկապես դժվար է։ Եթե «Ալաշկերտի» ղեկավարությունը չէր ցանկանում, որ թիմի Թուրիքայում գտնվելու մասին իմանային երկրպագուները, ապա ուղղակի պետք էր չգնալ Թուրքիա։ Հիմա, երբ բանը բանից անցել է և «Ալաշկերտի» թուրքերի հետ համագործակցելը որոշ երկրպագուներ «մատի փաթաթան» են դարձրել երևանյան ակումբի լռությունն ուղղակի տարակուսելի է։ Թուրքերի հետ համագործակցելու կապակցության կարելի էր գոնե պարզաբանում ներկայանել և փորձել բացատրել որոշման պատճառները, բայց․․․։ «Ալաշկերտի» թուրքերի հետ համագործակցության վերաբերյալ աղմկահարույց տեղեկություն էր տարածվել դեռևս հունվարի վերջին։ «Ալաշկերտը» հանդես էր եկել հայտարարությամբ, տեղեկացնելով, որ ֆուտբոլային ակումբի գլխավոր հովանավոր է դարձել բուքմեյքերական շուկայում հայտնի Masbet ընկերությունը։ Կարճ ժամանակ անց սոցիալական ցանցերում և լրատվամիջոցներում խոսվեց, որ նշված բուքմեյքերական ընկերությունը թուրքական է։
«Marsbet»-ը, որը համագործակցում է նաև աշխարհում հայտնի այլ ակումբների հետ իսկապես թուրքական է, գործում է Թուրքիայում։ Matsbet»-ը դասվում է նաև թուրքական 10 լավագույն բուքմեյքերական ընկերությունների շարքում։
