Նիկոլ Փաշինյանը մայիսի 8-ի առավոտյան գրառում է արել իր ֆեյսբուքյան պաշտոնական էջում, որը վերաբերում է Հայաստանի հանրապետության ժողովրդի ազգային արժեքներին, ըստ իր շարադրման: Փաշինյանը թվարկում է այդ արժեքները, եւ այդ շարքում՝ Հայաստանի հանրապետության պետականության, անկախության, ինքնիշխանության հետ մեկտեղ թվարկում. «Հայաստանի պատմությունը, հայ ժողովրդի բանահյուսությունը. էպոսը, հավատալիքները, լեգենդները, առասպելները: Հայոց լեզուն և գրերը, հայ գրականությունը, ներառյալ թարգմանական գրականությունը, գիտելիքը, գիտությունը: Համահայկական ներուժը, հայկական սփյուռքը: Հայրենիքը, ընտանիքը, անհատը: Հայ առաքելական սուրբ եկեղեցին, Հայ կաթողիկե եկեղեցին, Հայ ավետարանական եկեղեցին. քրիստոնեությունը»: Շարքն իհարկե ավելի երկար է, ներատռում է մի շարք այլ կատեգորիաներ:
Մեջբերածս հատվածը ուշադրության է արժանի նրանով, որ Փաշինյանը փաստացի շոշափում է ավելի վաղ իր իսկ «կոնցեպտով» տարանջատվելիք «իրական» եւ «պատմական» Հայաստանի հասկացությունները, փաստացի մեկտեղելով դրանք: Այդպիսին է գոնե առաջին տպավորությունը, քանի որ Նիկոլ Փաշինյանի հատկկապես վերջիին շրջանի հրապարակային ելույթներում վերը մեջբերված եւ շարադրված հանգամանքները շեշտադրվել են այսպես ասած հակադիր, հակոտնյա տրամաբանությամբ, մեկը մյուսին՝ կամ այսպես ասենք՝ «իրական Հայաստանին» բաց տեքստով կամ լատենտ հակադրման «հայեցակարգով»: Ըստ այդմ, ի՞նչն է պատճառը, որ վարչապետ Փաշինյանը որոշել է մայիսի 8-ի առավոտյան դրանք կարգել մեկ շարքում: Այն, որ դա պարզապես զգայական, պատահական որոշում չէ, կասկածից վեր է:
Բայց՝ ի՞նչ է որոշման մոտիվը: Արդյո՞ք փողոցում ծավալվող շարժումը եւ դրա հանդեպ տեղեկատվա-քարոզչական պայքարը, որ փորձում է մղել Նիկոլ Փաշինյանը: Նա արձանագրել է, որ շարժումը նախկինների կամ ռուսական հետքի հետ ասոցացնելը չի տալիս բավարար արդյունք, հետեւաբար պետք է փորձել որոշակի դիրքորոշումներով չեզոքացնել իր հանդեպ ընդդիմախոսության ու քննադատության որոշակի «հենակետե՞ր»: Թե՞ Նիկոլ Փաշինյանը գրառումով փորձում է ազդակ հղել, որ, չնայած մի կողմից շարժման հետ մղվող փոխադարձ տեղեկատվա-քարոզչական կոշտ պայքարին՝ ինքը պատրաստ է հարկկ եղած դեպքում նաեւ հաղորդակցության: Թե՞ Նիկոլ Փաշինյանը, ժամանակակից «սոցցանցային լեզվով» ասած՝ իր գրառումով «տրոլինգ» է անում:
Հատկանշական է, որ նա գրառումն անում է նախօրեին իր տված մեծ ասուլիսից հետո, որն անկասկած բավականին արագ պատրաստված ասուլիս էր՝ հետեւաբար «օպերատիվ անհրաժեշտություն» ենթադրող, եւ վերջին ամիսների իր հռետորաբանության ֆոնին «անսպասելի» շեշտադրումներով գրառումն անում է Մոսկվա մեկնելուց առաջ: Նա մայիսի 8-ին ՌԴ մայրաքաղաքում մասնակցելու է ԵՏՄ հոբելյանական վեհաժողովին՝ նախագահելու է այնտեղ, որպես ԵՏՄ նախագահող երկրի ղեկավար, եւ հանդիպում է ունենալու ՌԴ նախագահ Պուտինի հետ: Թե ռուսական կողմը, թե Երեւանը հայտարարեցին դրանից առաջ, որ հանդիպման ընթացքում կքննարկվեն հայ-ռուսական հարաբերության շրջանակում կուտակված բոլոր խնդիրները: