Ռուս մասնագետ Իգոր Կոլիվանովը հեռացել է Երևանի «Արարատի» գլխավոր մարզչի պաշտոնից։ Այս մասին գրում են ռուսական ԶԼՄ-ները՝ նշելով, որ Կոլիվանովի և երևանյան ակումբի միջև պայմանագիրն ավարտվել է մայիսի 30-ին և որոշում է կայացվել այն չերկարաձգել։ 52-ամյա մարզիչը հայկական ակումբը գլխավորել էր այս տարվա հունվարին: «Արարատն» այժմ զբաղեցնում է հինգերորդ տեղը Բարձրագույն խմբի մրցաշարային աղյուսակում ՝ վեց միավորով զիջելով առաջատար «Արարատ-Արմենիա»-ին : Այս տարվա ապրիլի 12-ին ռուսական մամուլը կրկին տեղեկություն էր տարածել Կոլիվանովի «Արարատից» հեռանալու մասին, որը սակայն հերքվել էր։ «Մամուլում լուրեր են տարածվել այն մասին, որ «Արարատի» գլխավոր մարզիչ Իգոր Կոլիվանովը կարող է լքել զբաղեցրած պաշտոնը: Ակումբը լիովին վստահում է թիմի գլխավոր մարզչին: Փորձառու մասնագետը վայելում է ամբողջ ակումբի վստահությունը և շարունակելու է աշխատանքը «Արարատում»»,- մասնավորապես ասված էր հայտարարության մեջ։
Նշենք, որ Կալիվանովը Ռուսաստանի լավագույն մասնագետներից է։ Մարզչական կարիերայի ընթացքում Կոլիվանովն աշխատել է «Ուֆայում» , Մոսկվայի «Տորպեդոյում», մարզել է Ռուսաստանի Մ17, Մ19 և երիտասարդական հավաքականները։ Ռուսաստանի մինչև 17 տարեկանների հավաքականի հետ դարձել է Եվրոպայի չեմպիոն։ Ինչևէ, ապրիլի սկզբին ռուսաստանաբնակ գործարար, ռուսական մեդիաշուկայի հայտնի ֆիգուրներից՝ Արամ Գաբրիելյանովը ֆեյսբուքյան իր էջում աղմկահարույց գրառում էր կատարել՝ լուրջ մեղադրանքներ ներկայացնելով Երևանի «Արարատի» սեփականատեր Վարդան Սրմաքեշին։ Մասնավորապես, Գաբրիելյանովը Սրմաքեշին մեղադրել էր տարիներ շարունակ ֆուտբոլիստներին աշխատավարձ չվճարելու, ակումբը ծայրահեղ ծանր վիճակում հասցնելու, ինչպես նաև «Արարատին» պատկանող տարածքները վաճառելու մեջ։ Նշենք նաև, որ Գաբրիելյանը տարիներ առաջ Մոսկվայի «Արարատ» թիմի սեփականատերն էր, փորձում էր ակտիվ գործունեություն ծավալել նաև ֆուտբոլային ասպարեզում։ Գաբրիելյանովը հավակնություններ է ունեցել նաև ակումբում։ Սրմաքեշի հասցեին հնչած մեղադրանքներից հետո Գաբրելյանովը բավական կոշտ պատասխանի էր արժանացել Երևանի «Արարատ» ֆուտբոլային ակումբի կողմից։
