Հայաստանի VBET Պրեմիեր լիգայի 5-րդ տուրի հետաձգված խաղում Երևանի «Արարատը» կարևոր հաղթանակ տարավ՝ 1։0 հաշվով առավելության հասնելով «Արարատ-Արմենիայի» նկատմամբ։ Այս խաղից առաջ «Արարատը» 21 միավորով գլխավորում էր մրցաշարային աղյուսակը։ Նույնքան միավոր ուներ նաև գործող չեմպիոն «Արարատ-Արմենիան»։
Արարատյան դերբին, բացի սկզբունքային լինելուց, պայքար էր առաջատարի դիրքերի համար։ Տևական ժամանակ Հայաստանի առաջնությունում չկար միանձնյա առաջատար, ուստի երեկվա մրցավեճը կարող է նաև բեկումնային դառնալ չեմպիոնի կոչման համար պայքարում։ Ընդհանուր առմամբ ականատեսը եղանք լարված և դինամիկ պայքարի։ Գոլային պահերով «Արարատը» որոշակի առավելություն ուներ։ «Արարատ-Արմենիան» ուներ թերևս մեկ իրական գոլային հնարավորություն։
Առանձնացնենք թերևս արարատյան դերբիի ուշագրավ դրվագները։ Արդեն առաջին կեսում վնասվածք ստացան «Արարատի» հարձակման գծի առաջատարներ Ուրոշ Նենադովիչը և Մորի Կոնեն։ Թվում էր, թե երկրորդ կեսում «Արարատ-Արմենիան» լուրջ առավելություն կստանա, բայց… Փոխարինման դուրս եկած Զավեն Բադոյանը և Դմիտրի Պոբուլիչը, որակյալ խաղ ցուցադրելուց զատ, նոր շունչ հաղորդեցին «Արարատի» հարձակման գծին։ Հենց Պոբուլիչը դարձավ «Արարատի» հաղթական գոլի հեղինակ։
Առանձնակի ուշադրության է արժանի նաև «Արարատի» կիսապաշտպան Աղվան Պապիկյանի խաղը։ Ըստ էության հենց Պապիկյանը ստեղծեց գոլային դրվագը։ Պոբուլիչը գրավեց մրցակցի դարպասը հենց Պապիկյանի փոխանցումից հետո։ Ի դեպ, երկրորդ խաղում անընդմեջ Պապիկյանը կատարում է գոլային փոխանցում։ Ուրախալի է, որ մարտի 25-ին մեկնարկելիք աշխարհի առաջնության ընտրական փուլին ընդառաջ մեր ազգային հավաքականի թեկնածուն արդյունավետ և որակյալ խաղ է ցուցադրում։ Հիշեցնենք, որ Հայաստանի ազգային հավաքականի գլխավոր մարզիչ Խոակին Կապառոսը Պապիկյանին հրավիրել էր մասնակցելու Ազգերի լիգայի խաղարկության Վրաստանի և Հյուսիսային Մակեդոնիայի հետ վերջին հանդիպումներին։ Կորոնավիրուսի դրական թեստի պատճառով, սակայն, այս ֆուտբոլիստը չէր միացել մեր ազգային թիմին։
Առաջնության վերջին երեք հանդիպումներում «Արարատը» տոնել է նույնքան հաղթանակ։ Վերջին անգամ երևանյան թիմը պարտվել է 2020 թվականի հոկտեմբերի 26-ին՝ 9-րդ տուրում հյուրընկալվելիս 1։0 հաշվով զիջելով Վանաձորի «Լոռիին»։ Խփած գոլերի քանակով (17) «Արարատն» այս պահին երկրորդն է, իսկ թիմի խաղացողներից երկուսն առաջնության լավագույն ռմբարկուների հնգյակում են: Ամենաշատն աչքի է ընկել Ուրոշ Նենադովիչը: Վերջինս խփել է 5 գոլ, իսկ ահա Մորի Կոնեն իր ակտիվում ունի 4 գոլ:
«Արարատից» 2 գնդակ ավելի է խփել Երևանի «Նոան», որն այս պահին 19 միավորով 5-րդ հորիզոնականում է գտնվում։ Ինչ վերաբերում է «Արարատ-Արմենիային», ապա պետք է նշենք, որ ունենալով բավական ուժեղ կազմ՝ այս թիմը դեռևս չի ցուցադրում այն ֆուտբոլը, որն ակնկալում են երկրպագուները։ Այս երևույթը պայմանավորված է նաև ձմեռային տրանսֆերային պատուհանի ընթացքում թիմի կազմում տեղի ունեցած փոփոխություններով։ Ամեն դեպքում «Արարատ-Արմենիան» ունի մեծ ներուժ, որը կարող է օգտագործել մրցաշրջանի գարնանային հատվածում։ Վերջերս «Արարատ-Արմենիային» միացավ Հայաստանի ազգային հավաքականի հարձակվող Ալեքսանդր Կարապետյանը, ով նորամուտի խաղում հաղթանակ պարգևեց իր նոր թիմին։ Հիշեցնենք, որ օրեր առաջ «Արարատ-Արմենիան» 6-րդ տուրի հետաձգված խաղում 2։1 հաշվով առավելության էր հասել «Փյունիկի» նկատմամբ։
Ինչևէ, այս պահին մրցաշարային աղյուսակը 24 միավորով գլխավորում է «Արարատը», որն անցկացրել է 12 հանդիպում։ Երկրորդ հորիզոնականում գտնվող «Արարատ-Արմենիան» ունի 21 միավոր։ Նշենք, սակայն, որ այս թիմը մեկ հանդիպում ավելի քիչ է անցկացրել։ 11 խաղում 21 միավոր է վաստակել նաև «Ալաշկերտը», որը վերջին խաղում նվազագույն հաշվով առավելության հասավ «Լոռիի» նկատմամբ։ Փաստորեն, կորցրած միավորների քանակով «Արարատ-Արմենիան» և «Ալաշկերտը» կարող են հավասարվել առաջատարին։
Մրցաշարային աղյուսակի վերին հատվածում իրավիճակը շարունակում է թեժ մնալ։ 4-րդ հորիզոնականում գտնվող «Լոռին» 12 խաղում վաստակել է 20 միավոր։ Մարտի 1-ին «Արարատը» կմրցի «Վանի» հետ և հաղթանակի դեպքում կամրապնդի դիրքը։ «Արարատ-Արմենիան» մարտի 2-ին հյուրընկալի «Ուրարտուին», իսկ «Ալաշկերտը» փետրվարի 28-ին սեփական հարկի տակ կմրցի «Լոռիի» հետ։
