Առցանց օլիմպիադայում Հայաստանի հավաքականի Հայաստանի բոյկոտը մեծ աղմուկ է բարձրացրել շախմատային աշխարհում։ Հիշեցնենք, որ օլիմպիադայի քառորդ եզրափակչի Հնդկաստանի դեմ մրցամարտում տեղի էր ունեցել տեխնիկական խնդիր, որն այնուհետև մեծ սկանդալի շարժառիթ դարձավ։ Մասնավորապես 2,5 – 2,5 հաշվի ժամանակ մրցաշարի հարթակ հանդիսացող Chess.com կայքում առաջացած տեխնիկական խնդրի հետևանքով Հայկ Մարտիրոսյանի կատարված քայլը չէր գրանցվել և համարվել էր տեխնիկական պարտություն: Դիրքը, որի ժամանակ սպառվել էր նրա ժամանակը, ամբողջովին հավասար էր և ավարտվելու էր ոչ-ոքի:
Հայաստանի շախմատի ֆեդերացիան պաշտոնապես բողոքարկել էր որոշումը, սակայն շուրջ երկու ժամ տևած քննարկումից հետո ՖԻԴԵ-ն մերժել էր բողոքը, որի արդյունքում Հայաստանի հավաքականը առաջին մրցախաղում պարտվել էր: Ի դեպ, ֆեդերացիայի տեխնիկական մասնագետները ապացուցել էին, որ Հայաստանի հավաքականի մոտ ամբողջ ընթացքում եղել է ինտերնետ, Հայկ Մարտիրոսյանը միացված է եղել Zoom տեսազանգին և եթե խնդիրը լիներ ինտերնետի բացակայությունը մեր կողմում, ապա նա չէր գտնվի նաև Zoom զանգի մեջ: Մեր տեխնիկական մասնագետները նշել էին նաև, որ ֆեդերացիան ունի երկու ինտերնետի հասանելիության գիծ և եթե մեկ գիծը խափանվում է, անմիջապես միանում է մյուսը և այդ դեպքում փոխվում է IP հասցեն: Chess.com կայքը հաստատել էր, որ IP հասցեի փոփոխություն չի եղել, Հայկ Մարտիրոսյանը միշտ ունեցել է համացանց, սակայն իրենց համար անհասկանալի պատճառով նրա քայլերը չեն գրանցվել: Հայկական կողմի փաստարկներին չներկայացնելով որևէ իրական հակափաստարկ՝ ՖԻԴԵ-ն մերժել էր Հայաստանի շախմատի ֆեդերացիայի բողոքը:Հայաստանի հավաքականի անդամները այն կարծիքին էին, որ կայացված որոշումը ակնհայտ անարդար է, և նման պայմաններում մեր թիմը չի կարող շարունակել հետագա մասնակցությունը մրցաշարին: Թիմը որոշել էր բոյկոտել Հնդկաստանի հետ 2-րդ մրցախաղը:
Հայաստանի շախմատի ֆեդերացիան մրցաշարի հարթակ հանդիսացող chess.com կայքից պահանջել է կայքի ծանրաբեռնվածության հետ կապված որոշակի տվյալներ, սակայն մինչ այժմ պատասխան չի ստացել: Հիմա արդեն կարող ենք արձանագրել տեղի ունեցածի հետևանքով ըստ էության տապալվել է առցանց օլիմպիադան, որն ի դեպ անց է կացվում առաջին անգամ և նոր ձևաչափով։ Ի դեմս Հայաստանի ազգային հավաքականի մրցաշարը ժամանակից շուտ կորցրեց ուժեղագույն հավաքականներից մեկին։ Ավելին, մեր կողմից ներկայացված ապացույցներին չներկայացնելով հիմնավոր հակափաստարկներ ՖԻԴԵ-ն էապես հեղինակազրկվեց մարզասերների շարքերում։ Պատկերացնենք ինչ տեղի կունենար, եթե օրինակ ֆուտբոլի աշխարհի առաջնության ժամանակ ասենք Իտալիայի հավաքականը ՖԻՖԱ-ի բացահայտ սխալի պատճառով արդարացիորեն լքեր պայքարը։
Կարծում ենք պատասխանը պարզ է։ Նույնը տեղի ունեցավ ՖԻԴԵ-ի հովանու ներքո անցկացվող հավաքականների մակարդակով ամենահեղինակավոր մրցաշարում։ Հուսանք, որ առաջիկայում ՖԻԴԵ-ն շախմատային աշխարհին հիմնավոր պարզաբանումներ կներկայացնի տեղի ունեցածի վերաբերյալ։