«ՖԱ «Արարատը» շատ լավ վիճակում է: ՀՖՖ կողմից արդար, թափանցիկ և արդյունավետ կազմակերպված այս առաջնությունում ակումբը լավ արդյունքներ է գրանցում, և լավագույն վեցնյակ մեր մուտքը երաշխավորված է: Երկրորդ փուլի համար թիմը հզորացրել ենք հինգ օտարազգի խաղացողներով: ՖԱ «Արարատում» իրավիճակը լավ է, այն բնականոն զարգացման հունի մեջ է, և այս ընթացքը շարունակվելու է առաջիկա մրցաշրջաններում: Իսկ թե ով կզբաղեցնի այս տարվա առաջնության 1-3-րդ հորիզոնականները, թող որոշի արդար խաղը: Որպես վերջաբան, Արամ Գաբրիելյանովը թող հույս չունենա, որ երբևէ կստանձնի ՖԱ «Արարատի» մենեջմենթը: Իրեն հորդորում ենք այս անգամ էլ հիմնել մի նոր` «Արարատ-Աշխարհ» («Ararat World» FC) անունով ՖԱ: Այդ ակումբը բնականաբար կունենա բազայի կարիք. օրինակ կարող է վճարել ու ՀՖՖ-ից գնել «Ավան Ակադեմիան», կամ ավելի էժան տարբերակ` կարող է գնել Հայաստանի մարզերում ֆեդերացիայի կողմից ստեղծվող բազաներից մեկը: Իսկ դրանից հետո` իրենց մաղթում ենք բարի երթ Հայաստանի արդար ֆուտբոլային առաջնության ժամանակ», -ասված էր հայտարարության մեջ: Իրադարձությունների նման զարգացումները ստիպել էին ենթադրել, որ Երևանի «Արարատում» ունեցած հավակնությունների չիրականանալուց հետո Արամ Գաբրիելյանովը փորձում է այլ լծակներ օգտագործել երևանյան ակումբի դեմ։
Խոսվում էր, որ ռուսական մեդիաշուկայի առանցքային դեմքերից մեկը օգտագործում է իր ձեռքի տակ առկա հիմնական գործիքներից մեկը՝ մեդիադաշտը։ Կարճ ասած շատերը վստահ էին, որ առաջացած լարվածության արդյունքում ռուսական մեդիայի որոշակի շրջանակներ գրոհ են սկսել ընդդեմ Երևանի «Արարատի»։ Ապրիլին Կալիվանովի թիմի հեռանալու կեղծ տեղեկատվությունը դիտվում էր գրոհի դրսևորումներից մեկը։ Բայց արի ու տես, որ մոտ երկու ամիս անց Կալիվանովը կարծես թե հեռացավ երևանյան ակումբից։ «Արարատը» գլխավոր մարզչի հեռանալու վերաբերյալ տեղեկությունը չի հերքել։ Ավելին, տեղեկություններ չեն եղել նաև Կալիվանովի Երևան վերադառնալ չվերադառնալու մասին։ Հիշեցնենք, որ կորոնավիրուսի համավարակի պատճառով Հայաստանի առաջնությունը 2 ամսով ընդհատվել էր և ռուս մասնագետը վերադարձել էր հայրենիք։ Ի՞նչ է իրականում տեղի ունենում «Արարատում»։ Վերջինս առաջնությունը բավական հաջող էր սկսել և գլխավորում էր մրցաշարային աղյուսակը։ Երեկ «Արարատը» մրցեց «Ալաշկերտի» հետ և դժգույն խաղաով պարտվեց 2։1 հաշվով։
Ընդ որում երկրորդ կեսի սկզբից «Ալաշկերտը» խաղում էր 10 ֆուտբոլիստներով։ Հիմա էլ թիմը հնարավորություն ունի նույնիսկ չեմպիոնության համար պայքարելու, բայց․․․։ Ինչպես միշտ «Արարատում» տեղի են ունենում անհասկանալի բաներ, որոնք տրամաբանելը կամ մեկնաբանելը բավական դժվար է։ Եթե Կալիվանովի «Արարատից» հեռանալու տեղեկությունը պաշտոնապես հաստատվի, ապա հայկական ամենատիտղոսակիր ակումբը կթարմացնի մարզիչների փոփոխության իր իսկ սահմանած ռեկորդը։ Այս խնդրին կանդրադառնանք առաջիկայում։
