Պակիստանի փոխվարչապետ, արտաքին գործերի նախարար Իսհակ Դարը վստահություն է հայտնել, որ Իրանի հետ «Խաղաղություն» գազատարի կառուցումն ավարտին կհասցվի՝ չնայած ԱՄՆ-ի նախազգուշացումներին։ Այս մասին հաղորդում է Dawn պարբերականը։
ԱՄՆ-ն հայտարարել է, որ հավանություն չի տալիս Պակիստան-Իրան գազամուղի նախագծի իրականացմանը, և նախազգուշացրել է պատժամիջոցների վտանգի մասին Թեհրանի հետ բիզնես վարելու դեպքում։
«Մենք պետք է առաջնորդվենք սեփական շահերով և գործենք դրանց համապատասխան՝ անկախ նրանից, թե ինչ են ասում ԱՄՆ-ն կամ այլ երկրներ։ Դա մեզ չի կարող թելադրվել, և մենք ոչ ոքի թույլ չենք տա վետո կիրառել։ Պակիստանն ինքնիշխան պետություն է, մենք հարգում ենք մյուս երկրների ինքնիշխանությունը և ակնկալում ենք, որ մյուսներն էլ հարգեն Պակիստանի ինքնիշխանությունը», – ասել է Դարը Իսլամաբադում կայացած մամուլի ասուլիսում։
Պակիստանի արտգործնախարարը հավելել է, որ բարձր է գնահատում ապրիլին Իրանի նախագահ Էբրահիմ Ռայիսիի՝ Իսլամաբադ կատարած պաշտոնական այցը, որի ընթացքում քննարկվել է «Խաղաղություն» գազատարի կառուցման ավարտի հարցը՝ չնայած աշխարհաքաղաքական խնդիրներին և ամերիկյան հնարավոր պատժամիջոցներին։
Ըստ Իրանի հետ համաձայնության՝ Պակիստանը պարտավորվել էր գազամուղի իր հատվածը կառուցել մինչև 2015 թվականի հունվարը, բայց դրա կառուցումն այդպես էլ չի ավարտվել Թեհրանի նկատմամբ ԱՄՆ պատժամիջոցների և Վաշինգտոնի կողմից գազատարի կառուցման ավարտի մերժման պատճառով: Ապրիլի սկզբին Պակիստանը ձեռնամուխ է եղել գազատարի իր հատվածի կառուցմանը Բելուջիստանի նահանգի Գվադար քաղաքից մինչև Իրանի սահման՝ խուսափելու միջազգային արբիտրաժային դատարանի 18 միլիարդ դոլարի տուգանքից` այդ մայր գազատարի կառուցման և շահագործման ձգձգումների պատճառով:
