Թաիլանդի Պատայա քաղաքում ընթացող ծանրամարտի աշխարհի առաջնությունում Հայաստանի հավաքականն առաջին ձախողումն ունեցավ: Տղամարդկանց 81 կգ քաշային կարգում Անդրանիկ Կարապետյանը դասվում էր չեմպիոնի կոչման գլխավոր ֆավորիտների շարքում: Պոկում վարժության առաջին մոտեցմանը Կարապետյանը գլխավերևում պահեց 168 կգ, այնուհետ չկարողացավ երկու մոտեցմամբ բարձրացնել 172 կգ: Հայ ծանրորդը նվաճեց փոքր բրոնզե մեդալ: Հրում վարժությունում Անդրանիկ Կարապետյանը տապալեց բոլոր երեք մոտեցումներն էլ՝ չբարձրացրեց 195 կգ: Կարապետյանը երկամարտում զրո ստացավ:
Ինչ խոսք, ծանրամարտում ձախողումներից կամ 0-ական արդյունքից ոչ ոք ապահովագրված չէ, բայց… Այն, ինչ տեղի է ունենում Կարապետյանի հետ նշանակալի մրցաշարերում, դժվար է տրամաբանել: Մասնագետները այս ծանրորդին համարում են տաղանդավոր, իսկ Հայաստանի հավաքականի մարզչական շտաբն ամեն ինչ անում է լուրջ արդյունքներ գրանցելու համար:
Այս տարվա ապրիլին Բաթումում տեղի ունեցած Եվրոպայի առաջնությունում Կարապետյանը ևս չեմպիոնի կոչման գլխավոր հավակնորդների շարքում էր: Մեր ծանրորդին, սակայն, թույլ չտվեցին մասնակցել մրցմանն անձնական ավելի քաշ ունենալու պատճառով: Սա ուղղակի աբսուրդ էր: Բայց ավելի աբսուրդային էին հայկական կողմի պատճառաբանությունները տեղի ունեցածի վերաբերյալ: Մասնավորապես, նշվում էր, որ մրցումից առաջ հյուրանոցի կշեռքը ցույց է տվել, որ Կարապետյանն անձնական քաշի հետ կապված խնդիրներ չի ունեցել: Գլխավոր իրադարձությունները տեղի էին ունեցել արդեն մարզադահլիճում: «Անդրանիկ Կարապետյանի առաջին կշեռքից հետո տեսանք, որ քաշն ավելի է, և նա ուղևորվեց շոգեբաղնիք՝ քաշ գցելու: Երկրորդ կշեռքի ժամանակ Իսրայելը ներկայացնող մրցավարն ասաց՝ Ok, ինչից հետո Անդրանիկը կարծեց, թե ամեն բան նորմալ է, և ջուր խմեց. դա ավելացրեց նրա քաշը: Երբ ես սկսեցի գրել պոկում և հրում վարժությունների հայտերը, այդ մրցավարն ասաց, որ կա քաշի հետ կապված խնդիր, բայց Անդրանիկն արդեն 500 գրամ ջուր էր խմել: Դրանից հետո արդեն շոգեբաղնիքն էլ չօգնեց մեզ, և նրա քաշը 200 գ ավելի էր»,- ասել էր Հայաստանի ազգային հավաքականի գլխավոր մարզիչ Փաշիկ Ալավերդյանը:
Անդրադառնանք նաև անցյալ տարի Աշխաբադում տեղի ունեցած աշխարհի առաջնությունում Կարապետյանի մրցելույթին: Լուրջ հավակնություններ ունեցող հայ ծանրորդը, պոկում ձևում պատվիրելով 171 կգ, ձախողել էր բոլոր 3 մոտեցումներն ու ցույց տվել 0-ական արդյունք: Հիշեցնենք, որ 2016 թվականի Օլիմպիական խաղերում Կարապետյանը հրում վարժության ժամանակ ծանր վնասվածք էր ստացել և կրկին 0 ստացել: Ցավալի այս վնասվածքից հետո քչերն էին հավատում, որ տաղանդավոր ծանրորդը շարք կվերադառնա: Ցուցաբերելով կամային բարձր հատկանիշներ՝ Մոսկվայում տեղի ունեցած վիրահատությունից հետո Կարապետյանը կրկին շարք վերադարձավ:
