Նախօրեին Հայաստանի օլիմպիական հավաքականը համալրվեց ևս մեկ մարզիկով: Հայաստանի աթլետիկայի հավաքականի անդամ եռացատկորդ Լևոն Աղասյանը Թբիլիսում կայացած առաջնության ընթացքում ցատկելով 17,16 մետր լրացրեց օլիմպիական նորմա՝ նվաճելով Տոկիոյի Օլիմպիական խաղերի ուղեգիր: Մինչ այս Օլիմպիական խաղերի ուղեգիր էին նվաճել ըմբիշներ Արթուր Ալեքսանյանը, Կարապետ Չալյանը, Արսեն Հարությունյանը, Վազգեն Թևանյանը, Արմեն Մելիքյանը, Կարեն Ասլանյանը, բռնցքամարտիկ Կորյուն Սողոմոնյանը, մարմնամարզիկներ Արթուր Դավթյանը: Այսպիսով Հայաստանի օլիմպիական հավաքականն այս պահին բաղկացած է 9 մարզիկներից։ Մոտ մեկ ամիս ՀԱՕԿ գլխավոր քարտուղար Հրաչյա Ռոստոմյանը հույս էր հայտնել, որ մեր հավաքականի վերջնական կազմում կլինեն 12-14 օլիմպիականներ։ Ներկայում օլիմպիական ուղեգրեր ակնկալում ենք մեր բռնցքամարտիկներից։ Մասնավորապես այսօր Փարիզում մեկնարկել է օլիմպիական վարկանիշային այն մրցաշարը, որը կորոնավիրուսի համավարակի պատճառով անավարտ էր մնացել դեռևս նախորդ տարվա մարտին: Մերոնցից դուրս կգան 52 կգ քաշային Կորյուն Սողոմոնյանը, 63 կգ քաշային Հովհաննես Բաչկովը, 75 կգ քաշային Արման Դարչինյանը, 81 կգ քաշային Գոռ Ներսիսյանը, 91 կգ քաշային Նարեկ Մանասյանը, գերծանր քաշային Գուրգեն Հովհաննիսյանը և 69 կգ քաշային Անի Հովսեփյանը:
Նրանք այն մարզիկներն են, ովքեր մասնակցել են Լոնդոնում կիսատ մնացած մրցաշարին: Կորյուն Սողոմոնյանը որն արդեն նվաճել է օլիմպիական խաղերի ուղեգիր մրցավայր է մեկնել մեդալակիր դառնալու հույսով: Այսօր հայտնի դարձավ, որ 75 կգ քաշային Արման Դարչինյանի մրցակիցը՝ Իռլանդիան ներկայացնող Միշել Նեյվինը, չի ժամանել Փարիզ և մեր մարզիկին կշնորհվի հաղթանակ: Դարչինյանը պետք է մենամարտեր այսօր ,սակայն հաջորդ մենամարտը կանցկացնի հունիսի 6-ին՝ վրացի Գեորգի Կխարաբաձե և Ֆինլանդիան ներկայացնող Մուհամեդ Աբդիլռասոն զույգի հաղթողի հետ: Այդ մենամարտում հաղթելու դեպքում Դարչինյանը կնվաճի օլիմպիական ուղեգիր: Այսօր մենք ռինգում կունենանք մեկ ներկայացուցիչ: 81 կգ քաշային Գոռ Ներսիսյանը ուժերը կչափի Խորվաթիան ներկայացնող Լուկա Պլանտիչի հետ: Այս մրցաշարում սպասելիքները մեծ են Հովհաննես Բաչկովից, ում տեսնում ենք նաև օլիմպիական խաղերում մրցանակակիր դառնալու իրական հավակնորդ։ Ինչևէ, վերլուծելով մեր մարզիկների հնարավորությունները կարող ենք արձանագրել, որ հուլիսի 23-ին մեկնարկելիք Օլիմպիական խաղերում Հայաստանի հավաքականը կունենա առավելագույնը 15 մարզիկ։ «Հունիսի 10-12-ին հայտնի կդառնա՝ կունենանք ևս մեկ-երկու տեղ, թե ոչ: Ամեն դեպքում Օլիմպիական խաղերին պատրաստվում ենք պահեստայիններով՝ երկու տղա, երկու աղջիկ:
Պատրաստվում են՝ Սիմոն Մարտիրոսյանը, Գոռ Մինասյանը, Իզաբելա Յայլյանը, Տաթեւիկ Հակոբյանը»,- օրեր առաջ ասել էր ծանրամարտի Հայաստանի հավաքականի գլխավոր մարզիչ Փաշիկ Ավալերդյանը: Հիշեցնենք, որ դոպինգ սկանդալում ներքաշված լինելու պատճառով Հայաստանի ծանրամարտի հավաքականին Օլիմպիական խաղերում հատկատված է ընդամենը մեկ տեղ։ Նշենք, որ 2016 թվականին Ռիոյում կայացած նախորդ օլիմպիական խաղերում Հայաստանի հավաքականը կազմված էր 33 մարզիկներից։ Ինչ խոսք, համեստ կազմ ունենալու գլխավոր պատճառը կորոնավիրուսի համավարակն է, որի պատճառով անցյալ տարի հետաձգվեցին թե՛ աշխարհի և Եվրոպայի առաջնությունները, թե՛ վարկանիշային մրցաշարերը։ Ամեն դեպքում կարող ենք ասել, որ նախորդ օլիմպիադայի համեմատ այս անգամ Հայաստանի հավաքականի կազմը երկու անգամ ավելի փոքր կլինի։ Հիշեցնենք, նաև, որ Նախորդ Օլիմպիադայում Հայաստանը նվաճել էր 4 մեդալ՝ մեկ ոսկե և երեք արծաթե։ Օլիմպիական չեմպիոն էր դարձել Արթուր Ալեքսանյանը, իսկ Միհրան Հարությունյանը, Սիմոն Մարտիրոսյանը և Գոռ Մինասյանը նվաճել էին արծաթե մեդալ։ 5 տարի անց մեր գլխավոր հույսը կրկին Արթուր Ալեքսանյանն է։
Աշխարհի չեմպիոն Սիմոն Մարտիրոսյանի հետ կապված վերջին միջադեպից հետո դժվար է ասել՝ այս մարզիկը կմեկնի՞ Տոկիո, թե՞ ոչ։ Համենայնդեպս, տեղի ունեցածից հետո Մարտիրոսյանի համար մեծ մրցաշարին պատշաճ նախապատրաստվելը դժվար կլինի նաև հոգեբանորեն:
