Եվրագավաթների 2020/2021 թթ խաղարկությանն ընդառաջ ՈւԵՖԱ-ն ընդունել է կարևորագույն մի որոշում։ Մասնավորապես, եվրագավաթային նոր մրցաշրջանում պարտադիր է դարձել չարտերային թռիչքները թիմերի համար: Որպեսզի բոլոր թիմերը հավասար պայմաններում լինեն, ՈՒԵՖԱ-ն կփոխհատուցի չարտերային թռիչքների գումարը: Յուրաքանչյուր թռիչքի համար նախատեսված է թիմին հատկացնել 40 հազար եվրո:
Չեմպիոնների լիգայի և Եվրոպա լիգայի վիճակահանությունից հետո մտավախություն կար, որ կորոնավիրուսի համավարակի հետևանքով առկա սահմանափակումների պայմաններում թիմերը հնարավորություն չեն ունենա մեկնել մրցավայր։ Նշենք, որ եվրոպական մի շարք երկրներում չեն իրականացվում քաղաքացիական ավիացիայի չվերթներ։ Եվրոպա լիգայի վիճակահանության արդյունքում հայկական երկու ակումբներ մրցելու են դուրսը։ Մասնավորապես Գյումրիի «Շիրակը» Ռումինիայում խաղալու է «Ստյաուայի», իսկ Հայաստանի փոխչեմպիոն «Նոան»՝ Ղազախստանում՝ «Կայրաթի» հետ: Խոսվում էր, որ մեր երկու թիմերը ստեղծված իրավիճակում հնարավոր է չկարողանան հասնել մրցավայր։ Իր այս որոշմամբ ՈւԵՖԱ-ն կվերակենդանացնի ակումբային ֆուտբոլը։ Այն իրական նվեր է հատկապես համեստ հնարավորություններ ունեցող թիմերի համար։
Հիշեցնենք, որ եվրագավաթների խաղարկության որակավորման փուլի դիմակայությունները կայանալու են մեկ խաղով։ Բոլորովին այլ իրավիճակ է հավաքականների հարթությունում։ Ազգերի լիգայի խաղարկությունում Հայաստանի հավաքականը առաջիկա հանդիպումը պետք է անցկացնի սեպտեմբերի 5-ին՝ Հյուսիսային Մակեդոնիայի հետ, մրցակցի հարկի տակ, իսկ սեպտեմբերի 8-ին մեր թիմը Երևանում ընդունելու է Էստոնիային: Այսօր մատների վրա կարելի է հաշվել շաբաթվա ընթացքում դեպի Երևան չվերթները։ Դեռևս հայտնի չէ, թե երբ կվերականգնվեն կանոնավոր ավիափոխադրումները Եվրոպայում և աշխարհում։ Այսինքն՝ ինչպե՞ս են մոտ երկու շաբաթից ազգային հավաքականի ֆուտբոլիստները միանալու իրենց հավաքականներին։ Ինչպե՞ս են մեր հավաքականի մոտ երկու տասնյակ լեգեոներները օգոստոսի վերջին ժամանելու Երևան։
Դժվար գտնվի մեկը, ով կարողանա պատասխանել այս հարցին։ Այսօր ուղղակի չկան նախադրյալներ, որ մեկ ամիս քաղաքացիական ավիափոխադրումները կգործեն բնականոն ընթացքով։