Որպեսզի ձախողումների վերաբերյալ պատկերն ավելի ամբողջական լինի, հայացք նետենք Կարապետյանի անցած ուղուն միջազգային ասպարեզում: Մարզական միջազգային կարիերան Կարապետյանը սկսել է 2011 թվականին՝ պատանեկան աշխարհի առաջնությանում, տղամարդկանց 62 կգ քաշային կարգում և գրավել է 3-րդ հորիզոնականը: Նույն թվականին մասնակցել է Եվրոպայի պատանեկան առաջնությանը՝ նորից գրավելով 3-հորիզոնական, սակայն արդեն 69 քաշային կարգում։ 2012 թվականին հաջորդաբար մասնակցելով նույն մրցումներին՝ տղամարդկանց 77 կգ քաշային կարգում գրավել է 1-ին հորիզոնականը։
2013 թվականին դառնալով չափահաս՝ մասնակցում է մեծահասակների Եվրոպայի և երիտասարդների աշխարհի առաջնություններին, սակայն ոչինչ չի ստացվում. երկու մրցաշարում էլ զրո է ստանում։ Այսինքն՝ մուտք գործելով մեծահասակների ասպարեզ՝ Կարապետյանը երկու կարևոր մրցաշարերում իրար հետևից 0 է ստացել: Մեկ տարի դադարից հետո՝ 2015 թվականին, մասնակցում է մեծահասակների Եվրոպայի առաջնությանը, զբաղեցնում 3-րդ հորիզոնականը, այնուհետև մասնակցում է Երիտասարդների աշխարհի առաջնությանը, գրավում է 1-ին պատվավոր հորիզոնականը։ 2015 թվականի վերջին միջազգային մրցումներում՝ Ծանրամարտի աշխարհի առաջնությանը, գրավել է 4-րդ հորիզոնականը: Սակայն Համաշխարհային հակադոպինգային կազմակերպությունը (WADA) խախտումներ էր գրանցել 2016 թվականի գարնանային ստուգումների ժամանակ, և դրանց մեջ կար նաև 77 կգ քաշային կարգի փոխչեմպիոն, Հյուսիսային Կորեան ներկայացնող Կիմ Կվանգ Սոնգը, որի որակազրկման պատճառով Անդրանիկ Կարապետյանը երկամարտի 363 կգ արդյունքով արժանացել է աշխարհի առաջնության բրոնզե մեդալի: 2016 թվականին մասնակցում է Եվրոպայի առաջնությանը և դառնում միանձնյա չեմպիոն: Սա Կարապետյանի կարիերայի թերևս միակ տպավորիչ մրցելույթն էր և ոսկե մեդալը մեր երկրի համար:
Կարապետյանն ընդամենը 23 տարեկան է, սակայն արդեն հասցրել էր Աշխարհի և Եվրոպայի առաջնություններում, ինչպես նաև Օլիմպիական խաղերում 6 անգամ 0 ստանալ: Կարապետյանի շուրջ տեղի ունեցածը ոչ այլ ինչ է, քան տրագեդիա: Բոլորս հավատում ենք, որ Կարապետյանը լավ ծանրորդ է և այսօր էլ ունի մեծ պոտենցիալ, բայց…
Կարծում ենք՝ այս պահին ուղղակի անհրաժեշտ է, որ այս ծանրորդի ցույց տված արդյունքների վերաբերյալ լսենք մասնագիտական լուրջ գնահատական: Կարծում ենք նաև՝ տաղանդավոր մարզիկի ձախողումների համար պետք է որևէ մեկը պատասխանատվություն կրի և մարզասերներին պարզաբանի տեղի ունեցածը: