Ֆուտբոլի Հայաստանի ազգային հավաքականի և «Փյունիկի» կիսապաշտպան Արաս Օզբիլիսը լրագրողների հետ հանդիպմանը աղմկահարույց մի հայտարարությամբ հանդես եկավ:
«Եթե Թովմաս Գրիգորյանը կարող է խաղի ժամանակ կապիկ անվանել մեր խաղացողին ու չպատժվել, ապա Էրիկ Վարդանյանն էլ պետք է չպատժվի: Երեկ բոլորը տեսան Էրիկ Վարդանյանի մասնակցությամբ միջադեպը. դա սխալ է, և Էրիկը հասկանում է դա: Նա գիտի, որ մեղավոր է, սակայն կցանկանայի անդրադառնալ «Լոռիի» դեմ արտագնա խաղում տեղի ունեցած միջադիպին: 73-րդ րոպեին մրցավարի սուլիչից հետո հայհոյանքներ էին լսվում տրիբունայից, բայց ոչ ոք չպատժեց դրա հեղինակին: Եթե նրան չեն պատժում, ապա Էրիկ Վարդանյանին ևս պետք է չպատժեն: Դրանից հետո 76-րդ րոպեին լսում էինք, որ ասում էին՝ կոտրեք այդ կապիկի ոտքերը՝ նկատի ունենալով Էրիկ Վարդանյանին: Հետո նույն մարդը Հայաստանի հավաքականի ինքնաթիռով գալիս է մեզ հետ, որպեսզի երկրպագի՞ ազգային թիմին»,- նշել էր Օզբիլսը: Նշենք, որ Թովմաս Գրիգորյանը հանդիսանում է «Լոռի» ֆուտբոլային ակումբի նախագահը:
«Առաջին Լրատվական»-ի տրամադրության տակ է հայտնվել փաստաթուղթ, որում ՀՖՖ-ի Կարգապահական և էթիկայի կոմիտեի նախագահ Ռուբեն Սինոյանը նամակով դիմել է ՀՖՖ-ի նախագահ Արթուր Վանեցյանին, որպեսզի Գրիգորյանի նկատմամբ պատժամիջոց կիրառվի: Նամակը հղելու պահից արդեն անցել է մոտ 3 շաբաթ, բայց Վանեցյանը ինչպես մի շարք այլ հարցերում շարունակում է լռել: Արդյունքում «Լոռի» ակումբի նախագահը շարունակում է աչքի ընկել ոչ կոռեկտ պահվածքով: Մասնավորապես, հոկտեմբերի 26-ին Վանաձորում տեղի ունեցած «Լոռի»-«Գանձասար Կապան» խաղում Թովմաս Գիգորյանը կրկին հայհոյանքներ է հնչեցրել հայտնվելով երկրպագուների ուշադրության կենտրոնում:
Մեր տեղեկություններով՝ Թովմաս Գրիգորյանը ջերմ հարաբերությունների մեջ է Արթուր Վանեցյանի հետ, և վերջինս բացահայտ կերպով այսպես ասած «պահում է» նրան: Ու, փաստորեն, այն պնդումները, որ ԱԱԾ-ի տնօրեն եղած ժամանակ Վանեցյանը «պահել է» իր մերձավորներին՝ թույլ չտալով, որ նրանց գործողություններն իրավական գնահատականի արժանան, ավելի իրատեսական են դառնում: Ըստ էության նույնը տեղի է ունենում ֆուտբոլում, որտեղ բարդակային վիճակն օր օրի ավելի է խորանում: