Տոկիոյում շարունակվող Օլիմպիական խաղերում մեր օլիմպիականներից այսօր մրցասպարեզ դուրս եկան բռնցքամարտիկ 75 քաշային Արման Դարչինյանը և հունահռոմեական ըմբիշ Արմեն Մելիքյանը։ Վերջինս 1/8-րդ եզրափակչում լարված պայքարում առավելության հասավ իրանցի Ալի Ռեզա Նեջաթիի նկատմամբ։ Քառորդ եզրափակչում սակայն Մելիքյանը գոտեմարտը տանուլ տվեց ուկրաինացի Լենուր Տիմուրովին, զիջելով 4։8 հաշվով։ Արման Դարչինյանը քառորդ եզրափակչում մրցեց ֆիլիպինցի Էմիռ Մարսիալի հետ։ Արդեն առաջին ռաունդում հայ բռնցքամարտիկը նոկաուտի ենթարկվելով պարտվեց եւ դուրս մնաց հետագա պայքարից։ Հիշեցնենք, որ Դարչինյանը 1/8 եզրափակչում առավելության էր հասել սլովակ Անդրեյ Շեմեզի նկատմամբ եւ այսօր հաղթելու դեպքում կապահովեր առնվազն բրոնզե մեդալ։ Ինչևէ, վաղը պայքարը կսկսեն հունահռոմեական ըմբիշներ՝ Օլիմպիական չեմպիոն Արթուր Ալեքսանյանը և Կարապետ Չալյանը։ 77 կգ քաշային կարգում Չալյանը պայքարը կսկսի 1/8 եզրափակչից, որտեղ կմրցի ուզբեկ Յալգաշբայ Բերդիմուրադովի հետ:
Հաջողության հասնելու դեպքում մեր ըմբիշը քառորդ եզրափակիչում կմրցի Ալֆոնսո Անտոնիո Լեյվա Յեպես (Մեքսիկա)-Ալեքսանդր Չեխիրկինի (Ռուսաստան) զույգի հաղթողի հետ: 97 կգ քաշային կարգում էլ Արթուր Ալեքսանյանը քառորդ եզրափակիչ դուրս գալու համար կգոտեմարտի Ղրղզստանի ներկայացուցիչ Ուզուր Ջուզուբեկովի հետ: Այս զույգի հաղթողը քառորդ եզրափակիչում կմրցի Ռոսիլիո Քինդ (Կուբա) – Արվի Սավոլայնեն (Ֆինլանդիա) դիմակայության հաղթողի հետ: Մեկնարկային գոտեմարտերը կսկսվեն Երեւանով առավոտյան 06։30-ից։ Այս քաշային կարգերում եզրափակիչները տեղի կունենան օգոստոսի 3-ին։ Հույս ունենք, որ վաղը մեր երկու ներկայացուցիչները կապահովեն մեդալներ։ Գալիք շաբաթը վճռորոշ է լինելու մեր օլիմպիական համար։ Մասնավորապես, պայքարի մեջ են մտնելու մեր բոլոր ուժեղագույն մարզիկները՝ մեդալի բոլոր հավակնոդները։ Վաղը մարմնամարզության հենացատկ ձևի եզրափակչում ելույթ կունենա Արթուր Դավթյանը, որը որակավորման փուլում ցույց էր տվել առաջին արդյունքը։ Դավթյանի ելույթը սկսկվի Երևանի ժամանակով 13։51-ին։
Օգոստոսի 3-ին ծանրամարտի 109 քաշային կարգում ելույթ կունենա աշխարհի չեմպիոն Սիմոն Մարտիրոսյանը, ինչպես նաև բռնցքամարտիկ Հովհաննես Բաչկովը։ Վերջինս քառորդ եզրափակիչը հաղթահարելու դեպքում կապահովի առնվազն բրոնզե մեդալ։ Նույնը օրը ասպարեզ դուրս կգան նաև եռացատկորդ Լևոն Աղասյանը և ըմբիշ Կարեն Ասլանյանը: Ազատ ոճային ըմբշամարտի մրցումները կսկսվեն օգոստոսին 4-ին։ Այս մարզաձևում մենք չեմպիոնական ակնկալիքներ ունենք Արսեն Հարությունյանից և Վազգեն Թևանյանից։ Հարությունյանը պայքարը կսկսի օգոստոսի 4-ին, իսկ Թևանյանը օգոստոսի 6-ին։
Լիահույս ենք, որ վաղվանից Հայաստանի համար կսկվի ոսկե շաբաթը։ Հիշեցնենք, որ մինչ օրս մեր օլիմպիականներին չի հաջողվել մեդալ նվաճել։
