Երևանի «Ալաշկերտը» երկրորդ անընդմեջ պարտությունը կրեց Կոնֆերենցիաների լիգայի խմբային փուլում։ Հայաստանի չեմպիոնը երեկ Վազգեն Սարգսյանի անվան «Հանրապետական» մարզադաշտում 2։4 հաշվով զիջեց Ֆինլանդիայի չեմպիոն «Հիկ»-ին։ Առաջին տուրում էլ «Ալաշկերտը» Թել Ավիվիում 4։1 հաշվով պարտվել էր «Մաքաբիին»։ Փաստորեն, երկրորդ խաղում անընդմեջ հայկական ակումբը 4 գնդակ ընդունեց սեփական դարպասը։ Սեպտեմբերի 20-ին տեղի ունեցած Հայաստանի առաջնության 5-րդ տուրի «Նորավանքի» հետ հանդիպումից հետո հրաժարական էր տվել «Ալաշկերտի» գլխավոր մարզիչ Ալեքսանդր Գրիգորյանը։ Վերջինիս գլխավորությամբ երևանյան թիմը բավական հաջող էր ելույթ ունեցել եվրագավաթների որակավորման փուլում, պատմության մեջ առաջին անգամ իրավունք ստանալով խաղալու խմբային մրցաշարում։ Գրիրոգյանին փոխարինել էր սերբ մասնագետ Միլան Միլանովիչը, որի գլխավորությամբ «Ալաշկերտը» երկու մարզում էր անցկացրել մինչև «Հիկ»-ի դեմ մրցավեճը։ Առաջին խաղակեսում «Ալաշկերտը» թարմ տեսք ուներ և խաղը թելադրողի դերում էր։ Հաշիվը հավասարեցնելու հետո թվում էր թե, մեր թիմը կմեծացնի ճնշումը և առաջին հաղթանակը կտանի խմբային փուլում։
Մրցակիցը կարգով ավելի բարձր չէր։ «Հիկ»-ի ֆուտբոլիստների տրանսֆերային ընդհանուր արժեքը կազմում է 6.1, իսկ «Ալաշկերտի» խաղացողների տրանսֆերային հանրագումարը՝ 6․03 միլիոն եվրո։ Կարճ ասած «Հիկ»-ը այն մրցակիցն էր, որին Երևանում պետք է հաղթեինք։ Հանդիպման 36-րդ րոպեին վերջին հույսի խախտման համար դաշտից հեռացվեց «Ալաշկերտի» ավագ, հենակետային կիսապաշտպան Արտակ Գրիգորյանը։ Կարմիր քարտից հետո «Ալաշկերտի» խաղը փլուզվեց և երկրորդ կեսում ֆիննական ակումբը հեշտությամբ օգտագործեց քանակական առավելությունը։ Պարտության մեջ Արտակ Գրիգորյանին մեղադրելը սակայն ամենևեին ճիշտ չի լինի։ Այո Գրիգորյանը սխալվեց։ Տվյալ դրվագում ավելի նախընտրելի կլիներ, որ «Հիկի»-ի հարձակվողը մեն մենակ դուրս գար դարպասապահի հետ և նույնիսկ գրավեր դարպասը։ Լիարժեք կազմով կորցրածը ետ բերելը հնարավոր կլիներ։ Հնարավոր կլիներ նույն խաղային տեմպով շարունակել պայքարը։ Ամեն դեպքում չմոռանանք, որ ֆուտբոլը թիմային խաղ է և կամիր քարտ ստանալն ամենևեին էլ «դատավճիռ» չէ։ Եվրոպա լիգայի փլեյ-օֆում մի քանի անգամ ավելի զորեղ մրցակցի՝ Շոտլանդիայի չեմպիոն «Ռեյնջերսի» դեմ «Ալաշկերտը» 10 ֆուտբոլիստներով արժանի պայքար մղեց։ Առաջին կեսի վերջնամասում դաշտից հեռացվեց մեր թիմի կիսապաշտպան Ջեմյսը։ Երկրորդ կեսում սակայն մեր թիմը դրական առումով կերպարանափոխվեց և ուներ իրական հնարավորություն հաղթելու հզոր ակումբին։ Ուստի երեկվա ձախողումը որևէ կերպ չի կարելի արդարացնել Գրիգորյանի սխալով։ Կարևոր ևս մեկ հանգամանք։ Ի տարբերություն «Ռեմյնջերսի» դեմ հանդիպման «Ալաշկերտը» երեկ խաղաց առանց 12-րդ խաղացողի։
«Հանրապետական» մարզադաշտը կիսադատարկ էր։ Պատճառը տոմսերի թանկ լինելն է։ Երկրպագուն նախընտրեց հանդիպման տանը հետևել։ Երբ «Ալաշկերտը» նվաճեց Կոնֆերենցիաների լիգայի խմբային փուլի ուղեգիր, խոսում էինք աշնանային ֆուտբոլային տոնի մասին։ Այսօր կարող ենք ասել, որ ֆուտբոլային տոնը վերածվում է ֆուտբոլային կատաստրոֆայի։ Երկու խաղում 8 բացթողած գնդակ, կիսադատարկ ստադիոն, որտեղ լսելի էին ֆուտբոլիստների և մարզիչների բղավոցները։ Կատարվածը այլ կերպ բնութարգելը բավական դժվար է։ Կատարվածն ինչ խոսք ունի օբյեկտիվ և սուբյեկտիվ պատճառներ։ Մենք ստիպված ենք սակայն հաշվի նստել այն իրողության հետ, որն ունենք։ Հետևություններ առաջին հերթին պետք է անի «Ալաշկերտի» ղեկավար կազմը։ Կոնֆերենցիաների լիգայի խմբային փուլում Հայաստանի չեմպիոնը դեռևս 4 հանդիպում պետք է անցկացնի։
Ենթախմբի արգելքը հաղթահարելու մասին խոսելը կարծում ենք լուրջ չի լինի։ Առաջին հերթին թիմի առաջ պետք է խնդիր դրվի արժանապատիվ ֆուտբոլ ցուցադրելը։ Անհրաժեշտ է նաև երկրպագուին մարզադաշտ վերադարձնելու լուծումներ գտնել։ Ֆուտբոլիստն ունի երկրպագուի աջակցության կարիքը։ Եվ վերջապես, ֆուտբոլիստներն առաջին հերթին խաղում և պայքարում են երկրպագուի համար։