Աշխարհի առաջնության 6-րդ տուրում Ֆուտբոլի Հայաստանի ազգային հավաքականը վաղը Վազգեն Սարգսյանի անվան «Հանրապետական» մարզադաշտում կմրցի Լիխտենշտեյնի հետ։ Այս պահին ըտրական J ենթախմբում առաջինը Գերմանիան է, որն ունի 12։ Երկրորդ տեղում գտնվող Հայաստանի հավաքականը վաստակել է 10 միավոր։ Երրորդ տեղում Ռումինիան է 9 միավորով, իսկ 4-րդ հորիզոնականում գտնվող Մակեդոնիան ունի 8 միավոր։ Իսլանդացիները վաստակել են 4 միավոր, իսկ վերջին տեղում գտնվող Լիխտենշտեյնը միավոր չի վաստակել։ Խմբի ետնապահի հետ խաղում մեր հավաքականը միավորներ կորցնելու իրավունք ուղղակի չունի։ Ավելին վաղը մեր ֆուտբոլիստները պետք է անեն հնարավորինը խփած և բաց թողած գնդակների բացասական բալանսը վերացնելու համար։ Գերմանիայից 6։0 հաշվով կրած պարտությունից հետո մեր հավաքականի խփած և բաց թողած գնդակների հարաբերակցությունը -2 է (6:8): Հնարավոր է, որ այս ցուցանիշը մրցաշարային աղյուսակի վերջնական հաշվարկում վճռորոշ դեր խաղա։
Ինչևէ, Գերմանիայից կրած պարտությունից հետո երկրպագուների շրջանում շատ է խոսվում ձախողման պատճառների մասին։ Շատ է խոսվում, որ մարտին տեղի ունեցած փայլուն հաղթանակներից հետո մեր հավաքականի խաղն անկում է ապրել։ Այո, պետք է ընդունենք, որ վերջին երկու խաղերում մերոնք ցույց չտվեցին այն խաղը, որը կարող էին, որին արդեն սովորել ենք։ Անկման պատճառը թերևս տակտիկական է։ Հավաքականի ճամբարում գտնվող գրեթե բոլոր ֆուտբոլիստները գտնվում են լավ մարզավիճակում։ Ուստի վատ խաղը կապել առանձին ֆուտբոլիստների հետ միանգամայն ճիշտ չի լինի։ Փորձենք հասկանալ, ինչ է իրականում փոխվել Հայաստանի հավաքականում հաղթական հանդիպումներից հետո։ Անդրադառնանք թերևս առաջին հայացքից ոչ այնքան նշանակալի մի փոփոխությանը, որ սակայն լուրջ հետևանքներ ունեցավ։ Հյուսիսային Մակեդոնիայի հետ հանդիպումից առաջ պաշտոնական խաղերում մեր ազգային թիմը 5 անընդմեջ հաղթանակ էր տարել։ Այդ 5 հանդիպումներում Հայաստանի հավաքականի մեկնարկային կազմում եղել են նոմինալ կենտրոնական հարձակվողներ ի դեմս Ալեքսանդր Կարապետյանի և Նորբերտո Բրիասկո Բալեկյանի։ Վերջին երկու հանդիպումներում Հայաստանի հավաքականը խաղաց առանց նոմինալ կենտրոնականի։ Գերմանիայի դեմ 4-2-3-1 սխեմայում կենտրոնականի հարձակվողի դիրքում էր Սարգիս Ադամյանը, որը ոչնչով աչքի չընկավ և փոխարինվեց։
Նշենք, որ Ադամյանը եզրային հարձակվող է և հազվադեպ է խաղում կենտրոնում։ Ավելի ամրակազմ Կարապետյանը և Բալեկյանը իրենց համար հարազատ կենտրոնական հարձակվողի դիրքում նախորդ հանդիպումներում շարունակ լարվածության մեջ էին պահում մրցակցի պաշտպաններին։ Նրանց մոտ հաջող էր ստացվում նաև պայքարը երկրորդ հարկում և գնդակ պահելը։ Արդյունքում մեր եզրային և կենտրոնական կիսապաշտպանները տարածություն էին ստանում, ավելի արագ տեղաշարժվում։ Թե Մակեդոնիայի և թե Գերմանիայի դեմ մրցավեճերում խաղային այս գործողությունները տեղի չունեցան, ինչի հետևանքով առջևի գծում մերոնք ուղղակի ձախողվեցին։ Բալեկյանը կորոնավիրուսի համավարակի պատճառով չի միացել հավաքականին, իսկ Ալեքսանդր Կարապետյանը լավագույն մարզավիճակում չէ։ Հավաքականի գլխավոր մարզիչ Խոակին Կապառոսը հարկադրաբար գնաց տակտիկական փոփոխությունների որոնք խոշոր հաշվով արդյունավետ չէին։ Կարծում ենք պարզ է, որ վաղը Լիխտենշտեյնը խաղալու է փակ ֆուտբոլ։ Այսինքն տուգանային հրապարակին մոտենալու համար մերոնք ստիպված են լինելու խաղալ նաև երկար փոխանցումներով։ Նման իրավիճակում նոմինալ կենտրոնական հարձակվողի ներկայությունն այլընտրանք չունի։ Խնդրի միակ լուծում թերևս Ալեքսանդր Կարապետյանին մեկնարկային կազմում ընդգրկել է։
Այո նա մարզավիճակի հետ կապված խնդիր ունի, բայց հաշվի առնելով մրցակցի կարգը կարծում ենք կկարողանա օգտակար լինել թիմի համար։ Լիխտենշտեյնի դեմ վճռորոշ խաղում մենք արդեն սայթաքել ենք։ 2020 թվականի Եվրոպայի առաջնության ընտրական փուլում Երևանում Բոսնիա-Հերցեգովինային հաղթելուց հետո 2019 թ․ հոկտեմբերին մերոնք հյուրընկավելիս ոչ-ոքի 1։1 խաղացին Լիխտենշտեյնի հետ և կորցրին հնարավորությունը երկրորդ հորիզոնականի համար պայքարելու։ Այս անգամ նման սայթաքումն անթույլատրելի է։
