Ամերիկայի գավաթի խաղարկության կիսաեզրափակիչում Պարագվայի հավաքականը ետխաղյա 11-մետրանոց հարվածներով պարտության մատնեց Վենեսուելային և 1979 թ. ի վեր առաջին անգամ դուրս եկավ եզրափակիչ:
Խաղի հիմնական և լրացուցիչ ժամանակն ավարտվեց ոչ-ոքի՝ 0:0 հաշվով, իսկ 11-մետրանոց հարվածաշարն ավելի լավ իրացրին պարագվայցիները և հաղթեցին 5:3 հաշվով:
Ամբողջ հանդիպումն անցավ Վենեսուելայի բացահայտ խաղային առավելությամբ: Եթե քառորդ եզրափակիչում Պարագվայը բրազիլացիներին հաղթեց հրաշագործ Խուստո Վիլյարի անհավանական խաղի շնորհիվ, ապա կիսաեզրափակիչում արդեն Վիլյարի ընկերներն էին վերջինիս օգնության հասնում. գնդակը 3 անգամ հետ մղվեց դարպասաձողից: Այդուհանդերձ, Վիլյարն իր խոսքն ասաց. Լուսենոյի կատարած 11-մետրանոց հարվածից հետո հենց նրա սեյվը հաղթանակ բերեց Պարագվային:
Հիշեցնենք, որ Copa America-ի եզրափակիչի առաջին ուղեգիրը ձեռք էր բերել Ուրուգվայի հավաքականը, որը 1 օր առաջ 2:0 հաշվով առավելության էր հասել Պերուի հավաքականի նկատմամբ:
Պարագվայի հավաքականը Ամերիկայի գավաթը նվաճել է երկու անգամ, վերջինը՝ 1979 թվականին, այդուհետ անգամ եզրափակիչ դուրս չի եկել: Ուրուգվայը 14 անգամ է տիրացել գավաթին, նույնքան անգամ հաղթել է նաև Արգենտինան, նրանցից շատ ոչ մի հավաքական չի հաղթել:
